Мон министр луысал…

Удмурт Дунне
By Удмурт Дунне 29 июня, 2012 14:04

Мон министр луысал…

Г. Юсуповалэсь (паллянысез) пуконзэ ас вылаз мерта Е. Фёдорова.

Кӧня ке толэзь талэсь азьвыл Удмуртиысь Егитъёсын ужанъя министерство ӵошатскон ялӥз: кинлэн, пе, одӥг нунал ӵоже ассэ министрын я солэн воштӥсез интыын эскеремез потэ, асэныды котыр ласянь тодматэ. Ушъяськемен гинэ уз тырмы — валэктоно на, маин тон мукетъёсызлэсь устогес, министрлэн пукон вылысеныз мар лэсьтыны пӧрмытод одӥг нунал куспын.

Эх, малпай, эскероно асме. Со мылкыды уката золгес бугырскиз, таӵе иворез тодэме бере: ӵошатсконэ пыриське 7 мурт. Кыкез бӧрысь чигназ. Нош мукет кылемъёсыз — студентъёс, соку гинэ 20 арессэс тырмытэмъёс. Паймоно кадь: районъёсысь нокин но вазиськыны дӥсьтымтэ — ваньзы городъёс, ӟучъёс. Ма, СМИ-ос пыр но конкурс сярысь нокыӵе ивортон сётэмын ӧй вал. Но талы пумит министр Владимир Соловьёв вазиз:

— Валасько: теле-радиоен, изданиосын ӧжытгес ужамы. Сайтамы гуртоос уггес пырало. Но ёросъёсысь ӧз вазиське шуыса, номыр уродзэ уг адӟиськы. Таӵе проект ӧй вал на. Соин ик гуртоос ӧз дӥсьтэ пыриськыны. Ачимъя тодӥсько: Алнаш ёросын ужан сюресме мытыкум, тодам но ӧй вал министр луон сярысь малпаськыны. Но вань конкурсантъёс городысь ӧвӧл, гуртысь потэм одӥг муртмы вань — тон.

Зэмен ик, мон — гуртысь. Со сяна, ӵошатскисьёс пӧлын огнам «пересь курка». Но калыкен но ужаса вуттэмын ни, министерстволэсь маин выремзэ тодӥсько — нуналлы быдэ сямен уго пӧртэм кенешонъёсазы но ужрадъёсазы пыриськисько. Удмурт. Министр ачиз но удмурт. Ма, мон ке министр ӧй луы, кинэ пуктозы на?

Вылӥ пуконэ мертаськисьёс пӧлын вал на Восточно-Европейской институтысь Екатерина Крекнина. Быръёнъёс дыръя сямен, таид аспӧртэм слайд-шоу лэсьтэм: «Сюрес егитъёслы!», «Дунтэм квартира!» но мукет та выллем ӧтёнъёс. Со дыре ик огзэ но лыдпусъёсын но валэктонъёсын ӧз юнматы. Шӧдӥськиз: нылашед ачиз но рос-прос уг тоды, ма кароз со. Зэм, пумаз ялӥз ик: огкылысь ужась коллектив, пе, кылдытэме потэ.

Хм, ма таӵе гинэ ӵектонъёс-сӥзёнъёс коть­ку­дӥз сётыны быгатоз. Нош мынам министр луыса зэмос ужпумъёсты берыктэме потэ. Огез соос пӧлысь таӵе: министерстволэн бурд улаз ужась «Психолог плюс» Ижысь центр калыклы юрттыны кулэ воксё дунтэк. Угось отысь куд-ог специалистъёс визь-кенешсы понна дун пуктылыны кутскемын. Та пумысен лыдӟисьёс но редакциямы чагиськылӥзы ни. Кыкетӥез сэрттоно ужпум: министерство борды юнматэм «Ёлочка» лагере пырон дорысь ӝужыт теремок куашкан калэ вуэмын. Котыртӥз бызьылӥсь пичиос вылэ шуак пограны быгатоз. Кыкез но та ужпум урод вужер уськытэ кивалтӥсьёс вылэ. Сое одно палэнтоно. Оген нылпизэс будэтӥсьёс пумысен но юан ӝутэм потэ. Правительство бордын ужась Загс ужпумъёсъя комитетлэн тӧроез Л. Попова верамъя, таос 1 сюрс 15 кузя. Пӧлысьтызы ваньзы сямен егитъёс. Но соослы туннэ кун нокыӵе юрттэт уг сёты. Зэм, ужысь уллямзы уг луы ик, пиналзылы 14 арес тырмытозь.

