Арлы быдэ — кӧня скал?

Удмурт Дунне
By Удмурт Дунне Июль 31, 2012 10:50

Таяз арын вузъёсы дышетскыны пырисьёсты воштӥськонъёс возьмало.

Озьы уксёен дышетскыны пырем абитуриентъёс кулэ тырыны сомында ик, кӧня висъя кун бюджет чотын дышетскись студентъёсты визьманлы. Соин сэрен куд-ог вылӥ дышетсконниосын дунъёс 1,5 поллы будӥзы.

Элькунысь вузъёсы ог 50 сюрс заявлениос сётэмын. Жаляса верано, вань абитуриентъёслы дунтэк дышетскыны луонлык уз сюры. Котькуд ар бюджет интыос но ичияло, выль законъёс пото. Озьы арысь аре вылӥ дышетсконниосы пырыны но шуггес луэ.

Абитуриентъёс кылем арын сямен ик заявление вить университетэ но отысь куинь факультетъёсы сётыны быгато. Воштћськон возьма сиротаосты. Азьло соос, кулэ предметъёсъя ЕГЭ гожтыса, котькуд дышетскон интые конкурстэк пырыны быгато вал. Нош али льгота амалэн курон одӥг вузысь одӥг факультетэ гинэ сётыны быгатозы на. Мукет интыосы сиротаос огшоры абитуриентъёс кадь вожвылъяськонэ пыриськозы.

Али дырлы котькуд университетын шараямын ини дунын дышетскон понна тыронъёс. Табере нылпиоссэс дышетон понна анай-атайёслы котькуд ар 44 сюрсысен 127 сюрс манетозь уксё люкано луоз. Тужгес ик дуно усёз технической факультетъёсын дышетскон, малы ке шуоно та специалисъёсты дасян туж дуно усе — араз 112 сюрс манет пала. Ӧжытгес тырозы биология, химия но эмъян удысэ мынӥсьёс — 70 сюрс манетлэсь ятыр. Но али дырлы тужгес дунтэм луо гуманитарияя профессиос — 60 сюрс котырын. Куд-огезлэн дунъёссы трослы ӧз будэ, малы ке шуоно азьло дыре но соос туж ик пичиесь ӧй вал. Со мувӧй но газ поттонъя, рекламая, юридической факультетъёс. УдГУ-ын, кылсярысь, информатикая специальность 63 сюрс манетлы будэмын ке, мувӧйя но газъя факультетын дышетскон ньыль сюрс манетлы гинэ йылэмын.

Но огъя дунъёс специалистъёсты дасян бордысь гинэ уг пото. Соосты вузъёслэн учредительёссы пукто на. Тани УдГУ-ын но ИжГТУ-ын огвыллем ӧрын мынӥсь факультетъёсын дунъёссы ог-огзылэсь кыдёкын ӧвӧл, малы ке шуоно соослэн учредительзы одӥг — Россиысь Дышетонъя но наукая министерство. Сельхозакадемилэн йыр вадьсаз сылэ Россиысь Гурт удысъя министерство, нош Медициная академилэн — Россиысь Тазалыкез утёнъя министерство. Озьыен, та ньыль вылӥ дышетсконниосты ӵошатыса, ИжГСХА-ын дышетскон ваньмызлэсь дунтэм усе. Кылсярысь, УдГУ-ысь экономикая но менеджментъя факультетын дышетскон 60 сюрс манет усёз, нош академиын 44 сюрс манет. ИжГТУ-ысь теплоэнергетика но теплотехника специальностьёсын дышетскон сылэ 112 сюрс манет, нош ИжГСХА-ын 67 сюрс манет кисыысь поттыны кулэ.

— Тани удмурт филологияя факультетэ кылем аръёсы ми кызьы но озьы шедьтылӥмы дунын дышетскисьёсты. Таяз арын ӧтьыны но кышкаськом. 60 сюрс тырыса, кин меда лыктоз? — вера УдГУ-ысь экономикая, коньдон ужпумъёсъя но инвестициосъя проректор Герман Сергеев.

Но удмурт филология факультетын али тунсыко югдур кылдэмын. Татчы 50 заявление сётэмын, бюджет чотын дышетскыны кылдоз 32 муртлы. Маке муген 50 абитуриентъёс пӧлысь тросэз мукет факультетъёсы пырыны мылкыд уг каро ни — нокытчы документъёссэс сётӥллямтэ. Иське, кинлы ке но ӵектозы дунын дышетскыны? Кӧня скалзэс вузано луозы гуртын улӥсь анай-атайёс яратоно пиналзэс визьман-будэтон понна?

Бадӟым курсъёсы выжисьёс, дышетсконлэсь дуноямзэ тодыса, сюлмаськыны кутскизы: ми, пе, кытысь уксё утчалом? Буйгатске, валэктӥзы таослы, таӵе дунъёс туэ вузъёсы пырисьёслы пуктэмын. Азьло дышетскыны лыктэм студентъёс тырозы сомында ик, кӧня пуктэмын вал азьло аръёсы. Озьы ик заочно амалэн дышетсконлы дунъёс будэмын ӧвӧл.

Кылдэм югдур шуккоз троссэ кун университетъёсты, уго абитуриентъёс мынозы отчы, кытын дунтэмгес. Нош али Россиын трос кунлэн луисьтэм вузъёс. Соос асьсэ понна уло, выльдӥськонъёс улэ уг на шедё. Соин дунъёссы шӧдскымон пичигес луыны быгато.

Дунъёс будэмен, УдГУ 30 процент абитуриентъёссэ ыштэ. Озьы ке но дышетскисьёсты ас бордаз кыскон понна университет мукет амал шедьтӥз. УдГУ-лэн ректорез Галина Мерзлякова верамъя, визьлюкъёсты утьыны тыршозы. Кылсярысь, кин оглом ЕГЭ-ын 200-лэсь тросгес балл люказ но семестр пумын экзаменъёссэ «4»-лы но «5»-лы гинэ сётоз, со дышетскон дунлэсь 50 процентсэ тыроз.

Дышетон но наука удысысь вылӥ чиновникъёс верамъя, дунъёс будэмын одӥг арлы гинэ. Азьланяз адӟом, пе, мар пӧрмоз. Таиз ар возьматоз, кытын законлэн ляб палъёсыз. Озьы кивалтӥсьёс ватсанъёс пыртыны но югдурез умой пала выжтыны тыршозы.

Озьыен, Удмуртиысь университетъёсын дышетскон дунъёс туж матын луизы Мускоысь но Питерысь вузъёслэн быдӟалазылы. Уз кошке-а асьме егитъёсмы бадӟым городъёсы?

Мария Векшина.

Удмурт Дунне
By Удмурт Дунне Июль 31, 2012 10:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<