Ӝожомон вунэ, шумпотон кыле

Удмурт Дунне
By Удмурт Дунне 18 июня, 2012 09:15

Ӝожомон вунэ, шумпотон кыле

С. Шабардина.

Светлана Вениаминовна Шабардина — вылӥ категориен врач, эмъян удысын куамын арлэсь ятыр тырше ни, республикаысьтымы сюлэм но сэр висёнъёсъя центрысь профилактикая ёзэн кивалтэ. Кардиолог, ревматолог.

— Кылэме вань, Тазалыкез утёнъя министерство тӥледлы валтӥсь ревматологе но инты ӵектэ вал…

— Вал сыӵе ӵектон. Но мон соку ик пумит кариськи. Тодӥ ук: соку тросгес пуконо луоз кабинетын документъёсын — лыдпусъёс, статистика пушкын бугыръяськон мыным укыр мӧзмыт потэ.

Туж яратӥсько калык пӧлын луыны! Тыршемелэн емышез но соку ик адӟиське — нунал куспын кӧня ке муртлы юрттыны быгатӥсько ни ке, талэсь дуноез мон понна номыр ӧвӧл кадь. Бен, висёнъёсты алонын но статистикалэсь уд пегӟы. Но татын сюлэмыя ужез но тачак. Профилактикаын мон 2000-тӥ арысен ни. Милям туж зол радъямын Тазалыкъя школамы. Вань мылкыд карисьёс отчы дунтэк ветлыны быгато. Валэктӥськом, кызьы сюлэм но сэр висёнъёсты алоно, кызьы адями аслыз ачиз юрттыны быгатоз, шугектэмзэ шӧдӥз ке.

Шаерысьтымы ваньмаз ик ёросъёсы одӥг пол гинэ ӧй вуылы ни. Нимысьтыз пумиськылӥськом отысь эмъясьёсын но, калыкен но. Берло дыре гуртын улон чылкак воштӥське кадь. Тросэз больницаос куашкан калэ вуэмын ни вал — али котькытын тупатъян-выльдон ужъёс мыно. Нимысьтыз саклык висъяське висёнъёсты алонлы но — районъёсысь эмъясьёс талы дышо ни кадь. Сюлэм но сэр висёнъёсын нюръяськон уката ӟеч радъямын Дэри, Дэбес, Балезино, Вотка, Якшур-Бӧдья ёросъёсын. Калыкен пумиськонъёсты, ёрос больницаосын сяна, пичи гуртъёсын но ортчытъяло — библиотекае, клубе люкало. Ми но, кардиоцентрын ужасьёс, таӵе пумиськонъёсы шумпотыса мынӥськом.

Октябрёнок.

Сюлмаськытэ соиз гинэ: калык асьмелэн уг вала на, висёнэз алыны трослы капчигес но, дунтэмгес но шуыса. Тазалыкъя центръёс-школаос асьмелэн дунтэк ужало — кунгож сьӧрын таӵеез кемалась ӧвӧл ни. Одӥгез дорам йӧнатӥськем нылкышно ог дасо ар пала Израильын улӥз. Алигес берытскем, выльысь дорам вуиз. Ой, тау, шуэ, тӥ ас вакытаз сомында ӵектонъёс сётӥды вал — кунгож сьӧрын со ваньмыз уката кулэ луиз. Угось ӟепад шальтыртӥсез ӧвӧл ке, отын эмъясьёс доры озьы гинэ уд сюры.

Люкетэ на возьдаськон сяммы. Висеммы сярысь вераны малы ке ум дӥсьтӥське, серемес адӟиськом кадь потэ, лэся. Одӥг-ог вуылӥсько Башкортостанэ, Татарс-танэ. Отын быдэс семьяен эскериськыны лыкто — ваё нуныоссэс но, пересь-ёссэс но. Вуо егитъёс но — ӝожтӥськонъёссы ӧвӧл ке но, эскере, куро. Туж шонер со. Адями тазалыкез сярысь ачиз ӧз сюлмаськы ке, нокыӵе эмъясь но юрттыны уз быгаты. Соин ик аслэсьтыд одӥг-ог ке но юано: малы мон сокем ӝог жадисько, малы ялан кӧлэме потэ, малы йыры висьылэ… Америкаысь тодосчиос эскеронъёс ортчытӥллям: кинъёс кемагес уло — улонысь чеберзэ гинэ адӟисьёс (оптимистъёс) яке котькуд чыры-пыры пумысен но сюлмаськисьёс (пессимистъёс)? Ваньмыз эсэпезъя, пе, луыны кулэ. Оптимистъёс тросэз шоры чиньы пыртӥзы учко, висёнъёссы пумысен сокем уг куректо, эмъяськисьлы вазиськонзэс берлолы кельто. Нош пессимистъёс укыр куректо, керӟегъяськонъёссы-сюлмаськонъёссы уката зӥбо, тазалыксэс куашкато.

