Дорзэ вунэтэм адями изме

Удмурт Дунне
By Удмурт Дунне 4 июля, 2012 10:37

Дорзэ вунэтэм адями изме

М. Сельченкова.

Москваысь удмуртъёслэн «Герд» огазеяськонзылы 21 ар ни. Татчыозь возиськемезлы тау шуыны кулэ педагогика наукаосъя кандидатлы Маргарита Сельченковалы но. Удмуртилэн Москваын ужась представительствояз калыклы улон-вылонын юрттэт сётонъя но ужпумъёслэсь быдэсъяськемзэс эскеронъя отделэн кивалтӥсь кышномурт дырзэ но, кужымзэ но уг жаля удмуртъёсты котыраз биньыны. Та нуналъёсы со пусъе 50 аресъем юбилейзэ.

— Пичи Пургалась Улын Кечол гуртысь нылаш кызьы сюриз Москвае?

— Геннадий Ушаков профессорлы тау карисько. Улон сюресме со воксё воштӥз. Удмурт кун университетын дышетскыкум, солэн кивалтэмез улсын удмурт кыл методикая диплом уж гожтӥ. Школаын ужа­кум, со монэ весь син азяз возиз. Куинь ар ужаме бере дэмлаз: Маргарита, тодон-валан басьтондэ одно азьланьты. Национальной школаослы педагогъёсты дасянъя Москваысь научно-исследовательской институтэ пырыса утча, пе, отын аспирантурадэ ортчы. Аслым ачим осконме будэтӥз со. Нырысь-валысь кышкатӥз ик мурт но кезьыт город. Но куалекъянэ ортчиз мон аспирантурае йыгаськисьёс пӧлын огнам гуртысь ӧвӧл шуыса адӟеме бере. Якутиысь, Туваысь, Марий Элысь, Кабардино-Балкариысь егитъёс ог-огмылы котьку юрттыны, ог-огмес бурдъяны выримы. Москваез ӵошен эскеримы, адӟимы, соин тодматскимы.

Мыным, юлтошъёсылы сярысь, тужгес капчи вал, дыр — наукая кивалтӥсен удалтӥз. Со — асьме Удмурт шаерын кыдам кышномурт, педагогика наукаосъя доктор, профессор Глафира Никольская. Со мынам кылдысинэ: кужым сётӥз кандидат ужме гожтыны. 1991-тӥ арын Москваысь удмуртъёсты огазеян вылысь кылдытӥз «Герд» огазеяськон. Монэ но отчы ик кыскиз. Собере сюрес возьматӥз Удмурт Республикалэн Москваысь представительствояз. Татын монэ адӟизы. Оскизы кусып возьыны пӧртэм министерствоосын но ведомствоосын, ужаны пӧртэм диаспораосын, дышетон, культура, социальной политика понна кыл кутыны косӥзы. Туннэ ке но та отделэз валтӥсько.

— Москваос удмуртъёс шоры кырыж уг учко-а?

— Представительствоын ужасьёс — асьсэос уноез Удмуртиысь потэмъёс. Соос ваньзы сямен удмурт сям-йылолъёсты, калыклэсь асшӧдонзэ тодо. Соин ик выжымы шоры кырыж учко, шуэме уг луы. Тазьы верасал: уноез данъясько асьмемын. Сыӵе мылкыдзы тужгес зол пуромиз, Пичи Пургалась брангурт песянайёсмы воректэмен.

