Берлань ум — азьлань вамыштӥськом!

Удмурт Дунне
By Удмурт Дунне 4 июля, 2012 10:48

Берлань ум —  азьлань  вамыштӥськом!

Герберын ӝук вӧсян но веръян - шоу ӧвӧл.

Вашкала вакытэ, Гербер, Виль но мукет праздникъёсты пусйыса, удмуртъёс туж вӧсясько вал. Асьсэ инмаръёссылы вазиськыса, ваньзэ ӟечсэ курылӥзы. Та ваньмыз быдэсмоз шуыса, зэмзэ оскизы.

Республикаямы та нуналъёсы али ке но вӧсяськон нерге каро. Но ваньмыз со шоулы гинэ уг пӧрмы меда? Туристъёс понна гинэ дауртонлы уг укша-а?

Е. Агафонова.

Дэри ёрос

 

Андрей Ураськин, «Дэмен» огазеяськонлэн кивалтӥсез:

— Адями сыӵе бадӟым удмурт ужрадъёсы «шоу шуонэз» адӟыны лыктэ ке, сое гинэ синйылтыны выре ке, валамон ни, Гербер но, Виль но солы маскаръяськон, сям-йылолэз тӥям-пожам кадь гинэ йӧтэ. Нош адями, оскыса, вӧсяськон сярысь сюлмаськыса, ӟечсэ курыса, вуэ ке, со татын но Инмарез буре вайыны уг вунэты. Черке мыныса гинэ, уг вӧсясько ук — асьсэ доразы но, сюрес вылын но курисько. Озьыен, оскись адями праздник дыръя но «остэ, ӟеч кар» шуыны уг вунэты.

Туэ Дэри ёросысь Лудорвайын ортчем Гербер пумысен тазьы верасал. Ӝук вӧсясьёс вӧзын ачим но сылӥ, кылӥ-адӟи куриськемзэс. Вань сюлмысь вазиськизы соос Инмарлы. Соин ик номыр уродзэ вераны уг быгатӥськы. Нош вӧсяськон вакытэ ик возь вылын мынӥсь шулдыръяськон сярысь шуо тазьы. Туала арын нокызьы но сотэк уг луы. Вашкала дыръя но Гербер но Виль праздникъёсы адямиос куспазы ӵошатсконъёс радъяллязы, кырӟазы-эктӥзы. Со туннэ улонлэн но куронъёсыз. Шулдыръяськонэз воксё быдтӥмы ке, калык нош уз вала. Али уго адямиос празднике мылкыдзэс кисьтыны-юнматыны-задоръяськыны лыкто.

 

Татьяна Шкляева, Дэри ёросысь «Лудорвай» музей-заповедникен кивалтӥсь:

— Асьмеос азьлань ва­мыштӥськомы, берлань ум мынӥське. 18-тӥ-19-тӥ дауръёсы мукет улон, мукет сям-йылолъёс вал. Туннэ дунне шоры учкон но воштӥськемын ни. Асьмелы, вашкалаосмес, милемлы улон сётӥсьёсмес, тодэ вайыса, сям-йылолъёссэс чакласа, азинскыны косэмын. Нош азинскон воштӥськонъёстэк нокызьы уг ортчы. Вашкала сямен гинэ Герберез но Вилез ортчытӥмы ке, отчы арлыдо калык гинэ люкаськоз. Озьыен, егитъёсты кыскеммы уз луы. Нош пинал калык адӟем ӧз кары ке, сям-йылолъёсмы воксё вунозы. Соин ик мон пичи но пумит ӧвӧл праздникъёслы туала шӧм пыртонлы.

 

Вячеслав Лаврентьев, Алнаш ёросысь Кузёбай гуртысь сям-йылолъёсты утись, Герберын огез ӝук вӧсясь:

— Ӝук вӧсян — воксё но шоу ӧвӧл. Тазьы малпасьёс мылкыдме ик тӥяло. Шуд, тазалык, ӟечсэ, умой гужем курыса Инмарлы вазиськонэз сюлмысьтымы чирдӥськомы. Кылсярысь, огез вӧсяськонмы таӵе:

«Остэ, Инмаре, Кылдысинэ, Квазе, Узя воршудэ!

Капчи ардэ сёт, шуныт-небыт зордэ сёт, юдэ сёт, животтэ сёт!

Инмаре, Кылдысинэ, Квазе, Узя воршудэ, тыллэсь-пулэсь, висёнлэсь, котьмар черлэсь возьма!

Со шудэз куриськом, Инмаре, Кылдысинэ, Квазе, Узя воршудэ!»

Та сяна но, мукет куриськонъёсты вераськомы. Шудон-лӧптылон ӧвӧл со. Маскаръяськон понна гинэ вӧсяськиськом карисьёсты утись уг яраты.

Лек малпасьёс вань: малы, пе, ӝукез туала арын вӧсялод на? Люкаськы, шулдыръяськы, ӵошен си-ю но, ужез быроз, пе. Вашкала дыръя, уно сюрс аръёс талэсь азьвыл, одӥг ужрадэз но, одӥг шулдыръяськонэз но вӧсяськытэк ӧз мытылэ. Со сям-йылолъёсты асьмеос ӧм кылдытэ, соин ик асьмеос сое быдтӥмы ке, чик умой уз луы.

Дасяз Елена Фёдорова.

Удмурт Дунне
By Удмурт Дунне 4 июля, 2012 10:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<