Кузьмась ӧз луы ке, басьтӥсь быроз?

Удмурт Дунне
By Удмурт Дунне 15 июня, 2012 11:04

Кузьмась ӧз луы ке, басьтӥсь быроз?

Ижын нылпи садэ сюрон понна черодын 19 сюрс 562 пинал.

Ижын нылпи садэ сюрон понна черодэ туннэ султэмын 19 сюрс 562 тэшкыли. Туэ сӥзьыл шудо путёвка шедёз 6 сюрсэзлы гинэ. Таос пӧлысь ог 5 сюрсэз — 1 но ӝыны — 3 аресъемъёс. Сыӵеослы городысь яслиосын чакламын ог 300 группа.

Иж город администрациысь нылпиосты школалэсь азьвыл визьноданъя управлениен кивалтӥсь Надежда Варламова таӵе лыдпусъёсты, нокыӵе кариськытэк, шарая. Нош мынам виры ик бульыр-р-р пӧзьыны ӧдъя. Черодын 19 сюрслэсь ятыр нылпиос!

Ма, нылы вордӥськем дырысен уйёсме йӧнала уг кӧласькы ни. Свидетельство киямы вуэм бере ик, 2011-тӥ ар кутсконын, нылпи садэ черодэ султӥмы. Ми 2 сюрс 116-тӥез вал асьме ёросамы гинэ. Соку ик школа азьын визьноданъя ёзэтын меӵкытӥзы: тӥлесьтыд куриськондэс учкозы ай 2013-тӥ арын гинэ. Озьыен, отчыозь нылылы луоз ни 3 арес.

Оло, городысь управлениын югдур умойгес? Но татын но черод пӧртэм ик вылымтэ. Пӧсьвуаськыса кадь пукемме адӟыса, татысь юрист Ирина Шкляева, буйгатӥсько кожаса, лэся, эшшо огпол пӧсь кылъёсыныз ӟырдатӥз на:

— Нырысь ик путёвка висъяськомы пуштэм Чернобыль атом станциез кысонэ пыриськемъёслэн нылпиоссылы. Таос радын ик сыло Прокуратураын, судын, Югдурез утёнъя но Кышкытлыклэсь утиськонъя министерствоосын но управлениосын ужасьёслэн, Уйпал Кавказысь но Лымшор Осетиысь югдурез умоятонэ пыриськемъёслэн, отысь инвалид луыса бертэмъёслэн нылъёссы-пиоссы. Кыкетӥ интыын — полициын ужасьёслэн, военнослужащийёслэн тэшкылиоссы. Собере санэ басьтӥськом оген пиналзэс будэтӥсьёсты, трос нылпиё семьяосты, I но II группаен инвалидъёсты, очно амалэн дышетскисьёсты. Тӥ огаз радэ но уд пыриське. Озьыен, возьмалэ асьтэлэсь чероддэс.

Огзы пӧлы но уг пыриськы ке, мынам сиеме чик уг поты шат? Нылпиен пукем понна пособие тыриське 1 но ӝыны ар ӵоже гинэ. Мынам со 6 сюрс манетлэсь ортче вал. Картэ басьтэ на 15 сюрс. Но тыбыр сьӧрын ипотекаен басьтэм юртъерлы кредит. Тазэ толэзьлы быдэ 10 сюрс манетэн берыктоно. Коммунальной услугаос понна дун 2 сюрс манетозь вуэ. Озьыен, пособие вуэмысь дугдэ ке, кызьы улыны кулэ?

Ужаны одно потоно. Уждун бадӟымгес луысалыз ке, частной садэ но нылме донгысал ни. Но отчы ветлон понна толэзьлы быдэ ичизэ 8 сюрс манет куро.

 

* * *

Тодмоосылэсь кылӥ: пиналыд вордскем кылыныз вераськыны йӧндыре ни ке, кудаз ке удмурт садэ йыгаськыса, утча. Куд-огъёсыз школа азьын визьноданъя управлениосын ӵош уг ужало, озьыен, кинэ кутэмзы потэ, сое куто.

Нациосын ужан политикая министерствоысь тодӥ: быдэс республикаямы 297 нылпи сад ужа этнокультурной компонент амалъя. Со пӧлысь 21-ез — Ижын. Эх, малпасько: удмурт нылпи садэ одно ик сюром. Шедёд вылэм ай! Кытын, ку тонэ пальпотыса возьмало меда?

Огаз шумпотыса пумитазы ик. Кузёез монэ тодмаз, луоз. Картэ дорын эмъяське, сюлэмыныз учётын сылэ. Соин но, лэся, ыль-вӧй гинэ кариськиз. Шуиз: эн сюлмаськы, Любовь Дмитриевна, дыдыдэ одно кутом, кылме сётӥсько. Май толэзь вуэмъя сюлэм ӧз чида ни. Жингыртӥ. Нырысь-валысь Ира апай посӥськыны кутскиз: 28-тӥ мае, пе, списокмы дась луоз ай, соку тододы ни путёвка пумысен. Ми тӥледыз кутомы, но асьтэос валаськоды, дыр, милемлы юрттэт кулэ. Собере ачиз ик куалектӥз, шӧдске — телефон пыр вераськон ӧвӧл, пе, та, кабинетам лыктэ.

Пуля кадь лобӟи дораз. Пукон вылаз лэзиськыса вуттӥ гинэ, Ира апай куаретӥз:

— Ӝӧк вылысьтым компьютерме адӟиськоды-а? Табере ноутбук кулэ на. Дунозэгес но чидасьсэгес кузьманы соглаш кариськоды-а?

— Ма, мынам сомында уксёе ӧвӧл, — гуньдылыса-гуньдылыса вази пумитаз.

