Мушъёс но чеберез шӧдо

Удмурт Дунне
By Удмурт Дунне 20 июня, 2012 10:29

Мушъёс но чеберез шӧдо

С. Емельянов.

Эгра ёросысь Мазьги гуртысь Сергей Емельяновлэн сандык кадь чебер юртэз шоры ульчаетӥ кошкисьёс синмаськыса учко. Сергей Пантелеевич котьма карыны усточи: пуэз, кортэз, ларгам питранъёсты лулъя.

Сергей Пантелеевичлэн пинал дырыз Мазьги вӧзысь Порвай гуртын ортчиз. Куинь аресысен атайтэк кылиз. Пичи шуыса, этеез нуныяллямтэ: я созэ, я тазэ ужез быдэсъяны курылӥллям. Вӧзазы улӥсь песятайзы, пичи Сергейлы котыр ласянь визь-кенешен юрттылэм. Пересь муртлэн индылэмез токма луымтэ — табере Емельянов котьма карыны быгатэ.

— Тау карисько песятаелы, — шуэ со, — пуэн ужамез шоры паймыса учкылӥ. Киысьтыз пуртэз ик ӧз усьылы кадь: пукон сяменыз я кыӵе ке шудон пӧрмытоз, я юрт котырын кутӥськись тӥрлык лэсьтоз. Вань ӝӧк-пуконъёсмы соин дасямын вал. Азьвыл аръёсы гурт калык вылӥ дунъялляз но утьыса возьылӥз асьсэ киын лэсьтэм арбериосты.

Сергей Емельянов егитысен кузпалъяськиз, нош 22 аресказ аслыз юртъер пуктӥз ни. Корка ӝутэмез бере ик тодаз лыктћз песятаезлэн визь-кенешез: ужедлы калык но мед синмаськоз. Ӵапак соку пиосмурт нырысьсэ кияз кутӥз лобзик. Кема курадӟемез бере укно наличникъёсыз калыклы возьматымон пӧрмизы.

— Арняосын лэсьтэм ужме гурт калык синйылтӥз, — веранзэ азьланьтӥз воргорон. — Дорам ветлыса, юалляськыны кутскизы, кытысь пужы шедьтӥд, мар пуэз вандылӥськод шуыса. Нырысь ик картон вылэ суред пуктылӥ, сюлэмъям кельшись арбериез ДВП вылэ лэсьтылӥ. Куд-ог адямиос, монэ жаляса, лэся, фанераез гинэ уже кутыны косылӥзы. Бен, фанераез вандон капчиенгес сётскылӥз. Нош мукет ласянь ке учконо, вань тыршемед нырысетӥ зор дорозь гинэ чидасал. Котмыса со пилиське. Дышетскон сяменым лыдъяса быдтонтэм лобзикъёс тӥяй. Курадӟемме адӟыса, эмъян удысын ужась апае врачъёслэсь пилазэс сётӥз. Отӥяз уже капчиенгес радъяськиз.

Со дырысен трос аръёс ортчизы. Порвайын улэмзы бере Емельяновъёс Мазьгие выжизы, нош ик юрт котырзэ ачиз чеберъяз. Табере нылпиосызлы улон инты пуктон сярысь сюлмаське. Котькытчы та воргорон мед мыноз, ваньмаз аслэсьтыз кибервылзэ — пужъятэм капкаоссэ, укно наличникъёссэ — кельтэ. Мытэм ужзэ шаплыгес быдэстон вылысь вандылонъёссэ сьӧраз но кутылэ. Трос аръёс ӵоже колхоз автобусэз нуллӥз. Возьмаськон сяменыз лобзикен ужаз.

— Пуэн выремме шӧдыса, гуртысь кибашлыос Илья Владимирович, Арефий Дмитриевич, Юрий Михайлович но мукетъёсыз дорам юалляськыны ветлӥзы, — шуэ воргорон. — Вузаны курисьёсыз но вал. Наличникъёс пужъятэм сяна, шкатулкаос, борддоре шкафъёс, шыкысъёс лэсьтылӥ. Котькуд ужме вешаса быдэсъяй, вузаны но жаль потылӥз. Ма, собере дун пуктыны кепырасько вал. Басьтӥсьлы дуно кадь потоз, кожалляй. Туж курисьёсызлы гинэ кык шыкысме кузьмай ик: кутэм пимылы но пимылэн юлтошезлы.

Емельяновъёс нылпиосты туж ярато. Асьсэлэн пиналъёссылы, нунокъёссылы гинэ ӧвӧл, гуртысь тэшкылиослы шуыса ульчае липето ӟечыранъёс пуктылӥзы. Жаляса верано, чеберъям арбериосты туала егитъёс дунъяны быгатӥллямтэ — чильпаса лэсьтэм пуосты йыртэмасьёс тӥяллям. Соин но, лэся, воргорон та вакытэ ваньмон дыръяз кусо, лопатка я мажес ныдъёс гинэ дася.

— Озьы ке но пуэн выронэзлэсь уг ӵыды, — вераськонамы итӥське кибашлылэн кузпалыз Глафира Елизаровна. — Мушъёсмы вань бере, соослы умортоос, рама нуллон шыкысъёс лэсьтэ. Сад-бакчаямы пуктэм беседкамы но огшоры гинэ ӝутэмын ӧвӧл, наличникъёсыз турлы вандылэмын. Берло аръёсы мукет висён шедьтӥз — машина питранъёсты вандылэ, горшокъёс лэсьтэ. Сяська посудаосмы кызьлэсь уно луизы ни.

Гуртысь кибашлы аслэсьтыз бакчазэ гинэ уг шулдырты. Со сюлмаськемен, горшокъёс кылдӥллям гуртысь вуз карон юрт азе но, фермалэн азбараз но. Куд-ог адямиос ӝожтӥсько, резина питранъёс кужмо муртъёслы гинэ сётско шуыса. Сергей Пантелеевич лушкемак вераз: секытэз, пе, отын ӧвӧл, бадӟым лэчыт пурт сяна, одно ик кулэ на, пе, вуэн посуда. Пуртэз вуэ веттылыса, резина капчигес вандћське.

Гужем вуэ ке, Емельяновъёслэн бакчазы сяська пӧлы ыше. Чеберез гажаны дышем воргорон ачиз ик поглянъёсты кулэезъя вандылэ, буя. Кызьлэсь ятыр горшокын одӥг пужыез но кык пол уг пумиськы. Чеберез адӟыса, мушъёссы но шумпото кадь.

Валентина Кутузова.

Удмурт Дунне
By Удмурт Дунне 20 июня, 2012 10:29