Тӧр шорын — гуртоос

Удмурт Дунне
By Удмурт Дунне Июнь 26, 2012 14:48

Тӧр шорын — гуртоос

С. Кадров (паллян паласез) но Балезино ёросысь В. Корепанов.

Кызь одӥгетӥ ползэ ини ӧсъёссэ вӧлъяз гырон-кизёнэз йылпумъянлы сӥзем Гербер праздник. Ортчиз со «Лудорвай» музей-заповедникын.

Тросэзлэн тодазы кылиз кылем арын ортчем Гербер. Тыро-пыдо шулдыръяськыны соку куазь ӧз сёты — зор ведра дурысь кисьтӥз. Возь вылэ люкаськем калык амалтэк пегӟоно луиз. Туэ Герберлы туж чебер куазь тупаз. Лудорвае возь выл тыр калык люкаськиз. Кытысь гинэ удмуртъёс вуиллямтэ: Башкортостан, Татарстан, Киров, Свердловск, озьы ик мукет улосъёсысь, Удмуртилэн вань ёросъёсысьтыз. Удмурт дэремъёсын пӧрмытскем делегациос, радэн-радэн султыса, ортчизы люкаськем калык азьтӥ. Пӧлазы вал Президент Александр Волков, Кун Кенешлэн Тӧроезлэн воштӥсез Светлана Кривилёва, Удмурт Республикая валтӥсь федерал инспектор Дмитрий Мусин.

— Гурт удысэз ӝутон но гурт продукция поттон ласянь Удмуртия Россиысь дас кужмо улосъёс пӧлы пыре, — Герберез усьтӥз Президент. — Республикаямы котькуд улӥсьлы быдэ 400 килограмм сӥль усе — та ласянь асьмеос куатетӥ интыын. Со сяна, Россиысь одӥг улосэз но уд пумита ни, кудаз райцентрлы быдэ ӝутӥське стадион, куасэн бызьылонъя база. Тани басьтӥськимы ни Вавож черкогуртын бассейнэз пуктон борды. Ма, кызьы вавожъёслы юрттытэк. Скаллы быдэ 6 сюрс килограмм йӧл кыско! Кылем арын соос ваньзэ-ӧвӧлзэ люказы 36 сюрс тонна йӧл — 1990-тӥ арен ӵошатыса, куинь поллы тросгес.

Азьвыл аръёсы Гербер ортчылӥз ёросъёсын — гурт удысэз ӝутонын висъяськем интыос котырын. Берло аръёсы та сям ышыны кутскиз — калыкез ас дораз пумиталляз Лудорвай. Александр Волков пусйиз: Гербер праздникез азьланяз радъяно шаерысьтымы гуртъёсын ик. Озьыен, вуоноез Гербер ортчоз Алнаш палъёсын.

Праздникын пусйытэк кельтэмын ӧй вал гурт удыслы вань сюлэмзэс сётыса тыршисьёс но. Президент, кизэс юн кырмыса, котькудзэс таукаронэн но синпель кузьымен, коньдон премиен пусйиз. Данъямъёс пӧлын — Алнаш ёросысь Асангуртысь «Молодая гвардия» хозяйствоысь Сергей Кадров. Вань сюлэмзэ-мылкыдзэ сётыса ужаменыз со азьпалтӥз лымшор ёросъёсысь вань механизаторъёсты.

— Гурт удысын сяна, асме мукет азьын син азям пуктыны ик уг быгатӥськы, — шуэ Сергей Васильевич. — Кельше мыным бусыын ужаны — кырӟасько ас поннам, пӧртэм малпанъёс, тодэ ваёнъёс лыкто йырам. Гурт удысын мон тыршисько ини 1980-тӥ арысен. Вормон сьӧры уг уйиськиськы — уж борды басьтӥськисько ке, ваньзэ рос-прос, лулысь-сюлмысь быдэстэме потэ.

Гербер шулдыр мылкыдын ортчиз. Инмарлэсь ӟеч емыш, байлык но азинлык курыса, калык ӝук сииз, кырӟаз-вераз, эктӥз-тапыртӥз.

Елена Никитина.

Удмурт Дунне
By Удмурт Дунне Июнь 26, 2012 14:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<