Малпай вал уго: ог 5-10 сюрс манет куроз но тырмоз. Нош кузё кышномуртлэн ымныр тусыз кескичлэсь но кескич луиз. Ымпумъёссэ кырыжъяса ик юаз:

— Кӧня сётыны быгатоды? 20 сюрс манет ке но вае. Тӥ валаськоды, дыр: тӥледыз жаляса кутӥмы ни. Группамес но паськытатӥмы 20 пиналозь. Законэз тӥямы тӥледлы луыса. Шугъяськиськоды ке, мукет мурт ӝог шедёз — куриськисьёс лачак. Ӵуказе коньдонэн лыктэ ни.

 

* * *

Кытчы пырод? Пунэмаськи. Ӵуказеяз 8 часын ик телефонэ ӟырдаз. Ира апай вылэм. Али ик, пе, коньдон кулэ: воспитательдэс дышетскыны ыстӥськомы, визь-нод люкамез понна дун тыроно.

Садэ ӝоггес вуон понна таксилы но уксёме ӧй жаля ни. Путёвкаез гинэ келяно ӧвӧл. Бызьыса туби кабинетаз. Пань-пань пуке. Ымныр тросаз мыня. Ойдолэ, пе, бухгалтерие васьком. Мон, пе, со уксёез аслым уг куриськы ук — садлы.

Но бухгалтер мон азьын ик «ӵыжаськыны» кутскиз. Банк пыр, пе, садэ ыстэ уксёдэс. Али ваньмыз озьы лэсьтӥське. Мон, пе, нокыӵе документ уг пӧра — ас вылам мултэс кыл кутон уг басьты. Сад кузё валэктыны выриз ик: али ик коньдон кулэ, банкен герӟаськыны дыр воксё ӧвӧл. Бухгалтер югдурысь потон амал шедьтӥз: расписка, пе, гожтэ. Кузё бумага ӵабышъяны кутскиз. Нимтулзэ но быдэс ӧз пусйы, паспорт даннойёссэ но ӧз гожты. 20 сюрс манетме басьтӥ шуыса гожтӥськиз. Зэм, бухгалтерез печать пуктытӥз на.

Сыӵе серемес документ мон кие вуэм бере, кузё монэ кунултыса ик ураме поттӥз. Пал кияз — мынам уксёе. Сое бухгалтерие ӧз кельты. Шуиз: эн сюлмаське, табере садэ одно ик шедёды. Огкыл гожтыны лыктэ август пумын. Соку ик, пе, нылдэс но садэ нуллыны кутскоды.

* * *

Огкыл нылпи садэн ӧй гожты на туннэ ке но. Киям расписка шуон гинэ вань. Сюлэм али ке но куалекъя: уз алдалэ меда?

Зэм, луэ вал югдурысь мукет сямен но потыны. Сьӧре диктофон кутыны. Прокуратураын ужасьёслы чагиськыны. Сад кузёез ӝог кырмысалзы. Юн йӧттысалзы на. Должностной полномочиоссэ мултэс йылтэмез понна 4 арозь пытсэт сьӧры келясалзы. Вылаз ик, штраф лякысалзы. Быдӟалазэ тупатысалзы кутэм уксёлэсь кызь поллы бадӟымгес. Эшшо куинь ар ӵоже удысаз берытскыны ӧй лэзьысалзы на.

Ваньзэ тае вера Удмуртиысь Прокуратураысь быдэ вуымтэослэн но егитъёслэн правооссылэсь быдэсъяськемзэс эскерись прокурор Анна Ващенко.

— Садъёсы зэмен ик ас мылкыд каремъя уксё сётыны луэ, — йылтэ Ващенко. — Быдӟалаез 1 сюрс манетлэсь ортче ке, анай я атай нимысьтыз куриськон гожтэ. Со уксёез садлэн расчётной счётаз ыстоно. Но сад кузёлэн кияз сётоно ӧвӧл. Жаль, улонын та ӵемысь ас мылкыд каремъя уг лэсьтӥськы. Но законэз учконо ке, кужмысь карыны кузёослэн правозы ӧвӧл. Куддыръя соос сьӧраз ортчо: толэзьлы быдэ маке понна уксё бичало. Я шудонъёслы, я тусьты-пуньылы, я азбар ӵужисьлы. Ваньмыз та понна бюджетысь уксё вуэ. Соин ик, анай-атайёс коньдон тырытэк но быгато. Зол пачкато ке, собраниосын нимтулдэс поттыло ке, тыриськонлэсь палэнскиськоды шуыса, сыӵе дыръя вазиське Прокуратурае. Уксё ӧд сётэ ке, сад кузёлэн правоез ӧвӧл нылпидэс группае басьтытэк кельтыны. Озьы кариз ке, дыртэ судэ — кивалтӥсез пытсэт сьӧры пуктозы.

 

* * *

Мон та косэмзэ быдэстысал ке, нылпи садэ сюрес быдэс арлы пытсаськысал на. Со сяна, мукет садъёсы озьы дауртэме сярысь ивор ӝог вуысалыз. Озьыен, нылы шоры котькытын кырыж учкылысалзы. Ваньзэ тае лыдэ басьтыса, пиньме зол-зол куртчисько. Буйгатӥсько асме: мынэсьтым гинэ коньдонме озьы уг кыско, мон кадьёс уно. Мед узырмозы ни ойдо сад кузёос. Ӝоген садъёс тросгес ӝутӥськозы. Озьыен, путёвкалы дун уз пуктэ. Оскем потэ талы.

Любовь Андреева.

Удмурт Дунне
By Удмурт Дунне 15 июня, 2012 11:04