Удмурт сабантуй

Удмурт Дунне
By Удмурт Дунне 8 июня, 2012 14:22

Удмурт сабантуй

Кырӟа-вера «Зангари» ансамбль.

Та нуналъёсы Башкортостанысь удмуртъёс дорын сабантуйёс ортчыло. Гурт хозяйствоосын тулыс бусы ужъёслы йылпумъянъёс лэсьто, азьмынӥсьёсты сӥлы каро.

Кылем шутэтскон нуналэ Калтасы ёросысь «Кизили» СПК-е пырись (Качак, Чиндэр, Кургак, Каськын) гуртъёсын улӥсьёс шулдыр возь вылэ люкаськылӥзы. «Кизили» СПК-лэн кивалтӥсез Рамиль Насретдинов, удмурт сабантуез усьтыса, шуиз:

— Асьмеос, эшъёс, туж секыт вакытэз ортчыса, каллен пыд выламы султыны ӧдъямы. Чидамы коньдонлы ёрмонэз. Банкрот луимы, пунэмъёсмес пытсан понна трос ваньбурмес вузазы: кеносъёсмес сэрттыса келязы, техникамес, пудомес ыштӥмы. Озьы ке но гуртын улӥсь удмуртъёс чиданы быгатэменызы, огъя хозяйство сярысь сюлмаськеменызы ваньзэ вормизы. Туэ Калтасы ёросамы ваньмызлэсь трос ю-нянь, турын кизим. Инмар сётӥз ке, тырмыт нянь но пудо сиён будэтыны быгатомы шуыса, оскиськом.

Нянь будэтӥсьёслы но пудо вордӥсьёслы уждун тырон пунэмъёссы вань на ке но, праздникъёслы премиос висъямзы луэ ни. «Кизилилэн» ӝутсконэзлы оскон юнманы ӧдъяз.

«Кизили» хозяйствоын 3 сюрс гектар мында гыроно но кизёно муоссы. Со пӧлысь 145 гектар ӟег но 2 сюрс 270 гектар валэс культураосты кизьыны быгатӥзы, кылемаз жалем сиёнлы кукуруза, пудоослы турын будэто. Ваньзэ-ӧвӧлзэ 170 йыр кысконо скал но 331 йыр сюро таза пудо уськытыны йӧндыризы ни. Техниказы но пумен йылэ. Туэ басьтӥзы зернопогрузчик но химпрополка ортчытон агрегат.

Чиндэр гуртын вал но вордо на. Ферма котырын ужаны кутэм сяна, соосын егитъёс ӵошатсконъёсы но пыриськыло. Тани Чиндэр гуртысь егит пи, пудо утись Леонид Муканаев Калтасы ёросын ортчем сабантуйын нырысетӥ инты басьтӥз но 20 сюрс манет утӥз.

Башкортостанысь Бад­ӟым Качак гуртэ удмурт эшъёссэс праздникен ӟечкыланы вуылӥзы Удмурт Элькунысь Пичи Пурга ёросысь Эдэйгуртысь «арганчиос». Арганчиос празднике люкаськемъёсты шулдыр концертэн шумпоттӥзы. Бен, «Кизилие» пырись гуртъёсысь усточиос но учкисьёсты шумпоттӥзы. Нылкышноослэн синмаськымон «Зангари» ансамбльзы чебер кырӟаны быгатэменыз паймытӥз. Та тузӥ кышномуртъёсты Брангурт песянайёсын ӵошато.

Дасямын вал спортлы сӥзем программа но. Туж тунсыко ортчизы волейболэн ӵошатсконъёс. Удмуртъёсты сӥлы карыса, лыктэмын вал бускель Бурай ёросысь, Калтасыысь волейболэн шудӥсь командаос. Ма, кузёос но бере ӧз кыле. Нылпиослэсь сяна, пӧртэм вузъёсын но училищеосын дышетскисьёслэсь командаос дасяллям. Праздникез учкыны лыктэмъёслы спортъя таӵе ӵошатсконъёс туж сюлэмзыя луизы.

Ильтимир Байметов.

Удмурт Дунне
By Удмурт Дунне 8 июня, 2012 14:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<