Пужы пуктыны синъёс кулэ ӧвӧл?

Удмурт Дунне
By Удмурт Дунне Июль 31, 2012 11:08

Пужы пуктыны  синъёс кулэ ӧвӧл?

Рая апай пичи дырысеныз дышемын киужлы.

Улон секытэн Пичи Пурга ёросысь Пуропочинкаысь Они апай Рая нылзэ пичиысен вордосэ сётӥз. Ачиз, сьӧрло гуртъёстӥ нюлэс кораса, чугун сюрес ултӥ потан котлован лэсьтыса, Кечолын улӥз. Нылкышнолэн Степан агаезлэн нылыз-пиез вылымтэ. Соин ик Раяез соос малпаськытэк асьсэлы басьтӥллям.

— Укмыс аресысен колхоз ужез быдэсъяса, будӥ, — тодаз вае 79 аресаз ветлӥсь Раиса Исаевна Макарова. — Парсь но сюдӥ, кунян но возьмай. Гужемзэ етӥн ишкиськом вал. Со понна чечыен пичи гинэ нянь сётылӥзы. Дышетскыны Пурое 3 иськеме нуналлы быдэ ветлӥмы. Дӥськут начар, сиён алама. Ньыль классэз пырпотыны ӧз ни кылды. Дядяйме войнае басьтэмзы бере улонэ эшшо но шуггес луиз. Вордос муртэ бон кин яратоз ни? Монэ ужатыны турттыса, нэнэелэн катьыз ик бырылӥз. 18 арес тырмиз но, вазен ведь выт бичало вал, сое тыронтэм понна монэ нэнэе ФЗО-е но, Яганэ нюлэс коранэ но келялляз. Монэ отысь, пичи ай шуыса, нош доре келяло.

Ултӥянэз чидатэк, Рая Кечол гурт вӧзысь «Заготзерноын» улӥсь Минька кырсиез доры кошкиз. Уже интыяськиз. Каллен пыд йылаз султыны шӧтаз. Со вискын Кечейылысь Володяен тодматскиз. Пияш сое анай-атаез доры улыны нуиз.

— Бызён интыме ок­тӥсько-калтӥсько ини, — веранзэ азьланьтэ Раиса Исаевна. — Выжез, корказез миськисько. Улон инты сюриз шуыса, шумпотыны кулэ кадь ини. Нош аслам сюлэмы Володя борды пичи но уг лякиськы. Яратонэз валатэк, тазьы улод-а шуыса, дӥськутме артысь корка лушкем поттай. Мар бон соку котыр но вал ай: валес, дукес дэрем. Со вискын Бӧдей Сандраен Калистрат Матрон азям сюризы: Аксакшур школаын, пе, техничкаын ужаськом. Ужамед потэ ке, мын ми интые, шуо.

Раялэн со ик Аксаке выжы лэземез луиз. Егит ныллы кельшиз гурт калык. Вазен техничкалэн ужез туж секыт вал: вазь ӵукна ик школае мыноно, гурез эстоно, колодчаысь пельпум вылын карнанэн ву нуллоно, эшъёсын вошъяськыса, выжез миськоно… Школаын соку вал но вордӥзы, сое нылкышноос ик сюдӥзы. Гужемзэ колхозэ ужаны потталлязы.

— Улыны турттыса, весь курадӟиськиз, — шуэ Рая апай. — Нырысь ик кунокуае Папинь Рая апай доры пыри. Со Витя пиеныз гинэ улэ вал. Отӥяз пичигес гинэ корка басьтыны быгатӥ. Ӟазег трос вордӥ. Соос тыриськыны юрттӥзы ини. Уждунмы милям туж ичи вал.

Вань ужез киын лэсь-тӥмы. Толалтэзэ ӟырт кезьытэн нюлэскы пу кораны но нуллылӥзы. Сое асьмеос ик вандылӥмы, пильылӥмы, лапасъёсы люкамы. Кынман но, мар но шеде вал, дыр, ини. Шуныт дӥсяськем уг йӧты вал. Оло, соин ик синъёс но быризы…

— Милемлы удалтӥз мамаен, — шуэ Рая апайлэн бадӟымез нылыз Катя. — Со котьку юрт котырез чылкыт но ӝикыт возиз, ческыт сиён пӧралляз. Но куинь ар талэсь азьвыл шӧдтэк шорысь адӟемысь дугдӥз. Ми со сярысь нырысь ӧм но шӧдэ — кыштыр гинэ керттӥськыса пуке. Собере каллен-каллен валатским. Нэнэймы туж чебер пужъятске но, чильпаське но вал.

— Тэк пукон дырез ӧй тодылы, — шуэ Рая апай. — Али но ужатэк улэме уг поты. Вазен сӥньыс ќй вал, табере кыӵе буёлозэ но уг вузало. Керттӥськемъя керттӥськем потэ. Тол ӵоже кӧня пыдвыл, пӧзьы керттӥ ни меда!

— Воксё адӟытэк шуг, дыр, керттӥськыны? Уката ик пӧртэм буёло сӥньысъёсын пужы пуктыны?

— Чиньыос асьсэос мыно. Пичи дырысен дышемын ук соос та ужлы. Со понна синъёс но кулэ ӧвӧл кадь. Ма, вазен но озьы ик вал, ачим телевизор учкисько, киосы асьсэлэсь ужзэс быдэсъяло. Буёлъёслэсь пӧртэмлыксэс чиньыосы валало. Кытысь ке но сыӵе шӧдон потэ вылэм. Керттӥськыса акыляк луисько ке, азбаре потӥсько, корка пу пыртӥсько, пыдъёсы корказь тубатъёслы дышизы ини. Туж яратӥсько удмурт радиоез кылзыны. Удмурт кырӟанъёс сюлэмез позырто.

Раиса Исаевна бӧрысь нэнэйзэ дораз вайиз. Соиз пересьмытозяз нылыз дорын гань-гань утиськыса улӥз ини. Рая апай угось вить пинал вордӥз. Ваньзы соос синмаськымонэсь будӥзы.

Любовь Тихонова.

Удмурт Дунне
By Удмурт Дунне Июль 31, 2012 11:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<