Интернет — алдар дунне

Удмурт Дунне
By Удмурт Дунне 27 июня, 2012 11:01

Интернет — алдар дунне

Дышетӥсь, депутат, крезьгурчи Александр Малков.

Алнаш районысь Вуж Шудья гуртысь Александр Малков — ёрос Кенешысь тужгес егитэз депутат. Солы 27 арес. Но тыршемезлэн емышъёсыз адӟисько ни: гуртысьтызы вань урамъёсы гумыос кузя табере ву лыктэ. Крезьгур дуннеын но ассэ возьматыса вуэ. Алнаш шор ёзо школаын дышетэ, ансамбль кылдытӥз. Сашалэн аслаз гожтэм кырӟанъёсыз но 25 пала люкаськизы ни.

— Депутат, дышетӥсь, композитор. Куинь лудкечез кутыны секыт ӧвӧл-а, Саша?

— Та удысъёс ог-огзылэсь воксё пӧртэмесь кадь. Но огез шуак пӧрмемысь дугдэ ке, куректыны усёнтэм вылысь мукетаз зымиськод. Отысь аслыд кужым шедьтӥськод но азьлань вамыштӥськод. Депутатын асме ӵапак таӵе муген эскероно кариськи. Малпай: улонысьтым, оло, мазэ ке воштоно? Композитор — ас югдаз улӥсь адями. Со дуннеысь огдырлы потон понна ик быръёнъёсы пыриськи. Ас пушкад гинэ улыса, азгынмод ук. Шӧдӥсько вал: кужыме вань адямиослэсь сюлмаськонъёссэс шӧдыны, сэрттыны-пертчыны.

Зэм, шорам кырыжгес учкылӥсьёс но вань. Шудьяын 300-лэсь трос улӥсез. Куинь урам. Кыказ ву лыктэ вал. Нош Выль ураме со ӧз вуылы малы ке. Адямиос карнанэн ведраен гурт кузя бызьылоно луылӥзы. Та югдурез тупатоно кожай. Ромашкино муниципал кылдытэтэн ӵош Выль ураме гумыос лэсьтӥм. Шумпотоно кадь: ву лыктэ! Но паймоно, табере со мукет урамъёсы лябгес бызьыны кутскиз. Аслым ачим ву лушкась кадь потӥсько. Но таин буйгаме уг поты. Гуртысь сюресэз лэсьтоно вал на. Егитъёслэсь улонзэс но кызьы ке радъяме потэ. Ансамбле ке но соосты люкано. Школаын дышетӥсьёслэсь ансамбльзэс кылдытӥ ни. Воксё тэшкылиосын но ужасько. Но кужыме эшшо но вань на. Ансамбль кылдытыса гинэ, луонлык вань чебересь удмурт кырӟанъёсты калыке вӧлмытыны. Урокъёсам удмурт кырӟанъёсты ӵемысь кутӥсько. Куддыръя аслэсьтымзэ шудӥсько. Нылпиослы пичиысен ик пыӵатэме потэ удмуртлыкез гажан мылкыд. Зэмос крезьгур гинэ сое мур валаны юрттоз, сюлэмзэс бугыртоз.

— Та малпанъёсыд радын ачид сярысь сюлмаськон вань-а? Тынад арлыдад уноез пиос семья кылдыто ни, шуисько.

— Сюлэм вӧсьме чепыль­тӥд. Ачим сокем бырйиськись ӧвӧл кадь. Но туннэ монэ пумозяз валась ныл ӧз сюры на. Семья кылдытэме юн потэ ке но, творческой адямиен улыны туж секыт, дыр. Ми куддыръя воксё мукет дуннеын лобаськом ук. Урокъёс ортчытэме бере одӥг-ог пыдын бертылӥсько. Алнашысен Шудьяозь ог 5 иськем. Автобус но вань, вӧзтӥ ширтӥсь машиналы но киез ӝутыны луэ, но отчы но, татчы но пуксем уг поты. Кин тодэ, оло, аслам машинае луиз ке но, руль сьӧрысь васькало пыдын сюрес вылэ. Оген гань-гань вамышъяку, тод вал, макем чебересь гуръёс лыкто йыре! Нокин мур малпаськыны уг люкеты. Кисыысьтыд карандаштэ но блокноттэ поттӥськод но сюрес дурын ик нотаос суредаськод. Вӧзтӥ ортчисьёс, оло, шузи кожало. Но соку тон нокинэ уд адӟиськы, уд кылӥськы ни.