— Нош тӥ кудъёсыз пӧлы пыриськоды?

Студент аръёс.

— Адями пӧлын ужасько бере, лулӟылыса пукыны дыр ӧвӧл. Куддыр сокем жадемын ни, но тус вылам со медаз адӟиськы. Туж секыт висисьёс но вазисько, соосты буйгатыны быгатоно, сюлэмазы сюрес шедьтоно — соос азьын кунэрес тусын пукыны уг яра! Ӵемысь луо учыръёс: ваньзэ лэсьтӥськод ни кадь, висён мед чигналоз шуыса. Нош адямилэн, шуом, вирзӥбетэз уг лэзиськы. Таӵе дыръя валаськод: пушказ маке но туж сюлмаськытӥсез пуке. Ойдо, гыдыке, вераськом, мар тонэ сокем сюпсе — буйгатыны вырисько сое. Озьы психолог но кариськытэк уг луы. Куд-огезлэн семья кусыпъёссы тэшкамын — кузпалэныды ӵошен лыктэ ай, кенешом, шуисько. Мукетъёсыз нылпиосынызы огкыл шедьтыны уг быгато.

Секыт висись вань ке, доре бертыса но, со сярысь вунэтыны уг луы — литератураын бугыръяськиськод: мар бен соин сыӵе луэмын? Ӵош ужась эшъёсыдлы уйшоре но куддыр жингыртӥськод на — соослэсь малпанзэс юаськод. Диагноз пуктон — капчи уж ӧвӧл. Со понна опыт луыны кулэ. Уката умой, вӧзад ӟеч дышетӥсьёсыд вал ке, ужан коллективед кужмо ке. Мыным та ласянь туж удалтӥз. Табере мон доры егитъёс, визь-кенеш юаса, вазиськыло ни. Консультациос ортчытъясько Нырысетӥ элькун больницаын. Но ачим но мукет специалистъёслэсь малпанзэс юаны уг кепыраськы. Угось огкыткетын, одӥг мылкыдын ужамлэн пайдаез тросгес. Эмъян удысын визьмояськыса пукыны дыр ӧвӧл — висёнъёс туж ӝог муре пыӵаны быгато. Одӥгез заведующиймы шуэ: вае дорам «куиньчиез» дышетскыны. Но со котькыӵе учыръёсысь потон амал шедьтыны, ӝог малпаськыны мед быгатоз. Таӵе адями профессоръёслы но, визь-кенеш курыса, жингыртыны уз кепыра, шуге-леке вуэм муртлэсь ӵыжы-выжыоссэ но бызьылӥсь кароз — одӥгъёсыз анализъёссэ мед нуозы-ваёзы, мукетъёсыз ӟеч кылынызы мед шунтозы. Нош куд-ог «витьчиос» ас тодон-валанъёссылы гинэ оскиськисько, йӧнато литератураысь лыдӟемъёссыя, лекциосын кылэмъёссыя. Но котькуд адями пӧртэм сямен чида висёнъёсты, эмъянын котькыӵе но малпамтэ учыръёс луыны быгато.

Пиосыныз.

— Калык пӧлын ужан адямиез туж жуммытэ. Кызьы тӥ утиськиськоды жадёнлэсь?

— Нырысь ик, мынам хоббие — уж. Та ласянь мон туж шудо. Отпускын дыръям но, уже потатэк, уг чидаськы. Кыкетӥез, бордам туж валась семьяе. Буйгасько на инкуазьын, яратӥсько дуннеез котыръяны…

