Second hand лукбук

Удмурт Дунне
By Удмурт Дунне 27 июня, 2012 11:06

Second hand лукбук

Света.

Туала вакытэ second hand кылтэчетэз тодӥсьтэмъёс ӧвӧл ни, дыр. Западысь ваем нуллэм дӥськут кӧня гинэ куанер студентэз ӧз утьы ни. Татын ик тыныд Bershka, Topshop, H&M… Мешокъёс пӧлысь кыӵе гинэ тодмо брендъёсты уд адӟы.

Ӵемысь сэкондъёсын чылкак выль дӥськут шедьтыны луэ. Юрдыны эн ик малпалэ. Та дӥсь рос-прос сузямын-миськемын, нош дуныз, базарысеныз ӵошатыса, кӧня ке поллы ичигес. Тае эскерон понна ми юромо Ижысь сэкондъёсы пырано кариським.

Ксюша.

Сэкондъёсты сурано ӧвӧл сток-магазинъёсын. Сэконд-хэндъёсын нуллэм дӥсез вузало (сое ӵемысь весэн мертаса сёто), стокъёсын — выльзэ. Куддыр стокъёсын нуллэм дӥсен вуз каро, но со дӥсь яке дуно маркалэн луыны кулэ, яке туж чебер но тузӥ. Ачим стокъёслы дырме уг быдтӥськы. Малы? Луэ ук кык поллы дунтэмзэгес басьтыны.

Ми пыримы одӥгаз сэконд-хэнд галереяе. Нырысь дӥсямы Светаез. Светалэн соку ик син шораз йӧтӥз синмаськымон «курег кук» выллем пужыё ӵужалэс штани. Со вӧзы бырйим тӧдьы дэрем но сыӵе ик ӵужалэс-курень жилетка. Та классика образ укыр мӧзмыт медаз луы шуыса, итӥмы на сьӧд бубыли но тумошо очки. Озьыен:

Костя.

Штан — 200 манет,

Дэрем — 150 манет,

Жилетка — 200 манет,

Туфли — 130 манет,

Бубыли — 30 манет,

Очкиез аслаз.

Ксюшалы романтик тус тупагес. Со понна ми бырйимы лемлет гужем дэрем, пеймыт-лыз кардиган. Татчы тупасал на кыӵе ке сумка, но, жаляса верано, ӧз сюры. Озьыен, Ксюша вылын:

Дэрем — 200 манет,

Кардиган — 250 манет,

Жильы — 40 манет,

Сапегез аслаз.

Костя понна ми туж кема бырйиським. Нырысь ик, со понна пичи размеръёс уг сюро. Сэкондъёсын фаворитъёс — L но XXL. Таиз умой бадӟым размер нуллӥсьёс понна. Костялы куртка гинэ бырйыны быгатӥм.

Куртка — 550 манет,

Кылемез аслаз.

Эсэпланъёс лэсьтыны луэ таӵе: сэконд-хэндын дӥсь бырйыны быгатыны кулэ. Вань ке шӧдонды, эн возьдаське, одно ик пыралэ! Кышкаськоды ке янгышаны, уд ке валаське вылтустэс, дышем бутикъёсы ветлэ. Потэ ке яркыт, тунсыко луэмды — копаське сэкондъёсын! Но тодады возе: быдэс гардеробды отысь медаз луы. Сэкондысь дэремдэс мед чеберматоз Арманилэсь дуно сумка.

Дарали Лели.

Удмурт Дунне
By Удмурт Дунне 27 июня, 2012 11:06