Нош мон понна удмурт кылтэк Россия но ӧвӧл…

Удмурт Дунне
By Удмурт Дунне Июнь 15, 2012 10:57

Нош мон понна удмурт кылтэк Россия но ӧвӧл…

Вылӥ кивалтӥсьёс нырысь ик кожизы «Удмурт дунне» газетлэн азбараз.

Россилэсь нуналзэ, 252-тӥ вордскем нуналзэ Ижевск туж яркыт ортчытӥз. Городысь 50 интыосын радъямын вал шулдыръяськон площадкаос.

Нырысьсэ Пушкин ульча кузя ортчиз карнавал. Яркыт дӥсен пӧрмытскыса, урамез шулдыртӥзы нылпиос, циркысь артистъёс, байкеръёс, барабанщикъёс но трос мукетъёсыз. Искусствоосъя школаосын дышетскись пиналъёс шулдыр гурен тырмытӥзы Ижысь ульчаосты — городэз котыръяз крезьгурась трамвай.

Нуназе Шор площадьын кутскиз туала культуралы сӥзем «Шара город» фестиваль. Сое усьтӥзы удмурт флэшмобен. Удмурт кырӟан чузъяськем улсын площадьын тапыр! эктӥзы егитъёс, «Чебеляй» ансамбльысь нылъёс но пиос. Нырысь-валысь удмурт тапыртон луыны кулэ вал Пушкин ульча кузя — карнавал ортчыку. Но эктыны мыло-кыдоос 50 муртлэсь ӧжыт люкаськизы. Соин 30 пала егитъёс площадьын эктӥзы.

Вордскем нуналаз шоркармы ӧз кыльы кузьымтэк но. Дун-чылкыт Михаиллы сӥзем собор азьын табере сылоз Пётрлы но Февронилы сӥзем синпелет. Та святойёс утё но данъяло семьяен улонэз.

Таӵе скульптура сылэ ни Россиысь 9 городын. Табере синпелет Ижевскын но пуктэмын. Сое усьтыны юри вуылӥз «В кругу семьи» программалэн кивалтӥсез, Россиысь калык артист Валерий Золотухин. Проектэз радъясьёслэсь ӵектонзэс Удмуртиысь кивалтӥсьёс соку ик кылӥзы. Инты но туж тупась ӵектӥзы.

— Храм азе Пётрлы но Февронилы сӥзем синпелет пуктон — туж ӟеч уж. Нырысь ик, со чебер но, собере — туж усто но. Пётрлэсь но Февронилэсь бакель курыса, егит семьяос венчание мынозы, — мылкыдзэ вераз Валерий Золотухин.

Ижысь но городлы матысь районъёсын улӥсь удмуртъёс дышем сямзыя люкаськизы Кызьпу арамае. Татын шӧдскымон выльдӥськонъёс ортчизы. Кылсярысь, пуктэмын выль сцена. Сое куаш-куаш эскеризы «Айкай» театрысь артистъёс. Соос ӝыны час ӵоже пӧсь шунды сиос улын концерт сётӥзы. «Айкайёсты» воштӥзы «Тюрагай», «Эшъёс», «Инвожо» ансамбльёс. Гербере вуэмъёсты шулдыртӥзы пор но мордва калыкъёслэн кырӟась-эктӥсьёссы. Егитъёслы нимаз площадка ужаз. Татын но бер ӝытозь дискотека вал.

Праздниклэсь палэнэ ӧз кыле вылӥ кивалтӥсьёс. Ижысь Гербере пыриськиз Президент Александр Волков но. Соин ӵош вуизы Ижевск городлэн йырыз Александр Ушаков, город администрацилэн йырыз Денис Агашин, Индустриальной ёрослэн йырыз Любовь Зайцева но мукетъёс. Шаерамы улӥсьёс Президентлэн удмурт кылын ваземезлы дышемын ке но, таяз радэ Александр Волков паймытӥз. Шулдыръяськонэ со вуиз, удмурт дэремен пӧрмытскыса. Президент сямен ик дӥсяськиллям Александр Ушаков но Денис Агашин. Тае дунъязы, дыр, вань шулдыръяськисьёс, уго кивалтӥсьёс калыклы туж матын кариськизы.

— Кызьпу арамаын туэ ог 7 сюрс адями шулдыръяськиз. Соос понна 2 сюрс тонна ӝук пӧзьтэмын вал. Сое соку ик ӧм люкылэ — нырысь ик вӧсямы, тае оскимы Дэри ёросысь вӧсясьлы, — вераз «Удмурт кенешлэн» Ижысь ёзэзлэн тӧроез Пётр Бобров.

«Удмурт кенешлэн» Ижысь ёрос ёзъёсыз сюлмаськизы пӧртэм удысъёс понна. Шулдыръяськонъёсты радъяз Октябрь ёрос, ӝук понна сюлмаськиз Устинов ёрос. Удмурт сиён-юонъёсыз «люказы» Первомай но Ленин районысь «кенешчиос». Вуз карон понна кыл кутӥз Индустриальной ёрос. Пусъёно мукетсэ но: Герберын вуз карисьёслы одӥг бадӟым курон пуктэмын вал — вераськоно удмурт кылын. Малпам ужъёс быдэсмизы, куазь но шулдыръяськыны туж тупаз.

Елена Скворцова.

Удмурт Дунне
By Удмурт Дунне Июнь 15, 2012 10:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<