Представительство­ын ужасьёс нырысьсэ песяйёсынымы тодматскизы 2004-тӥ арын. Брангуртъёс соку таӵе данэ потэмын ӧй вал на. Удмурт постпредстволэн юрттэмезъя, соос Москваысь Нациосъя юртын «Крезь, чыртывесь, перепеч» нимо концерт пуктӥзы. Кырӟам сяна, эктонъя мастер-класс возьма­тӥзы. Пыжосъёсынызы куноятӥ­зы. Учкисьёс пӧлын комиос но, мордваос но вал. Зол паймытӥзы, ява. Со дырысен ми тужгес сак чакламы соослэсь сюрессэс. Валамон ни: Евровидение сюремзэс тодэммы бере вань сюлмынымы висимы соос понна. Синвуаськыса ик учки кыр­ӟамзэс. Пушкам бугыръяськиз таӵе малпан: мон таос вӧзынгес ик будӥ — Брангурт Улын Кечол гуртлэсь 8 иськемын гинэ.

— Москваын, «Герд» сяна, ужа на Удмурт землячество. Валтэ сое Россиысь ДОСААФ-ен кивалтӥсь, генерал-полковник Сергей Маев. Та кык огазеяськонъёслы огазе кариськыны дыр вуэмын ӧвӧл меда?

— Удмурт землячество кылдӥз 1998-тӥ арын. Со огазеяз Удмурт шаерысь Москвае ужаны лыктэмъёсты. Татчы пыро ӟучъёс но, бигеръёс но, башкиръёс но, поръёс но. Ми куспамы керетыса ум улӥське. Керетон пуроме, адямиос мае ке люкыны быгатымтэысь. Нош ми мае люком? Соин ик уртче ужаськом. Солэсь ортчыт — берло дыре «Герд» огазеяськон Удмурт землячестволэн шорсюлмыз луиз. Унозэ ужрадъёсты радъя но ортчытэ «Герд». Ӟеч кылъёс вераме потэ Е. Титова, Е. Лебедева, Т. Тепляшина, Ю. Малых, В. Лебедев, М. Калаев, Н. Подседерцев, В. Перминов сярысь. Соос котьку дыр шедьто удмурт землячество понна.

— Егитъёсты пӧлады кыскыны шуг-а?

— Пинал калык ачиз лыктэ, ӝутка. Милям, арлыдоослэн, кадь возьдаськон, пушказы чалмыт пукон сямзы ӧвӧл ни туала егитъёслэн. Соос телевиденилэсь но, радиолэсь но уг кышкало ни. Туж синмаськисько Ольга Урасинова дышетӥсьлы, Елена Ильина режиссёрлы, Настя Чушъялова кырӟасьлы но мукетъёсызлы.

Удмурт сям-йылолъёс пӧлын гинэ будэмын ӧвӧл туала Москваысь удмуртъёс. Тросэз, шоркарын диплом басьтыса, Европаез но адӟылэмын ни. Соин ик соос милемыз пӧртэм ужрадъёс ортчытыны бурдъяло но ӵектонъёсынызы пото. Кылем кӧснуналэ огъя кужымен ортчытыны быгатӥмы Гербер праздникез. Сомында удмуртъёс огазе люкаськизы! Москваысь сыӵезэ адӟылэме ӧй вал на, шуыны луоз. Ваньмыз со егитъёслэн бызьылэмзы.

Но тазьы удмурт пиналъёс гинэ уг ужало. Берло дыре юн шӧдӥське: мукет выжы калыкъёслэн но егитъёссы сайкамын. Ваньзылэн пушказы гыбда одӥг сюлмаськон: историез, сям-йылолъёсты утёно, сотэк выжы калыкмы воксё вужере кылёз но пумен быроз.

— Кыӵе сюлмаськонъёсын улэ туннэ «Герд»?

— Ми туж шумпотысалмы удмурт художникъёсмылэсь, писательёсмылэсь, мукет дано адямиосмылэсь ӝытъёссэс Москваын радъяны. Мед гинэ вазиськысалзы. Москваын улӥсьёс туж мӧзмо удмуртлыклэсь. Удмурт шаерын улӥсьёс пӧлысь куд-огез тае, оло, уз вала. Но бадӟым городын, пӧртэм калыкъёс пӧлын бергаса, ялан ӟуч кылэз гинэ кылыса, куддыр юн жадёно. Сюлэм аслыз шунтӥськон инты утча, удмурт кыллэсь, удмурт ужась калыклэн кисыриё ымныръёсызлэсь мӧзме. Соин, лэся, ки лыдэ, кыӵе ке удмурт ӝыт ортчытон сярысь малпаськыса.

