Геройёс быризы…

Удмурт Дунне
By Удмурт Дунне 11 июля, 2012 13:08

Писательёслэн, лыдӟисьёслэн детектив жанр сярысь малпанъёссы тупало-а? Оло, удмурт детективез лыдӟись ӧвӧлэн сое гожъясь уг шедьы? Яке ӧвӧл геройёс?

Римма Игнатьева, писатель:

— Детективез но, нылкышно романэз но гожтон понна нырысь ик сюлэмез маке но вырӟытыны кулэ. Озьы 90-тӥ аръёсы йыркур луиз «сьӧд риэлторъёслэн» сьӧсьяськемзылы, со сярысь вераме потӥз, огшоры адямиос четлыказы медаз шеде шуыса. Гожтӥ, кызьы шӧдӥ, кызьы сюлэмы косӥз — детективлэсь куронъёссэ валэктӥсь нокыӵе научной литератураен ӧй тодматскы.

Детектив гожтон понна писательлэн логикаез зол луыны кулэ. Нырысь пуксьыку ик, адӟоно ини произведенилэсь пумзэ но отчы вуон сюресъёсты. Гожтыку со сюрес вылысь кожыны уг луы ни. Яратон сярысь романын со номыр уз воштӥськы, бызьытод-а героиняез нырысетӥ туганэзлы яке куинетӥезлы. Детективын вань учыръёс, геройёс ог-огенызы юн герӟаськемын.

Елена Панфилова, писатель:

— Ыбон, вандон, пӧян, лушкан сярысь гожтэм уг поты — укыр трос со кисьтӥське экранысь, газет, книга бамъёсысь, ӵем пумиське зэмос улонын. Вот азьло детективъёс но соослэн геройёссы тунсыкоесь вал. Кыџе малпаськыса, йырез тћяса лыдњоно вал соосты. Туалаосыз ӵошатскозы шат Шерлок Холмсэн! А. Конан-Дойль кадь ӟеч гожтыны уд пӧрмыты, вылды, нош огшоры чур пӧрам уг поты.

Ольга Вахитова, лыд­ӟись:

— Мон будӥ детективъёс вылын. Англиысь А. Конан-Дойль, А. Кристи, Франциысь Ж. Сименон, Америкаысь Э. По косо йырез тӥяны, дышето векчи учыръёсты синйылтыны. Пичи дырысеным синмаськисько Ж. Сименонлэн Мэгре комиссарез кадь брутальной воргоронъёслы (эшшо чильымен ке!), гажаса учкисько А. Кристилэн мисс Марплэз кадь песянайёс шоры: вылтусын тӧдьы, небыт унябейлы кельшо, нош сямзы юн, синзы сак. Детективъёсты яратонэ кыстӥськиз, Б. Акунинлэн но А. Марининалэн романъёссы потытозь. Кылем даурысь писательёслэн кадь ик, таослэн но детективъёсазы визьмо геройёс, соослэн малпаськоназы шӧдӥське мур философия. Лушкаськон, адями виён отын уродзэ, кырсьсэ возьматон понна гинэ ӧвӧл — озьы карыны уг яра шуыса валэктон понна.

Жаль, берло 10 арзэ одӥг детектив но ӧй лыдӟы — номыре. Визьмо сыщикъёс-детективъёс быризы, кылизы на кескич йыртэмасьёс гинэ? Таин ик герӟаськемын, дыр, удмурт литератураын детективъёслэн ичи луэмзы: сыщиклэн образэз оскымон мед луоз, со йыружчиез мед вормоз шуыса, ачиз писатель героезлэсь визьмо, амало луыны кулэ.

Ольга Максимова.

Удмурт Дунне
By Удмурт Дунне 11 июля, 2012 13:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<