Вормонэз витёно ӧвӧл?

Удмурт Дунне
By Удмурт Дунне Июль 31, 2012 10:43

Вормонэз витёно ӧвӧл?

Д. Белявский быгатонлыкъёсыныз паймытэ.

2008-тӥ арын Пекинын ортчем Олимпиадаез учконо ке, Россиысь спортсменъёс ньылетӥ нуналаз гинэ медаль басьтыны быгатӥзы вал. Нош таяз учыре нырысетӥ нуналаз ик шумпоттӥз дзюдоистмы Арсен Галстян, со зарнияськиз.

Зарни вӧзы эшшо куинь туй медаль басьтӥз велогонщик Ольга Забелинская, саблист Николай Ковалёв но воргоронъёслэн 100 метре эркын амалъя уянъя командазы. Та вакытэ котькинлэсь трос медаль омыръяло Китайысь но Америкаысь спортсменъёс. Толло нуналлы Китайысь команда 6 зарни, 4 азвесь, 2 туй медаль люказ ни ке, Россиысь спортсменъёс — ваньзэ-ӧвӧлзэ 4 гинэ.

Шаерысьтымы куд-ог спортсменъёс Олимпиадалэн нырысь нуналъёсаз ик кужымзэс эскеризы. Медаль понна нюръяськизы ыбылӥськисьёс. Медаль дорозь сузьтӥськемзэ витизы Удмуртиысь Наталья Падериналэсь. 10 метр кемысь пистолетэн ыбылӥськонын кылем Олимпиадаын со азвесь медаль басьтӥз вал. Жаляса верано, таяз учыре 37 интые кылиз.

Нош мукетыз егит спортсменмы Дарья Вдовина, 10 метр кемысь пневматической винтовкаен ыбылӥськыса, Россиысь спортсменъёс пӧ-лысь огназ финалэ шедиз. Но медаль понна нюръяськонын киосыз дыректӥзы. Тямысэтӥ кылиз.

Шутэтскон нуналъёсы шумпоттӥз гимнастмы Давид Белявский. Трос амалъя ӵошатсконын со кыкетӥ лыдпус возьматӥз, нош медаль понна нюръяськонзэ толон ӝыт азинтӥз. Быгатонлыкъёсызлы ачиз но спортсмен паймемын вал. Куке вормонъёсты, пе, уд витиськы, вылӥе ӝутскыны луонлыкъёс но кылдыло. Оскем потэ, финал дыръя но аспал эшмы асьмемыз шумпоттоз. Удмуртиысь спортсмен понна Свердловск улос но лулысь-сюлмысь висе. Угось Давид кык улос понна очко люка.

Валентина Кутузова.

Удмурт Дунне
By Удмурт Дунне Июль 31, 2012 10:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<