Кадырлы кошкиз тетера но паронка

Удмурт Дунне
By Удмурт Дунне Июнь 26, 2012 14:46

Кадырлы кошкиз тетера но паронка

Яган-Докьяысь нылкышноос - «Удмурт дуннелэн» азбараз.

Азьвыл номерамы ялӥмы вал: Гербер праздникын «Удмурт дунне» газетмылэн азбараз усьтӥськоз «Лудорвай шаньга» вожвылъяськон. Отчы пыриськыны быгатӥзы пыжкемъёсын но пӧртэм сиён-юонъёсын, чебересь кылбур чуръёсын но кырӟанъёсын лыктэм нылкышноос.

«Удмурт дуннелэн» азбарез сюрес дурынгес вал бере, тросэз отчы кожатэк ӧз чидалэ: одӥгез газетлы гожтӥське, мукетыз книга басьтэ.

Дас час котырын азбарамы огыр-бугыр луиз. Пиосъёсмы самоварзэс дымбыр кенжытӥзы. Тани сиён-юон но ӝӧк вылын ини. Нош час ортчыса, дорамы вуизы Пичи Пурга ёросысь Яган-Докья черкогуртысь шумприч нылкышноос. Пӧлазы кык-куинь воргоронъёссы но вань.

— Газетысьтыды «Лудорвай шаньга» ялонэз адӟыса, уйбыт, ява, ӧм изе ни, — ве-ра гуртысь нылкышноосты ӵошатсконэ пыриськыны ӝуткась Людмила Посадова. — Та вожвылъяськонады ми но малпамы аспӧртэмлыко шаньгиосмес вайыны. Турлы пумо соос пӧрмизы: ӝукен, картошкаен, кузятэмен, сӥ-льын, йӧл вылэн но мукет. Катлама шаньгамаес но вайимы.

«Удмурт дуннеос» вӧзы яган-докьяос тыпыр-тапыр гинэ ӝӧк пуктӥзы, асьсэлы сэрег усьтӥзы. Нылкышноос киужъёссэс ошылӥзы. Ӝӧксы шоры ик самовар пуктӥзы, со вӧзы — возь вылысь сяськаен ӵош ӵыж-ӵыж кисьмам борыен керттэт. Пӧртэм ческыт зыно турын-куаръёсын, бакча емышъёсын пӧзьтэм варенняен чай но компот удӥзы. Али бичам емышмес замлагач (нырысьсэ веръям), пе, каре. Нош кин ӟеч азе няньтэк но пӧсятэмтэк потоз? Яган-докьяос но асьсэос ик нянь сукыри пыжиллям, пӧсятэм дасяллям. Пӧраськемъёссы пӧлын эшшо одӥг аспӧртэм сиёнзы вань на — тари ӝукен тетера.

Пӧрамзэс кадырлы карыса, шуласа ик няньлы сӥзем шулдыресь кырӟанъёссэс кисьтӥзы. Арганчизы Галина Сайхутдинова. Галина Ивановна гуртазы культура юртын тырше, ӵапак та нылкышноосын — «Капчи мылкыд» ансамблен — кивалтэ. Жин-жин кырӟамез кылыса, калык азбарамы муш палэп сямен кыстӥське. Ваньзылэн ӝӧк вылысь гочатӥсь пӧрам сиёнъёсты верамъямзы, синмаськымон киужъёсты киосынызы кутылэмзы потэ. Аслэсьтыз куэм ковёрзэ ваем Галина Домнина, нош чильпам-керттэм но пужъятэм ужъёссэ — Анна Венчикова.

Собере азбарамы Дэри ёросысь Пальник гуртысь «Тюрагай» ансамбле ветлӥсь нылкышноос вуизы. Таосыз но дорамы пӧрамзэс вайиллям. Жингрес кырӟанэн ӝӧк вылэ пуктӥзы ческыт мильымзэс но кыстыбейзэс. Вӧзаз — пичи ведраен тыраз пӧзьтэм сяртчы (паронка).

— Ялондэс адӟыса, ми но ӵошатсконэ пыриськыны мал-

памы, — вера ансамблен кивалтӥсь Елизавета Баушева. — Уйбыт нылкышноосмы пӧраськизы: кин мильым пыже, кин ӝук пӧзьтэ. Ачим паронкаен выри.

Зэм ик но, кин уг яраты та вашкала сиёнэз! Вӧзамы «Известия Удмуртской Республики» газетлэн азбарез вал, эсьмаса, соос но паронказэс курыса сиыны кутскизы. Тодосчи Людмила Христолюбова но, йырзэ бергатыса ик, ческыт сиёнэз шӧмъяз. Пӧзьтэм сяртчыез, пе, пичи дыръям яратыса сиисько вал.

Кияса ёросысь Вуж Тӥ-гырмен гуртысь нылкышноос сьӧразы перепеч вайиллям. Пӧраменызы кырӟаса-вераса калыкез утялтӥзы. Кин тодэ, оло, эшшо но вожвылъяськонамы пыриськыны мылкыд карисьёс вал на. Но сомында калык пӧлын зэмзэ но йыромод, ява. Азбаръёс губи мында трос сылӥзы.

Вожвылъяськонын ныры-сетӥ луизы яган-докьяос. Ӝӧк выл тыр аспӧртэмлыко дасям сиён-юонэнызы соос вань калыкез паймытӥзы.

Котькудӥзлы ӵошатско-нэ пыриськем коллективлы «Удмурт дунне» кузьымъёс сётъяз. Гуртоос ужрадысь капчи мылкыдын бертӥзы, одӥг ымысь кадь шуизы: «удмурт дуннеос» доры лыктоно ке ӧм луысалмы, кытысь ай ми адӟысалмы Герберез. Эсьмаса, «Удмурт дуннелэн» азбараз Президент Александр Волков но кожаз. Ку милемлы соин артэ сылыны шуд усьысал ай…

Любовь Тихонова.

Удмурт Дунне
By Удмурт Дунне Июнь 26, 2012 14:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<