Но мынэсьтым огзэ но та ӵектонъёсме ӧз кылэ, лэся. Эскеризы милемыз министрлэн кык юрттӥсьёсыз. Соос дурбасьтӥзы Крекниналы. Туала арын сюрес, зэмен ик, егитъёслы, лэся. Мыным шуизы: луод министрлэн воштӥсез, кыл кутод, пе, егитъёс пӧлын профилактика ортчытон понна: законэз тӥясьёсын но кырыж сюрес вылэ киргамъёсын ужалод. Тае ваньзэ али бергатэ Галина Юсупова.

* * *

Ужан нуналэ кутскиз 27-тӥ июне 8 но ӝыны часын ӵукна министр дорын кенешонысен. Татын эшшо огпол валэктӥзы на, кин мар бордын ужалоз но ӟеч нунал сӥзизы.

Министрлэн воштӥсезлэн ӝӧк сьӧраз йырме кема тӥяса ӧй пукы — Галина Юсуповаез кури «Психолог плюслэн» кивалтӥсез доры сюрес возьматыны. Галина Александровна уго ӵапак та огазеяськонлэсь ужамзэ эскере. Зэм, ачиз но паймемын вал, психологъёс уксё поттыны кутскемын шуыса. Аслаз но тае тодэмез потӥз.

Нырысь малпасько­ вал:­ кивалтӥсьлэн воштӥсь­ёсыз­лы машина но шофёр сёто. Но Галина Александровна монэ абдратӥз: министерствоын, пе, кык гинэ машина — огез министрлэн, мукетсэ возё специалистъёслы туж кулэ дыръялы. Соин ик Юсупова монэ аслаз «корт валаз» валтӥз, ачиз руль сьӧры пуксиз.

«Психолог плюслэн» ки­вал­тӥсез Евгений Сеткевич милемыз возьма ни вал. Шоро-куспо арлыдо воргорон. Оло вераськонлэсь мугзэ шӧдыса, оло сямыз сыӵеен куаразэ мырдэм кылоно. Нош мынам сюлэмам йыркуръяськон бугыръяське. Оло пушкам кивалтӥсь сайкамен, оло «вузам» калык понна вӧсе улӟемен, чурыт кариськоно кожай. Нырысь-валысь котыр юалляськыса, тодӥ: центрын ужа 44 специалист. Со — Глазовысь но Воткаысь филиалъёсын ӵош. Ваньзы сямен ик — вылӥ образованиен муртъёс. Шоро-куспо уждунзы 6 но ӝыны сюрс манет.

— Уждунзы вӧзы специалистъёсты коньдон потто консультациос чотын, тае тодӥськоды-а? — меӵак юай Сеткевичлэсь.

Адямиелэн куараез уката пуксиз. Мон эшшо юан сётӥ на: ку талы пум поноды? Йылтӥ: туннэ нуналысен сыӵе учыръёсты медам кылылы ни. Центрлэн кивалтћсез кыл шедьтӥз ик:

— Кӧня ке ар талэсь азьвыл, зэмен ик, дорамы вазиськем калыклэсь ӝожтӥськемзэ кылӥсько вал. Но соку мон ужасьёсыным рос-прос кенеши, кылзэс юай, кинэ но сое улляно луиз. Но уксё поттон выльысь улӟиз шуыса, ӧй тодылы. Туннэысен сыӵе учыръёс уз луэ ни.

Сеткевичен ик кенешимы на тани ма пумысен. Коньдон ужпумъёсъя министерство косэ оскон телефонлэсь кулэлыксэ валэктыны. Та пумысен Егитъёсын ужанъя министерствоысь юристэн но кенешимы. Табере, пе, толэзьлы быдэ кӧня мурт вазиське шуыса гинэ лыдпус уг тырмы ни. Чотано, пе, кӧня минут ӵоже верасько специалистъёс куректонэ выем муртэн. Нош туэ оскон телефонэ жингыръясьёс 5 сюрс 98 кузя люкаськизы ни.

* * *

Ӟырдам мылкыд сӥяны валаз, Ижысь урод югдуре шедем пиналъёс понна кыл кутӥсь «Подросток» центре вуыса гинэ. Татысь специалистъёс 18 ар ӵоже адямие поттыны тыршо аналтэм, кырыж сюрес вылэ султыны кутскем пиналъёсты. Огзы но соос полициын учётын уг сыло на. Но кияд ӧд куты ке, пытсэт сьӧры но шедьыны быгатозы. Соин ик «Подростокын» пӧртэм лагерьёс, ужрадъёс, санаторийёс соос понна радъяло. Семьяосын валэктон уж нуо, кулэяськисезлы дӥсь висъяло. Арняяз кӧня ке пол городэтӥ рейдэн ортчо: чаклано пиналъёс дас час бере кытын, мар каро. Семьяоссэс но эскеро, одно учко холодильниксэс: сиёнзы вань-а? Сюлмаськытӥсь пичиоссы «Подростокын» али 316 кузя. Егитъёслэн нуналазы но, туннэ, сыӵе рейд ортчытон сярысь кенешим.

