Кужымзэс мертало ужын но спортзалын

Удмурт Дунне
By Удмурт Дунне Июль 31, 2012 10:48

Александр Волков, Сарапул ёросэ вуылыкуз, отысь лэсьтӥськон объектъёсты эскериз, городъёсын ужась калыклэн 5-тӥ гужем спартакиадазэс усьтонэ пыриськиз.

Кӧня ке ар талэсь азьло «Сарапул-йӧл» огазеяськон бере кылисьёс пӧлын вал. Выль кивалтӥсьёс вуэмен, та вакытэ йӧл поттӥсьёсмы Россиысь азьветлӥсьёс пӧлы шедемын. Нош ужан тӥрлыкъёссы дуннеысь устоосыз луо. Берло аръёсы та огазеяськонлы выльдӥськонлы ӝыны миллиард пала коньдон висъямын вал.

«Сарапул-йӧл» толэзь ӵоже 60 тонна пала йӧл продукция поттэ. Со пӧлысь 30 процентэз чакламын нылпиослы «Школа йӧл» программая. Удмуртие сяна, Россиысь эшшо 40 улосэ вуззэс вутто. Нош предприятилы йӧл вутто шаерысьтымы гурт хозяйствоос.

Сарапулысь «Кигбаево Агро» огазеяськонысь пудо утисьёс кылем ар ӵоже 4 сюрс тонна йӧл люказы, котькуд скаллэсь 5 сюрс 500 килограмм. Нош туэ та хозяйство выль ужан амал борды басьтӥськем — силос но сенаж дасянлэсь куштӥськыса, вань пудо сиёнзэс рулонэ бинялто. Гурт хозяйстволэн кивалтӥсез Михаил Широбоков пусйиз: пудо сиёнэз гуосы тырон трос ыштонъёс вае. Туннэ хозяйствоын 760 кысконо скалъёссы, ар пумозь та лыдпусэз 840-озь вуттозы.

Александр Волков но мукет кивалтӥсьёс вуылӥзы на Сигаево черкогуртысь нылпи творчествоя юрт пуктонэ, Сарапулысь Покровской черкез выльдонэ. Та черк городын тужгес вашкалаез лыдъяське. Сылэ но со тужгес вашкала ульчаын. Берло 30 ар ӵоже та юртын нянь пыжылӥзы, нош отӥяз со воксё кузётэк сылӥз. Черк куашканы ӧдъяз. Ярам, та уж борды дэмен басьтӥськизы. Черк, толэзь ортчыса, ӧссэ усьтыны кулэ.

Сарапулысь 17 номеро школа но кемалась куашкан калэ вуэмын. Лэсьтӥськон ужъёс туэ интыысьтызы вырӟизы.

— Шумпотӥсько сарапулъёслэн дӥсьтӥсь луэмзылы, — шуиз Александр Волков. — Трос аръёс ӵоже та юртлэсь вылтуссэ гинэ выльдон сярысь вераськизы вал, нош соос дӥсьтӥзы школаез быдэсак куашкатыны. Озьы лэсьтӥськисьёс кык кечез кутозы: выль юрт пуксёз, нош куашкатэм юртлэсь изъёссэ сюрес лэсьтонэ нуллозы.

Школаез вуоно арлы вуттыны чакламын. Та вакытэ инъетэз кисьтэмын ни. Отын тодон-валан люкалоз 300 пинал. Озьы ик та вакытэ выльдӥське Сарапулысь 33 номеро нылпи сад.

* * *

Городъёсын ужась калыклэн 5-тӥ спартакиадаязы 540 пала спортсменъёс пыриськизы. Вань люкаськемъёсты спорт праздникен ӟечкылаз Александр Волков:

— Сарапул городын трос лэсьтӥськон ужъёс мыно, 1-тӥ сентябрьлы выль спортзал, тир, пинал биатлонистъёс понна бызьылон сюресъёс усьтӥськозы. «Сокол» стадион но быдэсак выльдэмын. Озьыен, мугор кыдатыны луонлыкъёс кылдытэмын.

Спартакиадае 35 предприятие пыриськиз. Спортын 11 амалъя кужымзэс мертазы. Кылем спартакиадаен ӵошатоно ке, шӧртчиос туэ гира ӝутказы, уязы, семьяослэн ӵошатсконазы пыриськизы. Куинь нунал нюръяськемзы бере огъя зачётын вормисе потӥзы кузёос — сарапулъёс. Кыкетӥ но куинетӥ луизы Ижысь Первомай но Октябрь ёросъёсысь предприятиос.

Валентина Емельянова.

Удмурт Дунне
By Удмурт Дунне Июль 31, 2012 10:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<