Светӥ доры — Гербере!

Удмурт Дунне
By Удмурт Дунне 8 июня, 2012 13:52
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Светӥ доры — Гербере!

С. Кибардина.

— Кызьы Светлана Кибардина таӵе аресказ но пинал кадь кариськыны быгатэ? Шаян вылэм-а со пичи дыръяз?

Ирина Снигирёва.

Югдон школа,

Сьӧлта ёрос.

— Кӧшкемыт шаян. Остэ, мар но ӧй дауртылы. Олокызьы огпол но анай-атайлэсь ӧз йӧтылы, зол куаретэмзэс уг ик тодӥськы.

Вить арес дыръям комодысь куинь манет кутыса, лавкаысь аслым дэрем басьтӥ. Кызьы вуз карисьёс но сётӥллям — нэнэй ачиз ыстӥз кожазы, луоз. Ох, шоголляськи ук, туж яратӥсько вал чебер дӥсяськыны, дэрем вошъяны. Но со дыре ик йырсиме сынаны ӧй яратылы, ветлӥсько вал гынмем йырын.

Одӥг пол Москваысь апай бертыны кулэ. Сузэре шуэ, ӧд ке сынаськы, тыныд кузьым уз сюры. Мон куалектӥ, сын утчасько, уг шедьтӥськы, љӧк вылысь алюминь вилка шедьтыса, сынаны вырисько. Йырсиосы сокем тугаськемын, баблямын, вилка но уг пыры ни, куасалкыса кошке. Ойдо вандом, шуисько. Уг яра — атай будэтыны косэ, нылъёслы, пе, пунэтэн чебер. Со качыез милесьтым ватыса возе вал.

Дорамы ялан концерт пуктылӥм. Ӵыжы-выжыосы али но верало: висъет сьӧрысь потыса, ялӥськод вал:

— Выступает алькиса Эсэтик Табаньгина.

Эшшо туж бӧрдӥсь но ортчыт шумпотӥсь вал. Малы ке шумпотћсько ке, быдэс оломар луисько вал — сюлэмы ик жугиськемысь дугдылӥз. Мукетъят собере юнме зар бӧрдылӥ. Малы бызгиськод юамзылы, ас улонме жаляса, шуисько, пе, вал. Ма, али но пӧртэм ӧвӧл, шумпотћсько ке, пичи дыръя музэн чир черекъясько, вузонтэк но уг ортчы — мылкыд уртчись, огкылын. Пуштросэз уд вошты ни.

— 1992-тӥ арын поттэм «География Удмуртии» (8-тӥ-9-тӥ классъёслы) учебникын вань муспотон нылашлэн туспуктэмез: удмурт дэремен, весьёсын, италмас сяськаен. Малпасько, со Света Кибардина шуыса. Тодэм потэ вылэм, ку но кызьы лэсьтэмын та туспуктэм?

Ольга Верняева.

Чекан черкогурт,

Ува ёрос.

— Бен, мон со, 21 арескам. Со вакытэ университетын дышетскисько вал, туспуктылӥсь Михаил Егоров синйылтэм — дэмлаз календаре пуксьыны. Малы монэ? Удмурт тусо луэмысьтым, дыр. Туспуктыны шуыса, юромо Якшур-Бӧдья ёросысь возь вылэ потам. Туж кельшиз вал камера азьын берганы, но со бӧрсьы ӧз ни ӧтча (серекъя).

— Кӧня ар ужа ни Светлана телевидениын-радиоын? Ачиз тодэ-а, кӧня пол со эфире потаз?

Елена Ржина.

Эгра гурт,

Грак ёрос.

— Уг, лыдъяны ноку йырам ӧз лыктылы. Нош телевидение вуи театрын ужан вакытам ватсаса уксё поттон вылысь. Со вал 1991-тӥ арын, нуыны кутски нылпиослы передачаез. Бӧрысь уката зол ёрмон дыръёс вуизы, кузпалэным кыкнамы театрын ужаськом вал, уждунмы сиськыны но ӧз тырмылы, соин, мыным телевидениын кык полэс уждун ӵектӥзы но, амалтэк отчы выжи.

— Программаосты нуэмезъя со ерпечка кадь йӧтэ. Тусыз но аспӧртэм: гопо ангесо, ымдуръёсыз векчи ӧвӧл — озьыен, со сюлмо, адямиез жалясь. Ангесыз гопо — иське, кужмо, пиосмурт сямо, малпанзэ меӵак верась… Шонер-а тодӥ?

Людмила Волкова.

Вавож черкогурт.

— Шонер. Кызьы ялан огкадь сямо луыны быгато, воксё уг валаськы. Мон куддыр туж ляб луисько: бӧрдӥсь, жалясь, ваньзэ вунэтӥсь. Мукетъят — куаӵ-куаӵ: кызьы шуи, озьы ик луоз… Ваньзэ ачим лэсьто, быгато, кулэды ӧвӧл. Ноку нокинлы йыбыртъяме ӧвӧл, юртто ке — ас мылкыдзыя, курытэк.

