Ним понна ӧз выре

Удмурт Дунне
By Удмурт Дунне 1 июня, 2012 12:54

Ним понна ӧз выре

А. Волков Н. Зарбатов арганчилы баян кузьмаз.

Вторнике Удмуртие берытскизы быдэс Европалы тодмо луэм Брангурт песянайёс. Ижысь аэропортын соосты пумитазы кырӟанъёсын, эктонъёсын, перепечен. Чыртыязы ошылӥзы сушка сузьетъёс, сектазы пичи бекчеысь винаен — туж дуно но возьмам куноосты кадь.

Люкаськем калыкез адӟыса, шуныт кылъёслы луыса песянайёслэн синпумъёссы котмизы. Самолётысь васькемзы бере ик соослэн киоссы тырмизы турлы сяська керттэтъёсын но кузьымъёсын. «Евровидениез» бугыртэм удмурт нылкышноослы шуныт кылъёссэс веразы Правительстволэн Тӧроезлэн воштӥсез Людмила Чунаева, Правительстволэн Тӧроезлэн воштӥсез но «Удмурт кенешлэн» президентэз Николай Мусалимов, культурая министр Дмитрий Иванов, Иж городлэн йырыз Александр Ушаков, Пичи Пурга ёрослэн йырыз Александр Ерохин.

Аэропортлэн юртаз пырыса, песянайёсты уката тросгес калык кичабонъёсын пумитаз. Татын ик — «Айкай» театр, азербайджанъёслэн Удмуртиысь «Достлуг» огазеяськонзы. «Евровиденилэн» кизилиосыз доры нокызьы но матэктыны уг быгато ӵыжы-выжыоссы, сокем трос калык. Аэропортлэн кыкетӥ этажаз но учкисьёс тачак сыло — потӥллям аэропортын ужасьёс, кошкыны уг ӵыдо пассажиръёс. Песянайёсты туспуктыны выро аэропортысь полицейскойёс но охранникъёс.

Кузь сюрес вылысь вуэм кенакъёс, валамон, жадемын ни. Озьы ке но чидало юалляськисьёсты но, туспуктылӥсьёсты но.

— Мӧзмиды-а Брангурттылэсь? — ёртӥськом Пугачёва Наталляпаез.

— Кызьы уд? Милям татын пичи ке но хозяйствомы, пудо-животмы возьма ук, — вера шаплы песянай.

— Бакуын кельшиз-а?

— Туж кельшиз, только туж возьдаськисько, арлыдылэсь возьдаськисько ни, — шуэ Наталляпай.

Брангуртэ песянайёсты нуизы выль тузӥ «Тойотаосын», огъя колоннаын мынӥзы полицейскойёс но. Доразы пырыны нылкышноослы ӧз кылды — соосты быдэс гуртэн возьмазы клуб азьын. Пиналъёслэн школаын урокъёссы та нуналэ чакламлэсь вакчигес вал.

— Ми толон дорын чылк-чылк утялским, — вера Ольга Туктаревалэн пиез Сава. — Юлямы школае ик ӧз ветлы ни — мамамы бертэ шуыса, сое дышетсконлэсь мозмытӥзы.

Клуб азьысь гуртооссэ адӟыса, синвуоссэ кутыны ӧз ни быгаты Ольга Николаевна но. Песянайёсты ӟыгыръяло, нош ик сяськаос кузьмало. Нокин но уг кошкы — ваньмыз клубе пыро. Татын вань пуконъёс тырмизы. Бакуысь вуэм кизилиосты сцена вылысь ӝӧк сьӧры пуктӥзы.

— Татын но пресс-конференция шат? — пайме Ольга Туктарева.

Гуртоослэн кылэмзы потэ, кызьы ветлӥзы, малы паймизы, кызьы утялтӥзы Бакуын.

— Та удмурт песянайёс ӧвӧл ни — Европаысь бабушъёс, — коллективысь кышноос шоры возьматыса, вера Ольга Николаевна. — Бакуын мон куддыръя удмурт дэремме но ӧй ни дӥсялля — уго сомында саклык висъязы, ки вылазы нуллыны радзы вал. Азербайджанъёс, удмуртъёс кадь ик, кунояны мыло-кыдоесь, ӝӧк вылазы но ваньзэ поттозы, улэменызы ушъяськыны но уз вунэтэ. Бакуын милемды пумитазы асьсэлэсь песянайёссэс сямен. 21 нунал дорамы ӧй вал ми — табере, асьме омырен шокаса, кӧты уг тыры.

Ольга Туктарева, гуртысь клубен кивалтӥсь, аслэсьтыз ужан интызэ но ӧз тодма ни. Татын уго мытэм уж адске ни.

 

* * *

Культурая юрт матысь дыре, зэмзэ но, уката тузӥ луоз. Таӵе осконзэ вераз Удмуртилэн Президентэз Александр Волков, Брангуртысь песянайёсты резиденцияз ӧтчакуз.

— Выж пулъёс вискы кӧня ке чиньы тэре, клуб возьма рос-прос тупатъямез, — вераз Президент.

Шаерамы та дырозь ӧй на вал одӥг коллектив но, кудӥз быгатӥз вакчи дыр куспын такем данэ потыны. Табере Удмуртия — со, нырысь ик, Брангуртысь песянайёслэн республиказы.

Александр Волков выль ӵектонэн вазиськиз резиденцие люкаськемъёслы. Семьялэсь калыккуспо нуналзэ пусйыку, трос нылпи будэтӥсь анайёс пӧлысь огез дэмлаз Президентлы кылдытыны Песянайёслэсь нуналзэс. Уго соос туж бадӟым юрттэт сёто асьсэлэсь нунокъёссэс будэтонлы, адӟем карымонэсь луо мукет егитъёслы.

Коллективе ветлӥсь 8-эз нылкышноос пусъемын «Удмуртиысь калык артист» нимын.

— Мон кепыр потӥсько таӵе дунъет басьтыны, — шуэ Ольга Туктарева. — Нош песянайёс понна туж шумпотӥсько — кырӟало-верало вань сюлмысьтызы.

Бадӟым шумпотон вуиз коллективлэн арганчиезлы Николай Зарбатовлы но. Брангуртэ вуылыкуз, Александр Волков сӥзиз солы вуж баянзэ выльдыны. Резиденциын пумиськон дыръя Президент кузьмаз аслэсьтыз инструментсэ — аслым, пе, басьтӥ вал, но шудыса ӧй на вуы. Баянлэн чылкыт куараез зал тыр шуккиськиз — Брангурт песянайёс тау карон гур быдэстӥзы.

Удмурт нылкышноос дор палъёсазы кемалы ӧз бертэ. Тани туннэ соос сюрес вылэ потозы ни. 3-тӥ июне песянайёс пыриськозы Россиысь «Нылпи Евровидениез» усьтон концертэ. 12-тӥ июне кырӟалозы Москваын Россилэн нуналызлы сӥзем шулдыръяськонын. Отӥяз соосты возьмало Латвиын. Озьы быдэс гужемлы гастрольёс чакламын ни.

— Мынон-ветлонлэсь ум кышкаське, — шуэ песянайёслэн старостазы Галина Конева. — Продюсермылы куронмы одӥг: самолётэн мед нуозы-ваёзы, озьы дыр трос уг быры, милемыз дорын но уж возьма.

Алёна Ионина.

Удмурт Дунне
By Удмурт Дунне 1 июня, 2012 12:54