Ачим Дэбес черкогуртысь луисько. Атае, Вениамин Дмитриевич — Инмарен сётэм дышетӥсь. Монэ агаеным ялан малпаськытэ вал: малы зоре, малы лымы усе… 84 арессэ тырмытӥз ни, «малыосын» али но жуммытэ на. Туж яратэ лыдӟиськыны. Милемлы но книгаослы яратон пыӵатӥз. Вить арескам шалтыр лыдӟиськи ни. Школае мынӥ гинэ — мӧйыослы книгаос борды басьтӥськи. Али но чассэ-кыксэ киям книгаен ортчытћсько яке Интернетын пукисько. Атае физкультурая но ужъя урокъёсты нуылӥз. Дораз дышетскемъёс али но тау карыны дораз вуыло: улонын, пе, тросэзлы солэсь адӟем кариськом. Атае туж яратэ пулэсь, кортлэсь пӧртэм арбериос бичаны-лэсьтыны. Чыры-пырыосын вырон мылкыдыз паласькем братэлы но. Со — стоматолог. Дораз республикаысьтымы тодмо адямиос но йӧнатӥськыны ветло.

Анае, Таисия Даниловна, быдэс улонзэ нылпи врачын ужамын. Кема аръёс ӵоже со быдэс ёрослы огназ вал. Со — Удмуртиысь дано эмъясь, Удмуртиысь тазалыкез утён удысысь отличник, пусъемын Ужысь Горд Знамя орденэн но трос медальёсын. Быдэс СССР-ын устоеныз педиатрен лыдъямын, странаысьтымы нылпи врачъёслэн съездъёсазы докладъёс лыдӟемын. Али Дэбес черкогуртын солы сӥзем буре ваён пул шуккон сярысь верасько.

Жаляса верано, 77 аресказ кулӥз — лек пыктос быдтӥз. Татчыозь буйгатскыны уг быгатӥськы, малы висёнзэ дыраз шараяны ӧм быгатэ шуыса. Но берпуметӥ нуналозяз со юн возиськиз. Котькуд нунал понна шумпотӥсько, шуылӥз. Милемыз но, нылпиоссэ, озьы ик улыны дышетӥз. Уг султылы ни вал: пиосылэсь гитаразэс куриз но э-э шудэ ук! Арганэн но эшъяське вал.

Кужмо, юн сямо луэмез анаелэн пичи дырыныз но герӟаськемын, вылды. Со вордскыку, песянаелы 42 арес вылэм ни. Туж куанер улӥллям. Угось солэсь азьлогес семьязэс кулаке поттӥлям. Куиськон машиназы ваньысь. Та бӧрсьы Украинае но кошкиллям вылэм — ӵап соку кутскем война. Атайзэ но куиньзэ ик агайёссэ фронтэ басьтӥллям. Туж сӧсырмыса бертэм на атаез гинэ, но кема улымтэ ни. Анаелы соку 8-9 арес вылэм. Эшъёсызлэсь, тодмоосызлэсь син азяз кулэмзэс со ноку вунэтыны ӧз быгаты.

Анае шуылоз вал: йыр вадьсытӥ пуляослэсь лобамзэс адӟем бере номыр кышкыт ӧвӧл ни. Бен, война вакытэ ик соос берен Удмурт шаере берытскемын.

Тём пеймытэн-а, кезьыт зор-котэн-а — со шугектэм нылпиослы юрттон вылысь палэнысь гуртъёсы но потэ вал. Нош сюресъёс ӧвӧл, вал уробо шальтрамын. Со гинэ мар, монэн секытэн дыръяз бадӟым кӧтын но гуртъёстӥ ворттылэмын на. Анай йӧлын ик мыным пыӵамын ни, вылды, гуртъёстӥ ветлон, калыкез эмъян мылкыд.

Радиостудиын.

— Иське, вордскыкуды ик тодӥськоды ни вал, эмъясь луоды шуыса?

— Ваньзы озьы шуо вал. Но мынам сямы ваменэсгес вылэм, лэся. Котькуд пичи ныл сямен ик шуисько вал: мон артист луо! Собере — телеведущей. Со вакытэ потӥз КВН. Одӥгеныз эшеным бускельёсмес люкаськом но, командаос кылдытыса, ӵошатсконъёс радъяськом вал. Нылпиосты гинэ ум, мӧйыосты поттӥськом! Али та воксё осконтэм кадь потэ ни.

