Тодэ ваёнъёсын улӥсь гурт

Удмурт Дунне
By Удмурт Дунне Июль 11, 2012 13:13

Тодэ ваёнъёсын улӥсь гурт

Библиотекарьёс Е. Михайлова но Н. Куштанаева.

Кияса ёрос библиотекае ку гинэ эн пыры, капчи но шуныт мылкыдын пумиталозы, книга-журнал-газетъёсын тодматэм сяна, пӧсь чаен утялтозы. Уката ик мылкыдзэ сётыны быгатэ шаертодонъя отделэн кивалтӥсь Назиля Куштанаева. Пусйыны кулэ, Назиля Сойферовна — ёрос библиотекаын огназ удмурт адями.

— Вордӥськемын Башкортостанысь Янаул ёросысь Урадӥ удмурт гуртын, — шуэ нылкышно. — Киясае вуи, Ижысь культпросветучилищеысь библиотека ёзэз йылпумъяса, 1987-тӥ арын. Киясаез чылк-чылк удмурт ёрос кожасько вал. Нырысь-валысь номырзэ уг валаськы: адямиос урамын но, магазинъёсын но ӟуч кылын верасько. Библиотекаын удмурт сямен вазьыны уг лэзё. Соку валатски ини: ёрос центр ӟучгес вылэм.

Библиотекаысь лыдӟись­кисьёслэсь лыдзэс учки: удмуртъёс 3 сюрслэсь ятыр возисько, нош ӟучъёс 4 сюрслэсь ортчемын.

Ӵемысь дорамы ӧтчась­комы писательёсты, журналистъёсты, артистъёсты, ёросын но республикаын данэ потэм адямиосты, — веранзэ азинтэ Назиля Сойферовна. — Ужрадъёсмы ӟучо-удмурто ортчо. Ёросысьтымы кылбур гожъясьёсын пумиськонъёс радъяськом. Тросэз соос нимаз бичетъёс поттылӥзы ини. Библиотекаын мӧйыос но нылпиос понна дасо пала кружокъёс ужало.

Кияса библиотекаын ужасьёс асьсэ кужымен поттало книгаос. Соосты люка Назиля Куштанаева. Нырысетӥ ужзы — «Летопись земли Киясовской».

— Ёрослэсь вашкала улонзэ, историзэ бугыръяса, со книга дунне вылэ вордӥськиз, — вера Назиля Сойферовна. — Трос ужано луиз калыкен. Юалляськыса, туспуктэмъёс бичаса, ветлӥмы. Книгамес поттыны тыршимы, адямиослэсь вераськон сямзэс кельтыса. Дышетӥсьёс но, нылпиос но та бордын трос ужазы. Озьы ик 2010-тӥ арын лыдӟись кие вуиз «Дети военных лет» книгамы. Быгатӥм «Воспоминания трактористок военных лет» бичетэз поттыны. Собере ужамы ини «След подвига людской» книга бордын. Ижевск-Балезино чугун сюресэз лэсьтонын тыршисьёс сярысь документъёс бичамы, адямиослэсь юалляськимы. Та книгаос бордын ужамы шаерчиен, ёросысь дано адямиен Тамара Савинаен, ёрос библиотекалэн азьвыл кивалтӥсеныз Наталья Мещеряковаен но Кияса шор ёзо школаысь дышетӥсен Татьяна Шадринаен. Котькудӥз книга дуно луэ туспуктэмъёсын. Топонимъёсын «Родные места, дорогие места» нимо книга поттыны малпаськомы на. Со понна ёросын юри ӵошатскон ортчытӥмы. Вормисьёслэсь ӟеч ужъёссэс отчы пыртыны малпамы. Та бордын ужаськомы ини ёросысь удмурт кылъя но литературая дышетӥсьёсын ӵош. «С песней живёт село» книгае пыртӥмы Александр Кунгуровлэсь нотаосын кыр­ӟанъёссэ. Таиз бордын ужаз крезьгуръя дышетӥсь Татьяна Зыкова.

— Книга поттон понна уксё кулэ ук, кытысь шедьтӥськоды? — юасько Назиля Сойферовналэсь.

— Олокыӵе но амалъёс утчаськомы. Поттэм книгаосмес пичиен-пичиен вузаськомы. Бумагалы уксёмы тырме ке, туж умой ини. Компьютерен асьмеос бичаськомы. Вёрсткаен ужасьмы вань.

— Шумпотӥськом, библиотекаямы электронной амалэн лыдӟиськон залмы вань ини, 5 компьютер ужа, — шуэ ёрос библиотекаен кивалтӥсь Елена Михайлова. — Табере калык отчы кыстӥське, ачиз компьютерен ужаны быгатэ ини. Ӝожтӥськыны уг яра книгаослэн тырмымтэзы вылэ но. Туэ тани 80 сюрс манет тыр выльёссэ сётӥзы. Эшшо 18 сюрс тыр вуыны кулэ на.

— Азьланяз малпанмы трос, — нош ик сюлэм висёнзэ вера Назиля Сойферовна. — Юрмалай муниципал кылдытэтлэн арез туэ тупа. Отысь «Рассвет» колхоз куашкан калэ вуиз. Салья палъёсты ӝутон вылысь со музъем вылын вордскемъёслэн кылбуръёсынызы «О той земле, где начал жить» бичет печатланы малпаськомы. Озьы ик аслэсьтыз гожъямъёссэ калыке поттыны малпа Марина Морякова. Выль книгаосын тодматыны гуртоос доры асьмеос потаськомы. Угось Кияса ёрос библиотека вужме — кылдэм дырысеныз 111 ар тырмиз ини.

Любовь Тихонова.

Удмурт Дунне
By Удмурт Дунне Июль 11, 2012 13:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<