Ныл данлэн данэз ӧвӧл?

Удмурт Дунне
By Удмурт Дунне 27 июня, 2012 10:58

Ныл данлэн данэз ӧвӧл?

Семьялы, трос пинал вордонлы дурбасьтӥсь егитъёслэн лыдзы уноя.

Шаерысьтымы Егитъёсын ужанъя министерство арлы быдэ чакла егитъёслэсь макем воштӥськемзэс. Со понна радъяське нимысьтыз мониторинг — юалляськон. Озьыен, кыӵе туссы туала егитъёслэн?

 

Кема-а кыстӥське пинал дыр?

Кыӵе арлыдъем муртэ пыртыны луоз егитъёс пӧлы? Та юанлы меӵак валэктон шедьтыны тросэз шугомо. Уноез тодазы ваё республикаямы улонэ пыӵась «Улон инты — егит семьяослы» программаез. Отчы угось пырисько 36 аресозь муртъёс. Озьыен, ми но егитъёс пӧлы пыриськомы на, огымысь шуо таос. Но егитъёсын ужан политикалэн куронъёсыз чурытэсьгес: егитъёс пӧлы пыртыны луэ 14 аресысен 30 аресозь нылъёсты-пиосты. Соосты тазьы люко:

— 14 аресысен 16 аресозь — быдэ вуымтэос. Та вакытлэн аспӧртэмлыкез: нылъёслэн но пиослэн кисьмамзы. Ваньмыз берга физиология котыр. Соосты шуныт бурд улазы возё ай анай-атайёс но, кунмы но.

— 17 аресысен 19 аресозь — кисьман дыр йылпумъяське. Та вакытлэн аспӧртэмлыкез: нылъёс-пиос пӧлын ортче социализация — калык пӧлын астэ шедьтон, граждан правоостэ но политикаез тодон-валан, улон сюрестэ быръён. Тазэ подгруппаез син шорын возьыны секытгес ини.

— 20 аресысен 24 аресозь — егитъёс. Та вакытэ адями социальной тодметъёсъя но, физиология ласянь но быдэсмемын луэ ни. Егитъёс кыӵе ке профессия басьто, семья кылдыто. Но социализация пыр ортчонзы йылпумъяськемын ӧвӧл на.

— 25 аресысен 30 аресозь — бадӟым егитъёс. Котькудзэ кисьмам личностен лыдъяны луэ ни. Та вакытэ адямилэн люкаськемын ни ужын астэ утчан, семьяен улон ласянь опытэз. Бордаз ватсаны луоз егит муртлэсь политикае пыриськемзэ но. Таӵе аресказы вуэмъёс капчиенгес кусып тупато ни арлыдо муртъёсын. Угось ас вылазы шӧдӥзы ни бадӟым улонлэсь аспӧртэмлыкъёссэ. Кунмы та егитъёсын кусып возе рынок амал пыр: макем ӟеч программа ӵектод, сокем ӟеч эшъяськод егитъёсын.

 

Таза луон — модалы тупан

Егитъёсын ужась специалистъёс огымысь пусъё: егитъёс пӧлын арлы быдэ мургес но мургес пыӵа таза улонлы мода. Тае валаны луэ юалляськонъя но: тазалыксы пумысен сюлмасько 39 процентэз нылъёс но пиос. Республикаысьтымы 52 процентэз егитъёс асьсэды тазаен лыдъяло, но, куд-ог дыръя висьыны усьыло шуыса, пусъё. Тунсыко: пиос пӧлын асьсэды тазаен лыдъясьёс тросгес — 34 процент. Нош нылъёс пӧлын — 16 процент.

Озьы-а, тазьы-а, но тазалыклы модаен артэ вамышъяло тамак кыскон но, кудӟытӥсь юонъёсты веръян но. 14 аресысен 16 аресозь егитъёс пӧлысь 25 процентэз тамак пурккетэ, 25 ареслэсь бадӟымъёсыз но — 25 процентэз. Со дыре ик егитъёс пӧлысь 63 процентэз тамак шоры кырыж учко, чик уг кыско.

Кудӟытӥсь юонъёс пӧлысь егитъёс тужгес но гажало сурез. Мугез огшоры — туганэн я эшен поръян сямен сое басьтыны луэ котькытысь. Сурен эшъяськонзы кутске 14 арескын — таӵе аресъемъёс пӧлысь 36 процентэз номыр уродзэ уг адӟы арнялы быдэ сур юон бордысь. Дыр ортчемъя та лыдпус уноя. Кылсярысь, 17-19 аресъем егитъёс пӧлысь 61 процентэз сурен кушласькыны кутске ини. 20-24 аресъемъёс пӧлын — 66 процентэз, 25-30 аресъемъёс пӧлын — 73 процентэз. Макем бадӟымгес-арлыдогес луэ адями, сокем тросгес юыны кутске сурез. Пусйыны кулэ тазэ но: арлыд люкамъя егитъёс кыстӥсько курытгес юонъёс борды но. Кылсярысь, 17-19 аресъем егитъёс пӧлысь 30 процентэз водкаез веръя ке, 25-29 аресъемъёс пӧлысь — 59 процентэз.