Мар но ум малпаське вал! Со улонам бӧрысь туж пайдаен берытскиз. Институын мон культорг вал, ужын но концертъёс пуктылӥськом, видеофильмъёс дасялляськом. Школаын дышетскыкум, туж яратылӥ сочинениос гожъялляны. Литературая олимпиадаосын одӥг пол гинэ вормисе ӧй потылы. Но журналистэ мынонлэсь алӥз литератураен дышетӥсе ик. Шуиз: гожъяськон мылкыдыд ӧз кысы ке, бӧрысь но сое ӧръяны быгатод. Нырысь мын эмъясе, отӥяз — адӟод. Тау школаысь дышетӥсьёсылы тырмыт тодон-валан сётэмзы понна — институтэ капчиен пыри, дышетскон но секытэн ӧз сётӥськы.

Туж шонер визьмам соку литературая дышетӥсе но. Табере мон эмъясь, но газет-журналъёсы ӧжыт уг гожъяськы, радиое, телевидение висёнъёсты алонъя вераськыны ӧтчалляло, Тазалыкез утёнъя министерстволэн сайтаз вуись юанъёслы валэктонъёс сётъясько. Гуртъёсы потакум, куд-огез шуо: ми тӥледыз телевизор пыр адӟим вал. Таӵе дыръя шумпотоно: иське, калык кылэ-учке передачаосты, верамъёсы пӧлысь маке-маке йыразы но кыле, вылды.

— Нош малы одно сюлэм но сэр висёнъёсъя специалист луиды?

— Монэ котьку но бордаз кыске вал вылез, тунсыкоез — та сямы потэмын анай-атае бордысь ик. Милемыз кыӵе но городъёсы соос ӧз нуллэ. Юало ни вал: яке выль диван басьтом, яке Ленинградэ ветлом? Ми, конешно: Ленинградэ! Озьы соос бырйыны луонлык сётылӥзы. Быдэс Совето Союзэз соку котыръямы кадь.

Мон студент аръёсы кардиология, ревматология республикаямы выль удыс вал ай. Сое ӝутон борды соку-соку гинэ басьтӥськизы туж кужмо эмъясьёс — монэ бордаз та туж кыскиз. Тазалыкез утёнъя министерствоын бырйыны косӥзы, кыӵе больницае уже интыясько. Мон шуи: самой умояз — кардиоцентре. Иське, пе, мын, отысь валтӥсь врачен ачид вераськы. Мынӥ, документъёсме учкиз — кутӥз.

Талэсь азьло мон 1 ар но ӝыны ужаса вуттӥ ни вал Кез ёросысь Чепца больницаын валтӥсь врач луыса. Мединститутэз йылпумъяме бере монэ отчы ыстӥзы вал. Соку ик отысь комсомол огазеяськонэн кивалтыны оскизы. Кужымме-быгатонлыкъёсме валан понна та больницае мыным одно вуылоно вал. Отын транспорт ӧй вал, лаборатория ӧз ужа, рентген, пинь йӧнатон тӥрлык вужмемын — ваньзэ шедьтӥм-выльдӥм. Минздраве туж ӵем йыгаськылӥ.

— Сыӵе ӟеч специалистэз лэземзы уг поты ни вал, дыр?

— Тросэз песянайёс-песятайёс асьсэлы кен карыны турттыса ветлӥзы — медам гинэ кошкы ни гуртысьтызы. Балезиноысь пилы бызи но лушкем кошки отысь. Миша дорамы ик пиньзэ йӧнатыны ветлӥз, Чепцаын ӵыжы-выжыосыз уло. Со вискын монэ синйылтэм. Синмаськи гань-ганезлы. Мон солы котьку оскиськыны быгатӥсько, нылпиослы туж бадӟым саклык висъя. Экономист со, котьмае радызъя, дыртытэк но тыро-пыдо лэсьтэ.

Бадӟымез пимы, Дима, атаез выжые кошкемын — лыдпусъёсын туж эшъяське. Олокызьы гинэ соосты ватса но, уноятэ но. Программистэ дышетскиз. Пичиез пимы, Андрей, туэ 11-тӥ классэз йылпумъя. Таиз — картэ кадь но, ачим кадь но. Татчыозь уг тоды на: эмъясь яке программист луоз. ЕГЭ экзаменъёссэ кызьы сётоз — та бордысь потоз ини. Ми картэмын ум мерскиське ӵектонъёсынымы-дэмланъёсынымы — ачиз мед чаклалоз.

— Ваньмон дыръяды мар кариськоды?

