Куртчылӥськись тузон

Удмурт Дунне
By Удмурт Дунне Июнь 20, 2012 11:35

Куртчылӥськись тузон

Тузон тэй.

Гужем вылтӥ корка котырын куддыр утялтӥськыса вуттоно ӧвӧл — бакча ужъёс вань дырез басьто. Озьы ӝажы вылъёс тузонэн шобырско ке но, кӧня ке но чидалом шуиськом, лэся.

Но тодӥськоды-а, со тузон тазалыклы бадӟым кышкытлык кылдытэ шуыса? Кыӵе гинэ бактериос, улэп макеос отын уг тымисько. Пӧлысьтызы одӥгез — тэй (пылевой клещ). Огшоры синмын сое уд адӟы. Со понна аллергиен курадӟисьёс та улэп макеез соку ик ас вылазы шӧдо.

— Тэйёс уката ярато валес котырез. Отын шуныт, мускыт, сиён но тырмыт — кӧтсэс тыро куасьмем ку лулпырыосын-клеткаосын, — вера медицина наукаосъя кандидат, нылпи врач Лариса Матвеева. — Озьы пинал нуналлумбыт шудэ, тэтча, номырлы уг ӝожтӥськы, нош ӵукна кӧлэмысь султэ но — нырыз тыремын, синъёсыз гордэктэмын. Таӵе дыръя ми соку ик дэмласьком аллергилы эскериськыны.

Семьяын аллергиен курадӟисьёс вань дыръя тузонэз ӵушалтыны дырез жаляно ӧвӧл, ӝажыос вылтӥ нуналлы быдэ но кот мучолоен ортчоно. Ӵем вошъяно валес котырез. Арнялы одӥг пол котькин но сое выльдыны кулэ ке, аллергиен курадӟисьёс — арняяз кык-куинь пол.

Кызьы пусъе Лариса Матвеева, тэйёс туж уг ярато кезьытэз. Соин ик ӟырк кезьыт дыръя валес котыръёсты дырын-дырын ураме поттано. Нялтас вераса, куд-огез небыт шудонъёсты морозильнике огдырлы тырылэ, озьы отысь тэйёсты кынтэ-быдтэ. Нош мар кароно, укно сьӧрын гужем ке? Миндэръёсты, матрасъёсты кыре поттано, сэзъяно. Тузонын улӥсь улэп макеос пӧсез но кӧсэз озьы ик уг ярато — оглюкетэз ке но бырозы.

 

* * *

Троссэ шугъяськытэ на сиён-юонлы аллергия. Нылпиослэн бамъёссы ӵемысь ӵыжыт луо апельсин-мандарин, шоколад, курегпуз сиемзы бере. Нош куддыръя соку ик уд но вала, мар бере мугоре горд виштыос пото.

— Сиён-юонъёсы али пӧртэм суретъёс ватсало, — пусъе Лариса Матвеева. — Кылсярысь, сииськом колбаса. Малпаськом, со сӥльлэсь дасямын. Но тодамы но уг лыкты, туссэ, шӧмзэ гочатӥсьгес карон понна, кемагес медаз сӧриськы шуыса, отчы кыӵе но консервантъёс уг ватсало! Соос озьы ик аллергия кылдытыны быгато.

Сак кариськоно-а, бамъёс, киос сиськем бере горд виштыосын шобырскыло ке? Одно ик. Тодӥськоды ке, марлы аллергия — сыџе сиёнэз ӝӧк вылэ пуктылонлэсь возиськоно. Угось висён пумен муре пыӵалоз. Туннэ, шуом, курегпуз гинэ сиыны уд быгатӥське ке, ӵуказе сяськаосты но зынъяны уд пќрмытэ ни, тузонлэсь ӵоксузёды, кылдыны быгатоз эмъюмъёслы аллергия, астма кырмиськоз.

Нялтас вераса: аллергиен курадӟисьёс быдэс дуннеын арысь аре тросгес луо. Дуннеысь тазалыкез утёнъя огазеяськонлэн лыдпусъёсызъя, солэн вотэсаз шедемын ог 30 процентэз адямиос, тросгес — городын улӥсьёс. Но специалистъёс верамъя, таӵеос азьланьын уката но уногес луыны быгатозы. Малыез валамон: омыр кырсёме, бакча сиёнъёсты воштыны кутскиськом полуфабрикат шуонъёсын. Озьы улон ачиз асьмемыз сакгес кариськыны косэ.

Элина Кумачёва.

Удмурт Дунне
By Удмурт Дунне Июнь 20, 2012 11:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<