— Кыӵе воргоронъёслы синмаське?

Мария Ветрова,

УдГУ-ын дышетскись.

— Галстукен ветлӥсьёслы. Туж синмаськыса учкисько вал азьвылэз кивалтӥсьмы Николай Тимофеевич Рожков шоры — сю галстукез вал, дыр, солэн, туж валаса бырйылӥз. Соин, магазинэ пырисько ке, нырысь ик кожисько пиосмурт отделэ. Зэм, отысь каллен выжисько нылкышноослэназ, озьы галстук басьтыны пыремъёс магазинысь потћськом мыным дэремен, туфлиен, шубаен… Уг куриськы, асьсэос басьто. Кытын ке пушкам кескич сямы вань, дыр, но мон сое уг возьматӥськы.

— Ӟуч телевидениысь кыӵе журналистъёслы синмаське, кинлэсь адӟем каре? Маиныз со ас бордаз кыске учкисез, кылзӥсез?

Вера Бикузина.

Иж.

— Мыным воргоронъёс ярало: Ургант, Мартиросян. Туж синмаськисько соослы, ялан тодэме потэ: кызьы программаоссы дасясько: кин ке-а сценарий гожъя, асьсэлэн-а кылзы сыӵе лэчыт. Асьсэос ик сыӵеесь, дыр.

— Тодэ на меда ачиз, кызьы школаын дышетскыкуз, Ляли гуртын вормонлы сӥзем спектакль возьматӥзы?

Вера Бикузина.

Иж.

— Ой, кызьы сое вунэтод? Со мынам артистэ нырысетӥ вамыше вал, дыр. Тодӥсько на, пьесазэ но ачим гожтӥ. Ой, али лыдӟысал ке, кулысал, дыр — отын мынам немецъёс Удмуртиын ожмасько, татын кӧшкемын война мынэ. Дышетӥсьёс но индылћллямтэ яке мед выроз ойдо, шуизы-а. Но гуртоослы кельшиз вал, тодӥсько на. Тӥни озьы мон, школаын дышетскись маке, автор но, артист но, режиссёр но луи. Со нуналысен артист луыны мылкыды уката бурдъяськиз. Дорын со сярысь шара верай. Но агае куаӵак кариз: синучкон шоры учкы ай, пе… Учкисько но — зэмзэ но Софи Лорен ӧвӧл: ымныр шаньга, синъёс пичиесь… Тьфу, прощай, мечта! шуи но кутски геологе дасяськыны. Олокытысь-мар тодӥ-кари Свердловскын сыӵе институт вань шуыса, отчы гожтэт келяй. Монэ ӧтизы. Кутски дасяськыны: книга лыдӟисько, эшъёсме экспедициосы люкасько… Кытӥ-мар мылкыдме нэнэе тодэм. Шедьтэм, пе, удыс — быдэс улондэ штанэн-фуфайкаен ветлод. Мон нош ик юскиськи — кызьы озьы мон быдэс улонме сыӵе шуш дӥсяськыса ветлом?! Мынам чебер дэремъёсын ветлэме, шоголляськеме потэ ук. Дышетћсе, пе, мын. Маке солэн ваньмес дышетӥсь каремез потэ вал.

Мынӥ Можга педучилищее, мар карод. Но чик уг жаляськы. Дышетскыны ӧй курадӟы, тудӟись мылкыдылы тымиськыны маза ӧй вал. Тодћсько на, огвакыт 12 кружоке ветлӥ! Татын выльысь одолиз артист луэм потон мылкыды — чаклай ни уго, яратоно артистъёсылэн Чуриковалэн но Мордюковалэн туссы чик но синмальдымон ӧвӧл, нош кыӵе кизилиос! Озьыен, артист луон понна ымныр тус валтћсез ӧвӧл. Кошки уга Москвае ГИТИС-э. Нокыӵе кышканэз-мар ӧй тодылы, комиссия азьын басня но лыдӟи, этюд но возьматӥ. Одӥгез преподаватель шуэ: палэнты кымесысьтыд йырсидэ. Мон шуисько: уг. Солэн ымнырме рос-прос учкемез потэ вал, дыр, оло, кыӵе ке вурысэз вань кымесам, нош мон, ваментул… Огкылын вераса, ӧй ортчы, кайта, пе, лыкты. Берытски но пыри университетэ. Дышетскон вискам «Ижмаш» двореце выж миськисе интыяськи. Ой, со уже сыӵе зол кельше вал! Лыктћсько вазь ӵукна но нокин адӟымтэ дыръя бадӟым залын эктӥсько!!! Нош ӝытъёссэ татчы ик калык театре шудыны ветлӥ. Удалтыны но кулэ ук — ӵап со вакытэ ялӥзы ГИТИС-э национальной студие набор. Ох, лӧптӥ ук. Москваын дышетскем аръёсме али но тужгес шудо вакытэн лыдъясько.