— Нош луыло-а сыӵе дыръёс? Куддыръя пиосме но телефон пыр гинэ чакласько. Вань сад-бакчамы. Но таин ушъяськеме чик уг поты. Ваньмызлэн сямен ик, отын будо улмопуос но, чияпу-сутэрпуос но. Куддыр емышъёссэс но ваньзэ ум бичаське — тылобурдоослы кельтӥськом. Дэбесын бакчамы туж бадӟым вал — пичи дырысен отын кӧня ужамын! Бакча емышмес вузаны но поттылӥм — со коньдонэн собере пӧртэм городъёсы ветлӥм. Соин ӵошатыса, таяз сад-бакчаямы вырон луоен шудэм кадь гинэ потэ на.

Пиосмы пичигес дыръя зарезь дуре ӵемысь ветлылӥм, будӥсь мугорлы шунды кулэ, шуыса. Асьме дорын со, котьма ке но, уггес тырмы. Али ӵемгес вуылӥськом Дэбес палъёсамы. Отысь вазенгес кошкемын ни ке но, вордскем палъёс бордазы туж кыско. Инкуазь нош отын выжыкылын кадь потэ. Быдэс семьяенымы я чорыганы Чупчи дуре потӥськом, я сӥль пыжыны Байгурезе тубиськом. Атаймы вань нюк-гопъёслэсь нимъёссэс тодэ, валэктэ, кытысь соос потэмын. Кыӵе ке гуртэ потӥськом ке, ачим но валатэк юалляськыны кутскисько: кызьы гуртты кылдэмын, малы озьы нимаське… Уг тодо ке — туж паймисько, коть пӧялэ ни, курисько. Малпасько, топонимъёсын ваньмы тунсыкъяськыны кулэ. Вунэтыны кулэ ӧвӧл кыдёкысь но матысь ӵыжы-выжыосмес но. Али пиосылэсь кури: лэсьтэ, пожалуйста, выжы писпумес — медам вунэтэ вашкалаосмес.

Нялтас вераса, анае ласянь песятайме мон умой уг тодӥськы ни. Нош атае ласянез туж љикыт, килы усто вал. Ньыль класс дышетскемез но вал — со вакытэ со туж дунъяськиз. Бен, песянаймы лыдӟиськыны но, гожъяськыны но ӧз быгаты. Ог куатьтон аресказ лыдпусъёсты, букваосты дышетыны выри ик на — пайдаез ӧз луы ни.

Со понна анаелэн песянаез пелляськись вылэм. Дораз, пе, артэ гуртъёсысь но йӧнатӥськыны ветло вал. Антибиотикъёс со вакытэ ӧй вал на. Но со пурысьтамез (плесень) юри будэтэ вылэм. Кызонлэсь — одӥг пӧртэмзэ, нуны ваем нылкышноос шугектон учыръёслы — мукетсэ. Уно адямиез утем сукыр кылёнлэсь — трахомалэсь. Со ик верам вылэм: Тая эмъясь мед луоз. Озьы анаелэн но кияз нуныос бӧрдэмысь дугдылӥллям — секыт учыръёсы кулэ кылъёс сипыртылэм. Марзэ но созэ вераса кельтӥз мыным но.

Вераськонмы буш медаз луы шуыса, кӧня ке ӵектонъёс сётысал на. Вить аресозь нылпиосты эмъюмъёсын гинэ йӧнатыны турттоно ӧвӧл. Турын-куаръёс пайдаё луозы, тросгес ву сётъяно соослы. Шоро-куспо арлыдоосты пӧртэм керӟегъяськонъёслэсь возиськыны курысал. Улон шоры каньылгес учкыны дышетсконо. Ӵемысь луэ озьы: туннэ маке пумысен но туж сюлмаськиськом, кӧня ке дыр ортче, паймиськом ни, малы сокем ӝожомим вал. Нош одӥг керӟегъяськон-пӧсекъян но юнме уг ортчы. Со одно лябӟытэ тазалыкез.

Песянай-песятайёслы дэмласал: вирдэс ӵемгес эскере — сакырзэ, напсэ, орсмемезлэсь ӝоглыксэ. Мӧйымемъя со ӵемысь туж ӝог орсме. Соин ик дэмласал: бичалэ горд йыро клеверез — али со ӵапак вуоз — куасьтэ, нуналаз куинь-ньыль йырзэ, чаез сямен парыса, юэ. Газетэз лыдӟисьёслы кӧльы кадь юн тазалык сӥзисько!

Элина Кумачёва.

Удмурт Дунне
By Удмурт Дунне 18 июня, 2012 09:15