Сюкась уг чырса лянэсын

Удмурт Дунне
By Удмурт Дунне 20 июня, 2012 10:27

Сюкась уг чырса лянэсын

Е. Киселёва.

Вашкала дырысен удмурт кибашлыос синмаськылӥзы кызьпу туйлы. Писпулэсь сулзэ ниыса, соос пӧртэм арбериос пӧрмытъязы, уката но трос лэсьтылӥзы сиён-юон возён тӥрлык.

Туала усточиос но песянай-песятайёсмылэсь бере уг кылё. Кызьпу туйлэсь киужъёслы сӥзем адӟытон алигес усьтӥськиз Ижысь кибашлыослэн центразы.

Писпу суллэсь арбериос арысь аре тросгес луо. Соос тунсыко кибашлыослы но, басьяськисьёслы но. Тусын чебер, кемалы чида, сиён-юонлэсь шӧмзэ уг вошты, вуэз уг пыӵаты, уг сисьмы — инкуазен сётэм термос выллем луэ. Кызьпу туйлэсь пӧрмытыны луэ на шудонъёс, пичи сандыкъёс, суредъёс, лянэсъёс, кудыос, шуэ Ижысь киужъёсъя центрысь усточи Елена Киселёва. Елена Васильевна шоркарамы кык но ӝыны ар гинэ ужа ай, солэсь азьвыл тыршиз вордскем Красногорск черкогуртаз, пуэз чеберъяз-буяз.

— Киужез дунъяны монэ дышетӥзы анае-атае. Анае но апае чебер керттӥсько-пужъятӥсько. Атае Красногорскысь киужъёсъя юртэн кивалтэ, усто суредаське. Мон, Ижысь культурая училищеез йылпумъяса, тодон-валанме будэтӥ Удмурт кун университетысь Искусствоосъя но дизайнъя институтын. Нырысь ужай вордскем палъёсам, собере куриськи татчы. Мыным туж кельше киужен вырыны. Уката но яра пу, солэн зыныз ик гочатэ. Кызьпу туйлы синмаськеме арысь аре йылэ, та котьмалы тупась но кылзӥськись материал. Лянэсъёс, нянь возён шыкысъёс лэсьтӥсько ке, отчы вандылыса но, шуккыса но удмурт пужыос пуктӥсько. Одӥг арбериез лэсьтыны одӥг нуналысен кык арняозь кошке. Котькуд выль киужме азьвылэзлэсь эшшо но чебергес кылдытыны тыршисько, — шуэ усточи.

Адӟытон усто пӧрмем. Кибашлыос ог-огенызы ӵо-шатскыса кадь тунсыко арбериос кылдытъяло. Тужгес но паймыто Эгралась Тамара Корепановалэн, Дэбесысь Татьяна Дерендяевалэн но Кезысь Вера Касимовалэн чай, сюкась юон, сиён возён посудаоссы, сумкаоссы, шудонъёссы. Выставка ужалоз 9-тӥ августозь.

Галина Семёнова.

Удмурт Дунне
By Удмурт Дунне 20 июня, 2012 10:27