Кырӟа-вера Нырья

Удмурт Дунне
By Удмурт Дунне Июнь 5, 2012 11:32

Кырӟа-вера Нырья

С. Сугатова.

Дуннелэн котькыӵе сэрегаз мед улоз удмурт адями, уг быгаты со асьме кырӟан-веранъёстэк. Озьы малпа Татарстанысь Нырья гуртысь Серафима Сугатова но. Кырӟаны-вераны яратӥсь кышномурт сизьым пинал будэтэ, фольклоръя «Сактон» ансамблез валтэ.

Серафима Ильиничнаен тодматским Ижын, камсьӧр удмуртъёслэн «Чакара» фестивальзы ортчыку. Татарстанысь Вылӥ Пужмес гуртын вордӥськем удмурт кышномурт Ижысь культпросветучилищеын дышетскем. Али ужа бигер шаерысь ик Нырья гуртысь культурая юртын чеберлыкъя кивалтӥсь луыса. Культурая юртазы 1987-тӥ арын кылдӥз фольклоръя но этнографияя «Сактон» ансамбль. Ӵапак соин кивалтэ Серафима Ильинична. Туэ кышномуртлы 45 арес тырмиз. Со — ялан калык пӧлын, нылпиоссэ но будэтыны, кырӟаны-эктыны но, кивалтыны но пӧрмытэ. Кызьы меда ваньмаз вутске?

— Ужед сыӵе бере, вуттытэк уг луы. Пиналъёстэ но чакласькод, будэтӥськод, пудодэ но возиськод, — пальпотэ кышномурт. — Коллективамы 15 кузя. Ваньмы ик пудо вордӥськом. Кытчы ке концертэн потӥськом ке, скалъёсмес картъёсмы кыско яке бадӟымъёсыз нылпиосмы, бускельёс юртто. Ансамблямы мынам гинэ сизьым пиналы. Но кык-куинь нылпиенъёс трос.

«Сактон» коллективысь нылкышноос, асьсэлы вашкала дӥсь утчаса, гуртъёстӥ ветлӥллям, песянайёссылэн сандыкъёсазы бугыръяськиллям.

— Вылысьтым дэреме аслам песеелэн, чырты котыр чеберъяськонъёсы но вашкала выжыосылэн ик, — данъяське Серафима Ильинична. — Нош пыдъёсамы — выль кутъёс. Соосты нимысьтыз лэсьтытӥм. Ёросысьтымы культурая управленилы юрттэмзы понна туж бадӟым тау.

Коллективамы ми тросгес асьме пал удмурт кырӟанъёсты нёръяськом. Соосты пичи дыръямы кырӟаллямы ай. Вашкала гуръёсты тодон понна гурт вылэ потаськом, пересьёслэсь юалляськиськом. Туэ «Чакара» фестивальын сюанэз возьматӥм, вуоно арын возь вылын шудонъёсты адӟытом, дыр. Репертуарамы возь шудонъёсмы трос. Солдат келян вашкала сямъёсты но возьматӥськом. Егитъёс мед адӟозы, мед паймозы.

Серафима Сугатова верамъя, ансамбльзы Удмуртиысь артистъёслэсь но кырӟанъёссэс быдэсъя, кылъёссэ, гурзэ дышето, караокея нёръяса. Аслаз нылпиосыз но кырӟаны-вераны пӧрмыто. Зэм, витез палэнэ кошкизы ни, кин ке ужа, кин ке тодон-валанзэ будэтэ. Ваньзы синмаськымонэсь. Нылкышнолэн вӧзаз кык пиналыз гинэ кылемын на. Таосыз, покчиосыз, Нырья гуртысь сцена вылын асьсэды возьматъяны пӧрмыто, ӵемысь школа мероприятиос дыръя. Нимаз висъяны умой уг поты, востэмак шуэ Серафима Ильинична но пиналъёсызлы тау каре: соос туж зол валало монэ..

Елена Панфилова.

Удмурт Дунне
By Удмурт Дунне Июнь 5, 2012 11:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<