Кытчы ватскемын зэмлык?

Удмурт Дунне
By Удмурт Дунне 29 июня, 2012 13:51

Журналистъёсын пумиськыны мылкыд каризы Кун Кенешысь депутатъёс Андрей Осколков но Андрей Шутов.

Кун Кенешын тыршем сяна, та депутатъёс ужбергатонэн но выро: А. Шутов шаерысьтымы тужгес но бадӟым огазеяськонлэн — «КОМОС ГРУПП»-лэн — валтӥсь директорез луэ, нош А. Осколков валтэ «КОМОС ГРУПП» компание пырись агрохолдинглэсь ужзэ. Мар пумысен та бизнесменъёс журналистъёсын кенешыны мылкыд каризы?

Ужбергатӥсьёслэн ивортэмзыя, 21-тӥ июне Югдурез утёнъя министерствоысь нимысьтыз отряд, нокинэн кенешытэк, нокинлэсь юаськытэк, пыриз Ижысь Песочной урамысь 11 номеро юртэ — ӵапак сое арендаын возе агрохолдинг. Полицейскойёс юртэз котыртӥзы, ӧсъёсты пытсазы но огазеяськонлэн документъёсыз пӧлын бугыръяськыны ӧдъязы. Агрохолдинг ивортэмъя, таӵе ужрад ортчытэмын вал та огазеяськонэ пырись «Восточный» но «Сарапул-Молоко» огазеяськонъёсын но. Ортчытэм обыскъёс пумысен Югдурез утёнъя министерство ивортӥз: та ужрадъёс герӟаськемын коньдон лушкан учыръёсты шараян вылысь.

А. Осколковлэн но А. Шутовлэн та учыръёс пумысен чылкак мукет мылкыдзы. Югдурез утёнъя министерстволэн тазьы выремез, пе, герӟаськемын «КОМОС ГРУПП» компание пырись предприятиосты киултонэн, соосты мукет кузёлы выжтыны турттонэн.

— Ми котьку но ӟеч кусыпъёс возимы югдурез утисьёсын, — веранзэ мытӥз А. Осколков. — Ма, али но дасесь котькуд юанзылы валэктон сётыны, кулэ луись документъёсты возьматыны. Но малы компанимылэн юртэз вылэ омырсконэз? Уг луы вал шат та ужрадэз законъя ортчытыны? Таӵеез шаерамы ӧй вал ни дас ар ӵоже.

А. Осколков веранзэ йылпумъяз югдурез утёнъя министрлы А. Первухинлы вазиськонэн:

— 11-тӥ мае чузъяськем ӵектондылы, «Восточный» совхозэз вузаны куремдылы, меӵак верасько — мон пумит.

Тае министрлы ваче син вераны ӧз луы: А. Первухин та вакытэ отпускын.

А. Шутов ивортӥз: «КОМОС ГРУПП» компание пырись огазеяськонъёсын ваньзэ-ӧвӧлзэ тырше 12 сюрс адями. Соос араз 27 миллиард манет тыр продукция потто. Кылем арын та компанилэсь республикамылэн бюджетаз выт чотын вуиз 1 миллиард 349 миллион манет, нош туэ кӧня ке толэзь ӵоже — 844 миллион манет. Соин ик та компаниен герӟаськем югдур огшоры адямиос вылын уродэн уз шӧдӥськы-а?

— Соин ик милям шыпыт улэммы уг поты — огазеяськонмес ойдолэ дэмен утёмы, паськыт кенешомы та учыр пумысен, — мылкыдзэ вераз А. Шутов.

љоген асьсэ пресс-конференцизэс радъялозы югдурез утисьёс но. Та сярысь ивортӥз Югдурез утёнъя министерствоысь следствиея управлениысь следствиосты нуон ёзэн кивалтӥсь Игорь Рябов.

Елена Никитина.

Удмурт Дунне
By Удмурт Дунне 29 июня, 2012 13:51