Вуылӥмы на республикаысьтымы наркодиспансере. Татысь валтӥсь врачен Т. Карловаен огкыл гожтӥмы: ӵошен кылдытомы шузимытӥсь суретъёслы сӥзем электронной брошюраос, ӵошен поталомы валэктон ужен ёросъёсы.

Нуназеяны дас витё минут сяна дыр но ӧм шедьтэ Галина Юсуповаен. Нош кылпум ӝутоно на «Ёлочка» лагерь пумысен. Зэм, таиз сярысь вазиськоно ни меӵак министрлы. Кабинетаз дӥсьтыса пыри — воштӥсьёсызлы дораз сюрыны азьло ик гожтӥськонэз ӧвӧл. Та ужпумъя валэктоно кариськиз ачиз Владимр Соловьёв, «дублёрез» кылзӥз гинэ. Теремокез куашкатыны — жаль, туж чебер уго. Нош тупатыны коньдон ӧвӧл на. Соин ик паймиськомы мар карыны, вераз министр.

Но Соловьёвен кенешон таин гинэ ӧз йылпумъяськы. 17 час но ӝыные кутскиз кенеш. Одӥг нуналлы валтыны пуктэм чиновникъёс йылпумъянъёс лэсьтыны выризы. Ваньзы сямен пусйизы: асьмелы, пе, рос-прос кивалтыны ӧз кылды, но адӟимы, кызьы но маин уло кивалтӥсьёсмы, тодматскимы документъёсын. Кин но со телефонэз кутылэм на, жингыртӥсьёслы валэктон утчам. Но Владимир Соловьёв оскытӥз: та проект азьланяз но ужалоз. Отӥяз, оло, гуртоос но адӟем карозы но министре куриськозы. Ӵапак кивалтон нунал пыртӥ потэм устоосыз пиналъёс ик пырозы Егитъёслэн парламентазы. Ортчем нуналлы творческой отчёт дасяны косӥз 5-тӥ июльлы. Соку, пе, рос-прос кенеш люкаломы на.

Совещание йылпумъяськиз 18 час бере. Ужасьёс дор палазы шонтӥзы. Нош милям Юсуповаен ужан нуналмы ӧз йылпумъяськы на. 9 часын ӝыт городэ рейдэн потоно. Киров нимо парк дорысен Невской переход дорозь ярдуртӥ ваньмы пыдын ортчимы. Сьӧрамы вал на МВД-лэн Октябрь ёросысь ёзысьтыз Л. Яковлева, «Подростокысь» специалистъёс. Уйшор котыре но быдэ вуымтэ егитъёс калго на, вылаз ик, юо. Но тазэ газетлэн мукет номераз гожто ни. Огзэ верало: дорам бертӥ 12 час 10 минутэ уйин. Пляжысь юэм пиналъёсты утчакум, пыдкутчанам луо люкаськем. Пыдъёс тульӟылэмын. Мугор жадемын. Но сюлэм вылын сыӵе капчи: мон туннэ ӟеч уж лэсьтӥ!

Валесэ выдэме бере ас малпанъёсыным ваче син кыльыса гинэ, валай: туннэ министр луысал ке, мон тамында ужез лэсьтыны нокызьы ӧй пӧрмытысал. Малы ке шуоно Владимир Соловьёв та нуналэ Миграцияя службалэн Эшъяськон юртысь ужрадаз пыриськиз, вуылӥз Правительствоысь кенеше, пыриськиз Якшур-Бӧдья ёросысь Селычкаысь стадионэз усьтонэ. Та вань ужъёс монтэк но, министртэк, кызьы ке ортчысалзы. Нош «Психолог плюс» центрозь, оло, нокин ӧй сузьтӥськысал, барыш поттэмзы сярысь ӧй тодысал. Та понна Владимир Соловьёв люкаськем калык азьын мыным нимысьтыз тау кариз. Асэным ачим ик данъяськыны кутски: министрлэн воштӥсез луыса трос ужъёсты бералтыны луэ вылэм. Тау Галина Юсуповалы монэ бурд улаз басьтэмез понна.

Елена Фёдорова.

Удмурт Дунне
By Удмурт Дунне 29 июня, 2012 14:04