Бусы кизёд — юрттэт басьтод

Удмурт Дунне
By Удмурт Дунне Июль 31, 2012 10:47

Бусы кизёд — юрттэт басьтод

Кивалтӥсьёс кенешо.

Сарапулэ люкась­кылӥзы городъёсысь но ёросъёсысь администрациослэн кивалтӥсьёссы. Кенеше пыриськиз Удмуртилэн Президентэз Александр Волков. Пумиськонын ӝыны ар ужамлы йылпумъянъёс лэсьтӥзы но вуоно толлы дасяськон сярысь вераськизы.

 

Йӧл кыскемын тросгес

Гурт удысъя но сиён-юонъя министр Алексей Стрелков ивортӥз: туэ 6 толэзь ӵоже гуртоос 15,6 миллиард манет тыр сиён-юон поттӥзы. Кылем арынлэсь 6,7 процентлы ятыргес.

Пудо сиёнэз но юосты октон-калтонлы быдэс арлы висъяны чакламын 1,2 миллиард манет. Та коньдон пӧлысь 787 миллионэз кутӥське та кысык вакытэ. Басьтэмын техника, сылало ватсэтъёс, кидыс, кизер эстӥськон. Туэ хозяйствоос басьтӥзы 184 трактор, 6 ю аран-кутсан но 29 пудо сиён дасян комбайн. Озьы ке но Удмуртилэн машина-трактор паркез трослы вужмем: тракторъёс — 71 процентэз, комбайнъёс — 44 процентэз, кизён но му небӟытон агрегатъёс — 75 процентэз. Соин ик котькуд ужась машиналы тыршоно луэ нормалэсь ятыргес.

Бусыосы туэ 72 процент ӟеч элита кидыс киземын. Таӵеез асьме шаерын ноку ӧй вал на. Туэ гырон-кизён кылем арынлэсь вазьгес кутскиз, но уйпал ёросъёсын зоръёсын сэрен соос ӝегазы.

Тол вылэ кизем юос 14,7 сюрс гектарез быризы. Шугенгес кезьытэз чидаз чабей. Соос интые киземын вал вазь вуись юос. Вань кизёно муос луизы 1 миллион 70 сюрс гектар, кылем арынлэсь 1 сюрс 500 гектарлы ятыргес. Таин ӵош ик кизён бусыоссэс кулэстӥзы Грак, Камбарка, Сьӧлта, Сюмси, Дэри, Кияса, Сарапул ёросъёс.

2011-тӥ ар возьматӥз: ю тысь мултэс котэн КЗС-ъёс сое шертыса-куасьтыса дыраз ӧз вуттэ. Соин сэрен ужась комбайнъёс сылоно луылӥзы. Туэ ужез мукет сяменгес радъяно — дежурство нуоно.

Али юосты аран-кутсанэн ӵош мыно пудо сиён, муосты тол кизёнлы дасян, етӥнэз утялтон, бушам бусыосты гырон. Сьӧраз ик вуоз тол вылэ кизён но. Соин министр, кизер эстӥськонлы субсидиен юрттэт курыса, Президентлы вазиськиз.

Туэ нырысетӥ июльлы таза сюро пудо 384 сюрс йыр люкаськиз. Кылем арынлэсь 3,2 процентлы ятыргес. Скал уллё 146 сюрс йыр. Ӧжытаклы миымлэсь ичигес ке но, йӧл кысконзэс гурт предприятиос, кылем арын ӵошатыса, 7,6 процентлы йылэтӥзы. Тужгес но трослы Вавож ёрос — 14,3 процентлы, глазъёс — 10,4 процентлы, эграос — 11,3 процентлы.

Йӧлэз будэтыны юрттэ пудоез ӟеч выжыен воштон. 6 толэзь ӵоже асьме хозяйствоос вузазы 1 сюрс 580 йыр ӟеч выжы пудо, кылем арынлэсь 511 йырлы тросгес.

Туэ 4,3 процентлы ӧжытгес поттэмын сӥль. Но кивалтӥсьёс оскыто: толлы матэктыса, югдур воштӥськоз. Ужпум пуктэмын: котькуд йыр пудолы 25 центнер сиён дасяно но пудо гидъёты толйыны тупатоно.

Президент кивалтӥсь­ёсты куриз саклык висъяны кизёно бусыосты паськытатонлы, пудо уллёез утёнлы. Нырысь ик юрттэт сётӥськоз сыӵе эштосъёслы, кудъёсыз та куронъёсты быдэсъялозы.

 

18 школалы ӧжытгес…

Дышетонъя но наукая министр Андрей Кузнецов ивортӥз: выль дышетскон арлы дасяно 637 школаез. Со кылем арынлэсь 18-лы ӧжытгес. Та школаосты ворсаны чакламын я дышетскисьёс ӧвӧлэн, я юртъёс куашкан калэ вуэмен. 6 школаысь пиналъёсты нуллозы мукет дышетсконние.

Школаосты дасянлы туэ республикалэн бюджетысьтыз висъямын 1 миллиард 700 миллион манет. Туэ 6 выль школа пиналъёслы ӧсъёссэ усьтоз.

Нылпиосты нуллон вылысь министерство басьтӥз 29 автобус 30 миллион манет тыр. Озьы ке но дышетскисьёсты нуон-ваёнъя югдур пумозяз вуттымтэ. Тани Эгра ёросысь 18 автобус пӧлысь ньылез ГОСТ-лы уг тупа. Та ёросысь дас пинал школае пыдын ветлоно луэ сюресъёс уродэн. Вань сыӵе сюресъёс Красногорск ёросын но.

— Сюлмаськыто куд-ог ёросъёсысь дышетскон юртъёс, — шуиз министр. — Тани Сьӧлта школа борды 96 дышетскисьлы чаклам юрт пуктэмын 2011-тӥ арын гинэ. Нош дышетскон корпуслэн фундаментэз куашканы кутскемен, кышкытлык кылдытэ ини.

25-тӥ июльлы дышетскон арлы дась луэмез сярысь ивортӥз 374 школа. 15-тӥ августлы школаосты кутон ужъёс ваньмыз быдэстэмын луыны кулэ ини.

Сюлмаськытэ дышетӥсь­ёслэн тырмымтэзы. Та дырлы 1 сюрс 787 специалист уг окмы. Уг тырмо англи кыл, информатика, крезьгур, ОБЖ, химия предметъёсъя дышетӥсьёс но нылпи садъёсын ужасьёс.

Кивалтӥсьёс утчало егит специалистъёсты школае кыскон амалъёс. Та ласянь адӟем карымон ужало Вотка ёросын. Татысь администрация школае ужаны лыктэм специалистлы 10 сюрс манет сётэ, толэзьлы быдэ уждунэз вӧзы 5 сюрс манет ватсаса тыре, 2 сюрс манет висъя улон инты понна.

Иван Аркашев.

Удмурт Дунне
By Удмурт Дунне Июль 31, 2012 10:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<