Калык бӧрсьы ветлыны дышемын ӧвӧл

Удмурт Дунне
By Удмурт Дунне 18 июня, 2012 09:17

Калык бӧрсьы ветлыны дышемын ӧвӧл

Г. Макарова (шорысез) ӵош ужась эшъёсыныз.

Тодматскыны кылдӥз республикаысьтымы лек пыктосъёсын нюръяськонъя диспансерысь эмъясь сузэрен Галина Макароваен. Йӧнатон удыслы 40 арлэсь ятыр улонзэ сӥзиз ни, пенсие потэмын ини ке но, сюлэмыз кыске уже.

Галя вордскиз но будӥз Кизнер ёросысь Гуӵин-Бӧдья гуртысь Егоровъёслэн семьяязы. Ваньмыз вал калык радъя: анаез-атаез колхозын тыршизы, куинь нылъёссэс будэтӥзы. Шудо вал, дыр, соос, анайзы висьыны усьытозь. Галя тӧдьы халатэн апайёслэсь азьвыл кышкалляз ке, али чидатэк соосты возьмаз: ку меда анайзэ эмъялозы. Соку ик тодэ вал ини: будӥз ке, эмчи луоз. Анаез ноку но уз ни висьы. Но со ӧз катьяськы ни. Галилы соку 5 арес гинэ вал…

Егоровъёслэн семьяязы чидантэм мӧзмон каръяськиз. Нылъёслы анай кулэ. Соку атайзы бултыр кышно вайиз. Сюранай корка пыремен, Галилы шуныт воксё ӧз луы. Мурт нылпиосты со обидиз, шуыны уз луы, но нуныяны но ӧз вала. Уже кошкыкуз, индылӥз: ӵужкушманэз уроно, ву киськано, азбарез ӵужоно. Гали туж чырткем будӥз. Куремез кема витьытыны ӧз яраты. Анаезлэсь косэмзэ но чаль гинэ быдэсъяз: ӵужкушман уремын, ву киськамын, азбар ӵужемын… Эшшо вуттӥськиз на выж миськыны.

Сюранаез тани ужысь бертӥз. Нылашлэн ужамзэ адӟытэмез потэ, ку меда ушъялозы ини? Но анай сое уг ик синйылты. Таӵе дыръя бам кузяз васькись синвуоссэ нылаш лушкемен кимыш вылыныз ӵушалтылӥз…

Тырмымтэ яратонэз со понна сётыны тыршиз атаез. Школае собраниосы но со котьку ачиз ветлылӥз. Бертэ но Галиезлы вазе:

— Умой, нылы, умой. Ушъязы тонэ. Тазьы ик дышетскы.

Зэмзэ но, Галя Егорова школаын туж умой дышетскиз. Диктантъёссэ котьку «5»-лы гинэ гожъяз. Пиослэсь куасэн бызьылонъя бере ӧз кыльылы. Школазэ йылпумъяз данъян грамотаен.

Табере кытчы? Тунанэз ӧй вал: сюресэз кемалась быръемын ини — медучилищее. Со луоз эмчи. Озьы Галя луиз Можга медучилищеысь студентка. Кизнер ёросысьтыз ик Вуж Бӧдья гуртэ фельдшер луыса вуиз. Калык солы тодмо. Вордскем Гуӵин-Бӧдьяез угось артэ.

Ужез вӧй вылтӥ кадь кошкиз, уд шуы. Гуртысь азьвылэз медпункт ӝуам. Вылез буш борддоръёсын пумитаз. Кулэяськонлэн пумыз ӧй вал. Но ужез кызьы ке ачиз ик радъяськиз. Егитъёс сое бырйизы асьсэлы азьветлӥсе — интыысь комсомол огазеяськонлы секретаре. Со сяна, Галина Гавриловна сельсоветлэн депутатэз луиз. Егитъёс, огазе люкаськыса, кенешо: медпунктэз штукатурить кароно. Малпамын — лэсьтэмын. Толлы быдэс машина пу вуттӥзы на. Утялтӥськон нунал ортчытӥзы.

Озьы тӥни утчась мурт котькуд ужпумлэсь йӧнзэ шедьтылӥз. Ваньмон дырыз чик ӧй вал. Нуназе-а, уй-а, ужан нунал-а, шутэтскон дыр-а — гуртысь фельдшер пыд йылаз.

Бызён нуналаз гинэ но куинез кышноос нуны вордыны дасяськиллям. Кизнерысь нылпи ваён юртэ келятэк ӧйлась…

* * *

Улон сюрес Галина Гавриловнаез малпамтэ шорысь вуттӥз Феодосие, кыдёкысь Сьӧд зарезь доры. Сьӧд зарезь флотысь мичман Миша Макаров кузпалыз луиз. Та пияш кемаласен синйылтэм вылэм ини Галя Егороваез. Ма бен нылмурт но сое умой тодэ: одӥг школаын дышетскизы, визьмо пи, эшъёсыз пӧлын висъяськылӥз усто суредаськеменыз. Но улон тазьы берытскоз шуыса, кин малпаз.