Вератэк кельтыны уг луы наркотикъёс сярысь но. Юалляськонэ пыриськемъёс пӧлысь 5 процентэз турын (марихуана) кыско. Азьвыл аръёсы сямен ик, та шузимытӥсь будосэн тунсыкъяськисьёс тужгес но трос Ижын (6 процент), ичигес гуртъёсын (2 процент). Республикаысьтымы котькудӥзлэн дасэтӥезлэн егит муртлэн вань шузимытӥсь турынэз кыскись эшез-тодмоез.

 

Яратон вакыт

Юалляськон возьматӥз: егитъёс пӧлын тужгес но вӧлмемын одӥг нылпи гинэ вордонлы установка. Берло ньыль ар ӵоже ини одӥг пинал вайыны (мылкыд луиз на ке — кыкетӥзэ, тазьы пусйисьёсты но татчы пыртоно) чакла 62 процентэз егит калык. 4 процентэз егитъёс куиньлэсь ятыр нылпи вордысалзы. Со вие ик 5 процентэз егитъёс пинал ваёнлы чутрак пумит луо. Министерствоысь специалистъёс пусъё: азьвыл аръёсын ӵошатыса (мониторинг радъяське ини берло 8 ар ӵоже — авт.), трос пинал вордонлы дурбасьтӥсь егитъёслэн лыдзы уноя.

Озьы ке но паймытэ таиз: кыклэсь тросгес пинал вордонлы пумит луо… нылкышноос (67 процент), со вие ик воргоронъёс пӧлын та лыдпус — 56 процент. Тазьы егитъёс шараязы нылпи ваён пумысен мылкыдзэс гинэ. Нош зэмос улонын кӧняезлы меда кылдӥз ни анайлэсь но атайлэсь статуссэс ас вылазы шќдыны? Шаерысьтымы 25-30 аресъем егитъёс пӧлын — ӵапак та вакытэз герӟаськомы семья кылдытонэн — 46 процентэзлэн пиналзы ӧвӧл на, 35 процентэзлэн одӥг нылпизы вань ини, 17 процентэз кык пинал вордо ни.

Семья кылдытон но нылпи вордон шоры учконэз специалистъёс меӵак герӟало пиосмурт но нылкышно куспын нырысетӥ опыт басьтонэн. Юалляськонын та ужпумлы бадӟым саклык висъяське. Та ласянь кутскон вакытсы — 17 аресысен 19 аресозь. Таос пӧлысь 51 процентэз матысь кусыпъёс возё ни. Валесын яратонэз шӧмъяллям ни 14 аресысен 16 аресозь егитъёс пӧлысь 34 процентэз. Котькуд тямысэтӥез егит мурт пусйиз: матысь кусыпъёс тупатӥз, 20 арессэ тырмытыса гинэ. Лыдпусъёс шоры учкыса, малпан кылдэ: ныл данэз (девственность) одӥг воргорон (вуоно карт) понна гинэ утён туала улонысь кошке ини…

 

Сюлмаськонъёс пыр оскон

Специалистъёс пусъё: егитъёс — вань ужпумъёсты сюлэмзылы туж матэ басьтӥсь социальной группа. Соин ик паймонэз ӧвӧл соос пӧлын пӧртэм кышканъёслэн вӧлмемзылы. Соинтэк-а тазалык пумысен юалляськонын 33 процентэз шуиз: ганяк шокчыны но асьсэды тазаен шӧдыны соослы уг сёто нуналлы быдэ пумиськись стрессъёс но сюлмаськонъёс. Таиз, вылды, туала улонмылэн тодметэз.

Юалляськонын шараяськиз: азьланез шоры осконэн учко 59 процентэз егитъёс. Со вие ик ӝыныез егитъёс али ик улыны выжысалзы Россилэн мукет сэрегаз. Валэкто тазьы: шаерамы астэ шедьтыны но коньдон поттыны луонлыкъёс туж пичиесь.

Мар сюлмаськытэ на егитъёсты? Валтӥсь интыын — 71 процент — коньдонэн, ваньбурен герӟаськем ужпумъёс. Со вие ик 38 процентэз пусйиз: экономика ласянь югдурзы берло аръёсы уг воштӥськы, нош котькуд ньылетӥез ӝожтӥськиз — уксё ласянь югдурез уродмиз. Шумпоттытэ: 68 процентэз егитъёс дурбасьто семья кылдытонлы. Семья — адямилэн улоназ валтӥсь кужым, пусъё таос. Та лыдпус арысь аре уноя.

Елена Никитина.

Удмурт Дунне
By Удмурт Дунне 27 июня, 2012 10:58