Улон ӟечоме, тазалык лябӟе?

Удмурт Дунне
By Удмурт Дунне Июнь 29, 2012 13:49

Улон ӟечоме, тазалык лябӟе?

А. Соловьёв.

Та нуналъёсы Кун Кенешлэн Президиумаз пырисьёс эскеризы сизьымлэсь ятыр ужпумъёсты. Президиумлэн ужаз пыриськизы Кун Кенешлэн Тӧроез Александр Соловьёв, Удмурт Республикая валтӥсь федерал инспектор Дмитрий Мусин, Президентлэн но Правительстволэн администрациенызы кивалтӥсьлэн воштӥсез Владислав Поджаров.

Нырысетӥез ужпум герӟаськемын вал Россиысь кун фондъёслэн Удмурт ёзъёссылэсь ужамзэс эскеронэн. Пенсиосъя кун фондлэн Удмурт ёзэзлэн тыршемез сярысь ивортӥз солэн кивалтӥсезлэн воштӥсез Сергей Блохин.

Туннэ Удмурт шаерын пенсия басьтӥсьёс 416 сюрс. Та пӧлысь 375 сюрс адямилы пенсия висъяське арлыдыз вуэмъя, 41 сюрсэзлы социальной пенсия сётӥське. Мӧйыослы висъяськись пенсилэн шоро-куспо быдӟалаез Удмуртиын та вакытэ 9 сюрс но ӝыны манет вылын возиське. Пусйыны кулэ: арлы быдэ уноя 90 арессэс тырмытэм муртъёслэн лыдзы — туннэ таӵеос шаерамы 2 сюрс пала. Озьыен, улон гумыр кузёме.

— Калык пӧлын валамтэос кылдэмын пенсизэс кун луисьтэм фондъёсы выжтон пумысен, — вера Сергей Блохин. — Милемлы вазиськиз ини 183 адями. Соос ӝожтӥсько, кун луисьтэм фондъёсысь специалистъёс соослы тыро-пыдо валэктон ӧз сётэ шуыса, пенсизылэсь люкаськись люкетсэ кужмысь выжтытӥзы ас понназы ужась фондъёсы.

Та пумысен Александр Соловьёв мылкыдзэ ӧз ваты: таӵе учыръёс луыны кулэ ӧвӧл. Югдурез чакласа возёно. Но Сергей Блохин валэктыны дыртӥз: Пенсиосъя фондлы та ужпумез чакланъя полномочиос сётэмын ӧвӧл. Адями куриськон гожтэ ке, солэсь пенсизэ ми выжтӥськомы мукет фондэ, пусйиз со. Озьыен, та ужпумез депутатъёсын ӵош сэрттоно-пертчоно, калыкмес пӧянлэсь утёно. Матысь дыре ортчоно сессиосын та ужпумез одно ик эскероно.

Мукетыз сюлмаськытӥсь ужпум: шаерысьтымы предприятиослэн кивалтӥсьёссы ӝегато ужасьёссы понна пенсиосъя взносъёсты тыронэз. Пенсиосъя фондэ ӧз вуэ ни 2 миллиард 18 миллион пала отчислениос. Кылем арен ӵошатыса, та лыдпус 353 миллионлы ятыргес. Пенсиосъя фонд азьын пунэме кылёнъёссы тужгес но трос банкротэ вуэм огазеяськонъёслэн. Соос пӧлын бадӟым огазеяськонъёс но. Кылсярысь, предприятиослэн «Ижмаш» группазы — таос ужасьёссы понна 702 миллион манет взносъёс тыриллямтэ, «Буммаш» — 225 миллион манет, Сарапулысь радиозавод — 139 миллион манет. Кызьы пусйиз Сергей Блохин, берпуметӥ предприятиын гинэ шӧдӥське югдурлэн тупатскемез, кылемъёсыз ужасьёссылэн вуоно пенсизы сярысь чик уг сюлмасько.

Россиысь социальной страхованиея фондлэн Удмурт ёзэзлэн кивалтӥсез Надежда Лобанова шараяз мукет но ужпумез: республикаямы демографияя югдур умоя — Приволжск федерал округын азьпал радын мынӥськомы. Улонмылэн ӟечлыкез ӝутске, нош больничнойёсты висъян арысь аре уноя. Сокем ӝог лябӟе шат тазалыкмы? Шӧдӥське: эмъясьёс куддыр больничной гожто таза муртлы но. Яке ӵыжы-выжыоссылы. Берло дыре шараямын больничной листокез суреданъя 2 учыр.

— Таӵе учыръёсты чакласа возёно, — ӵектӥз Кун Кенешысь Бюджетъя, вытъёсъя но коньдон ужпумъёсъя ялан ужась комиссилэн кивалтӥсез Софья Широбокова. — Пенсиосъя но Социальной страхованиея фондъёслэн Удмурт ёзъёсысьтызы валтӥсь администраторъёслы вазиськоно: бюджет коньдон кутонэз соос сакгес мед чаклалозы.

Президиуме пырисьёс мукет ужпумъёсты но эскеризы. Юнматӥзы Удмурт Республикаысь Эскеронъя комитетэ аудиторъёсты, кенешизы Кун Кенешлэн Данъян грамотаеныз пусъёно адямиос пумысен. Со сяна, чакламын но юнматэмын вуоно сессиын эскероно ужпумъёс. Соос дас пала люкаськизы. 35-тӥез чаклам сессия усьтӥськоз 10-тӥ июле.

Елена Никитина.

Удмурт Дунне
By Удмурт Дунне Июнь 29, 2012 13:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<