Галя со нуналэ мемиеныз возь вылын турназ. Мажессэс вунэтӥллям но, нылаш часталы гинэ гуртаз бертӥз. Нош доразы куноос — ныл курасьёс. Ма кароно? Берен возь вылэ бызиз, но мемиезлы курасьёс сярысь ӧз вера. Ужзэс йылпумъяса берто но, куноос соосты возьмало на.

Галя со нуналэ соглаш луэмзэ ӧз вера — усьтэм укноетӥзы пегӟыны быгатӥз. Нош Миша кузпалтэк ке но кошкиз, мылкыдзэ воксё ӧз куашкаты. Галя бордысь ӧз мозмытскы ни.

Галина Гавриловна Макарова кыдёкысь Феодосиын но ӧз ыштӥськы. Ужаны интыяськиз нылпи больницае. Улон интыез ужан больницаеныз артэ. Укноысен адӟиське Сьӧд зарезь. Вордӥськиз нылзы. Ваньмыз умой кадь. Но маза ӧз сётэ вордскем палъёссы. Лена нылзы нырысетӥ классэз йылпумъяз ни вал, Макаровъёс берен сюрес вылэ потӥзы, Кизнеразы интыяськизы. Ар ортчыса, Феодосиысь квартиразэс быгатӥзы Ижевскысь квартиралы воштыны. Нылзылы умой образование сётэмзы потӥз.

* * *

Кайгу ваньзэ тугаз-пожаз: улонысь кошкизы анай-атаез но, кузпалыз но. Нылыз ӵапак соку йылпумъяз школаез. Зарни медален. Галина Гавриловналэн Ленаез Удмурт кун университетэз горд дипломен йылпумъяз, сюлэмызъя уж шедьтӥз. Табере со аслэсьтыз семьязэ но кылдытӥз ни, будэ нылыз. Бордаз улыны басьтӥз анайзэ но. Галина Гавриловна пумтэм яратэ нуноксэ, вань сюлэм шунытсэ сётэ солы. Школае келя-пумита. Нылаш но ӵужайзэ ӟеч дышетскеменыз шумпоттэ.

Нош ужез Галина Макаровалэн тырмыт. Медицина удыслы 42 арзэ сӥзиз ни, со пӧлысь 25-сэ — лек пыктосъёсын нюръяськонлы. Онкодиспансере котькуд нунал сямен выль но выль висисьёсты пырто. Куддыр, палатаос тырмымтэен, коридорын кыллисьёс но луо. Врачъёс, валамон ини, котькудӥз доры нокызьы но уг вуо. Соосты чаклан-утялтон усе эмъясь сузэръёс вылэ. Ужан нунал онкодиспансерын пичи кенешон ортчытонысен кутске. Медсестраос иворто эмъяськисьёслэн тазалыксы сярысь. Отӥяз эмсузэръёслы ӵукнаысен бер ӝытозь пуксён дыр уг шедьы. Куддыр суткалы но ужаны лыктоно луэ: уг тырмо ужась киос. Галина Гавриловна пенсиын ини ке но, аслаз чырткемлыкезъя егит нылъёслы уг сётӥськы. Кулэ ке, коридор кузя спортсмен кадь тапыр гинэ бызьыса кошке, кулэ ке артист но луэ. «Сӥзёнъёсын книгаын» юнме шорысь пусъемын ӧвӧл Макарова медсестралэн «гомерической» серекъямез но «искромётной» юморез.

Май шорын ортчиз онкодиспансерысь эмъясь сузэръёс куспын вожвылъяськон. Конкурсын ваньзэ лыдэ басьтӥзы: кызьы ужзэс тодо-быдэсъяло, кызьы висисьёсын, ӵош ужась эшъёсынызы огкыл шедьто… Гинекологияя отделенилэсь данзэ утьыны оскизы бадӟым опытэн эмсузэрлы Галина Макаровалы. Мон калык бӧрсьы ветлыны дышемын ӧвӧл, шуиз Гавриловна, конкурслы дасяськыкуз. Озьы ик луиз. Со шедиз вормисьёс радэ — кыкетӥ интые потӥз!

Таӵе вормонъёсыз Галина Гавриловналэн луозы ай, вылды. Но аслыз эмъясь сузэрлы котьмалэсь дуно йӧнатӥськемъёслэн пальышамзы, ӟеч мылкыдзы, ӟеч кылзы.

Елена Смирнова.

Удмурт Дунне
By Удмурт Дунне 18 июня, 2012 09:17