Улослы йыр быръёз калык

Удмурт Дунне
By Удмурт Дунне 1 июня, 2012 13:01

Улослы йыр быръёз калык

Кун Кенешлэн 34-тӥ сессияз.

Та нуналъёсы ӧсъёссэ вӧлъяз Удмурт Республикаысь Кун Кенешлэн 34-тӥ сессиез. Сессие пыриськизы Президент Александр Волков, Правительстволэн Тӧроез Юрий Питкевич, Парламентлэн Тӧроез Александр Соловьёв, Удмурт Республикаысь валтӥсь федерал инспектор Дмитрий Мусин, министерствоослэн но ведомствоослэн кивалтӥсьёссы.

Депутатъёс басьтӥськизы 20-лэсь уно юанъёсты эскерон борды. Соос пӧлысь уноез герӟаськемын Удмурт Республикалэн Конституцияз воштонъёс пыртонэн. Парламентарийёс, кылсярысь, эскеризы «Удмурт Республикалэсь йырзэ быръён сярысь» законлэсь проектсэ. Сое тупатоно федерал законлэн выль куронъёсызъя. Россиысь 19 субъектъёсын президентъёс кивалтӥзы, та дырлы со пӧлысь 4-езлэн гинэ статуссы воштэмын ӧвӧл на. Кызьы тодмо, странамылэн азьвыл Президентэз Дмитрий Медведев ӵектӥз соосты «йыр» («глава») шуыса пусйыны. Таин сэрен, валамон, улосъёслэн Конституциосазы воштонъёс пыртоно луиз.

Сессиын депутатъёс тупен-тупен чаклазы республикамылэсь йырзэ быръёнлэсь радлыксэ. Йыр быръён радъяськоз калыклэн куаразэ сётэмез пыр. Вормисе потэмен лыдъяськоз 50 процентлэсь ятыр куара басьтэм кандидат. Талэсь ичигес куара люкаськиз ке, республикаысьтымы Быръёнъя валтӥсь комиссия ортчытоз кыкетӥ тур. Таяз радэ вожвылъяськозы тужгес но трос куара люкам кык кандидатъёс.

«Удмурт Республикалэсь йырзэ быръён сярысь» законлэсь проектсэ депутатъёс нырысетӥ лыдӟонэн юнматӥзы. Кыкетӥез лыдӟон чакламын 19-тӥ июне. Отын санэ басьтӥськозы депутатъёслэн вань мылкыдъёссы-ӵектонъёссы.

Сессие люкаськемъёс бадӟым саклык висъязы Быръёнъя комиссилэсь ёзчиоссэ быръёнлы. Та комиссилэн ужан дырыз йылпумъяське 4-тӥ июле. Отысь 14 ёзчи пӧлысь 7-зэ ӵектэ улослэн йырыз, нош мукет ӝынызэ — Кун Кенеше шедем партиос, озьы ик калык огазеяськонъёс.

* * *

Сессиын йылпумъянъёс лэсьтӥзы «Удмурт Республикаез 2010-тӥ-2014-тӥ аръёсы азинтон сярысь» программалэн кылем арын быдэсъяськемезлы. Озьы ик чакламын, кылем арын макем пайдаё радъяськиз шаермылэсь бюджетсэ кутон.

— Кылем арын Удмурт Республикалэн бюджетэз ваньзэ-ӧвӧлзэ люкаськиз 44 миллиард 509 миллион 898 сюрс манет, — ивортӥз экономикая министр Михаил Зайцев. — Азьвыл чакламлэсь со 7 процентлы ятыргес усиз. Вытъёс чотын, озьы ик мукет амалъёсъя люкаськем доходъёс 28 миллиард 700 миллион 420 сюрс манет тыр усизы. Расход люкетэз (федерал центре келям уксёез лыдэ басьтыса) — 46 миллиард 302 миллион 192 сюрс манет. Бюджетын дефицит люкаськиз 1 миллиард 792 миллион 293 сюрс манет пала. Со быдэсак ворсамын. Пусйымон: республикалэн кун долгез чакламлэсь трос ӧз люкаськы. Туэ 1-тӥ январьлы со усиз 14 миллиард 110 миллион 995 сюрс манет тыр.

«Удмуртиез азинтон сярысь» программа пумысен мылкыдъёссэ шараяз Президент А. Волков.

— Та программа куинетӥез луэ ини. 2010-тӥ-2014-тӥ аръёслы чакламаз валтӥсь интые потӥз калыкез эмъян удыс. Соин ик та программа йылпумъяськытозь, шаерысьтымы эмъяськонниосын выль оборудование ласянь ӟеч но кужмо инъет кылдоз, — шуиз со. — Со сяна, та программалы луыса пыд вылазы юн сыло ини мукет удысъёс но: дышетон, культура, спорт, гурт удыс. Тыршеммылэн пайдаез син шорын: улонмылэн ӟечлыкез ӝутске, вордскись нуныослэн но лыдзы шумпоттэ.

Елена Никитина.

Удмурт Дунне
By Удмурт Дунне 1 июня, 2012 13:01