— Мар борды золгес кыске сюлмыз? Маин вырыны малпа азьланяз?

Татьяна Петрова.

Вуж Салья гурт,

Кияса ёрос.

— Пенсие кошкеме потэ ни. Пьеса гожъясал. Калык театре ветлысал. Со али ӧвӧл ни, но туж кулэ, лыдъясько. Оло, кинлэн ке мылкыдыз сузёз ай. Тӥни соку мон лулысь-сюлмысь шудо.

— Кыӵе рольёсты?

— Ваньзэ, малы ке шуоно мон театрын рос-прос шудыса ӧй вутты. Эбга ке шат шӧдскымон вал, но али сое но мукет сямен шудысал ни.

— Кӧня нылпиосыз, кызьы будэтэ соосты?

Елена Владимирова. Иж.

— Кык пиосы — Митя но Стёпа. Бадӟымез Москваын дышетске, Славян культурая академиысь ньылетӥ курсэз йылпумъяз, тунсыкъяське телеоператорлэн уженыз, отын дышетскон висказ чыры-пыры ужаны пӧрмытэ ни.

Стёпа школаын ай, 7-тӥ классэ выжиз. Пиосы сямзыя туж пӧртэмесь. Митя — рос-прос, кулэ дыръя — туж кескич, котькыџе югдурысь потоз. Покчиез туж нуныяськись, романтичной. Огшоры верано мае ке но кыӵе ке мудрон кылъёсын чеберъя, лабыртыны яратэ.

Кызьы будэтӥсько? Кызьы пӧрме, нимысьтыз воспитание шуонэн уг выриськы, мултэс уг юалляськиськы, уг косъяськиськы. Куспамы эшъёс кадь вераськиськом. Бадӟымезлэсь быдэ вуон вакытсэ но ӧй шӧдылы, кызьы ке лякытэн ортчиз, нош кыӵе кышкатъязы!

— Улонын оломар но луэ, дыр. Но Светлана шоры учкыса, паймиськод: кызьы со ялан пальпотэ? Мынам нош нокызьы уг луы шумпотыса улэме, сюлэмме куректон-сюлмаськон зӥбе, чик улэме уг поты. Мар мыным кароно, выльысь улэме мед потоз шуыса?

Телефон пыр, кышномурт нимзэ ӧз шарая.

— Остэ, Инмаре, мар бон вералом. Мон ачим но сыӵе ик ук. Чидано. Мукет нокыӵе тупась кыл ӧвќл. Весь огкадь урод уз луы. Кык ар талэсь азьвыл мон но аслым кытчы пырон инты ӧй шедьтылы. Йырам туж кӧшкемыт малпанъёс но каръяськылӥзы… Калык пӧлын ортчоз, индыло вал. Нош мынам ӧз потылы калык пӧлы вамыштэме, дорысь — уже, ужысь — ӝогак доре, аслам сюлмаськонъёсы пӧлы. Юрттӥз воргорон эше. Туж уродъяськон дыръёсам но со монэ ӧз аналты. Уж но эмъя. Отчы вамыштћсько гинэ но — ваньмыз вунэ, ымныр ачиз пальпотыны кутске. Ма, собере, эфире потыса, мар-о мон учкисьёслы-кылзӥсьёслы шуыны кулэ: гажано эшъёс, мынам улонэ секыт, жалялэ монэ, туннэ лек но мӧзмыт вераськыны лэзе?

Мынам али индылэме озьы ик тӥледлы номырин уз юртты. Уз юрттэ психологъёс, визьмо журналъёс, эшъёс… Мон сое ортчи ни. Эмъя валан гинэ. Со но ӧвӧл ке — дыр. Возьмано.

— Зэм-а Светлана океан сьӧрын шутэтскылэ?

Валерий Петров.

Ува ёрос.

— Уг, но луонлык кылдысал ке, одно ик. Зарезь дуре ветлӥсько, пӧртэм городъёсты котыръясько. Париж, Амстердам кельшизы, туэ Гамбурге (Германия) куное дасяськисько. Отысь университетын фин-угор кафедра вань, удмурт кылэз дышето. Тӥни отысь эшъёсы ӧтизы ай, соин отпускез чидатэк возьмасько ни. Мӧзмелэ ӧжыт.

* * *

Гажано лыдӟисьёсмы! Светлана юанъёсты понна ваньдылы тау каре, ӵошен шулдыръяськыны 23-тӥ июне Гербер празднике ӧте. Али со ӵап тырше та ужрадлы сценарий гожтон бордын. Нош нимзэ шараямтэ кышномуртлы со кузьым дасяз. Куриськом тӥледды редакцие вазиськыны. Тел. 73-33-42, 73-33-44.

Удмурт Дунне
By Удмурт Дунне 8 июня, 2012 13:52