Табыдӟа городын туж секыт общественной ужен вырыны. Но туж шумотӥсько, та дыр ӵоже «Гердэз» утьыны быгатӥмы шуыса.

— Нылъёсты палэн­тӥсь­ко я кыстӥсько удмуртлык котыре? Мон тодэмея, картты ӟуч, комьютеръёсын выре…

— Нылъёсы кык кузя. Пичи дыръязы соосты весь нуллӥсько вал пӧртэм удмурт ужрадъёсы. Школаысен дышетыны кутскизы англи но француз кылъёсты. Фортепьяноез «кыткизы», крезьгур борды биниськизы. Малпай: бадӟымгес будӥзы ке, удмурт кылэз но дышето соосын. Аръёс ортчемъя гинэ валай: мултэс бадӟым будӥллям ни. Табере соослы 13 арес. Ма но со вераны пӧрмыто ик. Но рос-прос удмурт сямен вераськыны дышетскон понна табере дырзы уг тырмы.

— Макем ӵем кылдэ бертаны вордскем палъёсады?

— Улын Кечол гуртам арлы быдэ вуылӥсько. Мынам анае вань на. Вордскем коркам вуисько ке, сузэре но, вынъёсы но ас семьяосынызы вуо. Ми вить кузя нылпиос. Анаелы 72 арес. Тазалыкез лябгес ни. Но, кызьы ачиз шуэ, мон, пе, пересь ӧвӧл ай, мӧйы гинэ, куарае но вань на. Али тани семьяосмес ӝуткам лапасэз выльдыны. Быдэс улонзэ фермаын ужам кышномурт ноку ӧз жадьылы ас вакытаз концертъёс дасяны, спектакльёс пуктыны. Анае туж кырӟась, кыло-буро верась, котьку чырткем мылкыдо. Солэсь ик пыӵаз, луоз, мыным но пӧртэм ужрадъёс ортчытъян мылкыд.

Вордскем гуртам бертатэк уг быгатӥськы. Сотэк мӧзмыса ик куасьмо. Будэм юртъер ялан бордаз кыске. Адями дор сярысь валанзэ ыштэ ке, дорезлэсь мӧзмемысь дугдэ ке, изме, дыр. Мон бадӟым городын ке но улӥсько, аслым измыны уг сётӥськы. Адями чурытоме ке, муртлэсь вӧсьсэ но валаны тыршемысь, солы быгатэмезъя юрттэмысь дугдэ. Нош мыным чурытомыны уг яра. Изми ке, ужан интыям но кинлэн дорам кожемез потоз на?

Жаляса верано, уноез Удмурт шаерын улӥсьёс, асьсэ дорын валамтэен пумиськыса, лэся, оло, югдурез валатэк, ми доры вазисько. Одӥг-огез юа, кинлы сётӥське Анайлэн данэз гадьпус, улон юртъерлы ёрмисьёсыз кылдэм югдурысьтызы потыны юрттэт куро. Но жаляса пусъёно, представительство та­ӵе ужпумъёсты сэрттыны-пертчыны уг быгаты. Со азе мукетэсьгес куронъёс пуктэмын. Котьма ке но гожтэтъёссэс жуг-жаг куянэ ум ыргалтӥське — запрос келяськомы ведомствоосы но министерствоосы.

Измыны уг сёты мыным «Герд» но. Со мынам кыкетӥ семьяе кадь. Ог-огмес валаськомы, ог-огмылы юрттӥськомы. Ӵош люкаськыкумы, Удмурт шаере вуылэм кадь йӧтӥсько.

Елена Сараматова.

Удмурт Дунне
By Удмурт Дунне 4 июля, 2012 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<