Кадетлы — карабин но бал

Удмурт Дунне
By Удмурт Дунне 27 июня, 2012 10:49

Кадетлы — карабин но бал

Президент дорын кенешонэ пыриськизы егитъёс но.

Егитъёслы Атыкай музъемез гажан мылкыд пыӵатон нырысь интыын сылыны кулэ. Соку гинэ огсыр улон азинскыны быгатоз. Тазьы лыдъя Удмуртиысь егитъёсын ужанъя министр Владимир Соловьёв. Ӵапак талы сӥземын вал Александр Волков Президент дорын паськытатэм кенешон.

Владимир Соловьёвлэн верамезъя, туннэ республикаямы ужа вордскем музъемез гажаны дышетӥсь 140 огазеяськон. Со пӧлысь 32-ез — нылпиослэн. Нимысьтыз пусйыны кулэ, дыр, «Долг» огазеяськонэз. Татчы пырисьёс кылем арын куинь пол бадӟым экспедицие потазы, Быдӟым ож вакытэ быремъёсты но ватытэк кылемъёсты утчаса. Вуылӥзы Ленинград, Тверь улосъёсы. Соослэн тыршеменызы шараямын но рос-прос ватэмын 106 красноармеец.

Азьвыл аръёсы Атыкай музъемез гажанлы сӥзем ужрадъёсы республикаысьтымы 100 сюрс пала егитъёсты кыскыны луэ ке вал, туннэ лыдпус 130 сюрсозь вуэмын. Озьыен, пинал калык валаны кутскемын: соос бордын улон но азинскон, дорын гинэ пуконлэн толыкез ӧвӧл. Егитъёсын умой ужало Сарапулын, Воткаын, Алнашын, Сюмсиын, Балезиноын, Эгралан.

— Оло, соин но туэ Пероггуртысь ДОСААФ-лэн аэроклубезлэн базаысьтыз армие мыныны дасянъя курсъёсысь школьникъёс ӧз пегалэ ни. Азьвыл аръёсы военной дисциплинаез но режимез куд-огез уг чида вал, — пусйиз Владимир Соловьёв.

Зал тыр люкаськем егит азьветлӥсьёсты, кивал-тӥсьёсты Александр Волков оскытӥз:

— Матысь кык-куинь ар ӵоже ДОСААФ-лэсь базазэ эшшо но паймымон каромы, Россиысь вань улосъёс милесьтым адӟем карозы ай. Отын егит пиослэсь армия шоры кырыж учконзэс шонертыны выромы. Соосын ужалозы психологъёс, офицеръёс. Ваньмыз туэ та пыртӥ потэм пиос шумпотэмзэс веразы ни: сурон сапег кутчанлэсь но киямы автомат кутонлэсь кышкамысь дугдӥмы. Гужем ӵоже 420 призывникез лагерь пыртӥ поттомы.

— Пероггуртэ мон таяз аре ачим вуылӥ, — шуэ Ижысь «Патриот» клубе ветлӥсь Саша Перевозчиков. — Аслым ачим осконэ ик будӥз, ява. Юнме шорысь дедовщина шуонэн кышкатъяло. Ачид кужмо кариськид ке, чидась луид ке, тонэ нокин но вӧсь уз кары, уз ултӥя.

Атыкай музъемез гажан мылкыд пыӵатоно нырысетӥ классысен ик. Тазьы шуэ Ижысь 43 номеро школаысь кадет классъёс понна кыл кутӥсь, запасысь подполковник Сергей Филин. Туэ со нырысетӥ классэ мынӥсьёс пӧлысь кык группа бичаз. Анай-атайёссы туж куризы: мынэсьтым но пиналме кутэ. Берло вить ар ӵоже лыдпусъёс возьматӥзы уго: кадетъёс пӧлын дисциплина юн, тодон-валанзы усто. Ог-огзылэсь адӟем карыса, пиос эшшо умойгес луыны тыршо, Россиысь ӵошатсконъёсын нырысетӥ интыосты басьто. Уноез улонзэс герӟало МВД-ен.

— Мынам туннэ кык малпанэ вань. Огез — карабинэн ыбылӥськыны бы-гатӥсьёслэсь бадӟым группа кылдытэме потэ. Туннэ отчы 4 мурт ветлэ. Мылкыд карисьёс трос. Но карабин уг тырмы. Одӥгез сылэ 8 но ӝыны сюрс манет. Кыкетӥез льӧль малпанэ: арлы огпол ортчытъяно бал. Пиналъёсты уго строен йыг-йыг вамышъяны гинэ ум дышетӥське. Эктыны но, кырӟаны но, калыко интыын астэ ӟеч возьыны но валэктӥськомы, — шуиз Сергей Филин.

Таин быдэсак соглаш кариськиз Александр Волков но. 6 карабинлы, пе, уксё шедьтом. Бал ортчытъян пумысен но кылзэ сётӥз.

Елена Фёдорова.

Удмурт Дунне
By Удмурт Дунне 27 июня, 2012 10:49