— Ку нырысьсэ шӧдӥд крезьгур дуннее кыстӥськемдэ?

— Син азе кылемын таӵе суред. Мыным вить арес. Нылпи садын эшъёсы чебересь шудонъёс котырын бергало, нош мон пичи пуконэз арган карыса зӥбылӥсько. Ачим ик кыӵе ке гурез но кырӟасько. Аслым ачим атае кадь потӥсько. Со уго арганэн но, гитараен но шудэ.

Пуконэз арганэз сямен кыскамме воспитательёс адӟытэк ӧз кыле. Соос ик монэ нылпи садысь басьтыны лыктэм ӵужаелы ваньзэ сипыртӥллям. Таизлэн сюлэм чидамтэ ни: мыным пичи гармошка басьтӥз. Атае одӥг-кык гур пуктыны валэктӥз. Собере ачим мар но со йӧндырыны выри ни.

Отӥяз, гур пуктыны умойгес пӧрмытэмея, школаысь баян шоры учкылыны кутски. Но мугор ӟызыен мон сое ӧй вормылы. Монэ жаляса, ӵужмуртэ 7-тӥ классын дыръям кузьмаз пичи аккордеон. Сое мон сьӧрам нуллӥ, кыӵе ке ужрадъёс дыръя концерт пуктыны косыкузы.

— Сценалэсь возьдаськон ӧй вал шат?

— Сцена вылэ тубемлэсь азьвыл ик, коркась потэме бере, Шудьялась урам кузя клуб дорозь мынытозям, арганэн шудыса-кырӟаса вамышъясько вал. Огпол гинэ му пыр вияй. 8-тӥ Мартлы сӥзем концерт. Сцена вылэ потӥ нылъёсын. Аккордеонме кыскыны кутски но гурзэ воксё вунэтӥ. Пельёсыным валче гордэктэмме адӟыса гинэ, нылъёс югдурез валазы но кырӟанзэс асьсэос мытӥзы. Озьы гинэ гурез тодам лыктӥз.

— Композиторъёс пӧ­лысь кинэ ке Инмар чот кариськод-а?

— Николай Постниковез но Пантелей Кузнецовез. Соослэн кылдытэм гуръёссы калыклэн сюлэмаз туж пыро. Соослэн гинэ гуръёсазы вашкала удмурт сям кылемын на. Ачим мон — Николай Постниковлэн дышетэм пиез. 7-тӥ классысен со мыным валэктӥз баянэз кыткыны, кыскиз чебер крезьгур дуннее. Николай Елисеевич шоры котьку данъяськыса учкылӥ: туж таланто адями ук та! Со дорозь одӥг миллиметрлы ке но сузьтӥськыны вырылӥ. Кыӵе ке кырӟан гожтӥсько ке, соку ик дораз мынӥсько вал. Ачиз но ноку ӧз палэнтылы, пыжосме ӧз курлалля. Мон солы, со мыным сюлэм вӧсьмес но шумпотонмес усьтылӥмы. Берло аръёсаз улон-вылонэз уката секыт вал уго: семьяез куашказ, кышноез, нылпиоссэ кутыса, Алнашлэсь кыдёке кошкиз. Оло, пиналъёсызлэсь мӧзмеменыз но, мон котыре кыстӥськылӥз, мыным пие шуыса гинэ вазиськылӥз. Сюлэмыз тымиськыса улэмен ик, берло дыре Николай Елисеевич трос ӝож гуръёс но кылбуръёс кылдытъяз. Аслэсьтыз вӧсьсэ озьы буйгатъяз со.

— Ачид аслэсьтыд­ вӧсьтэ кызьы капчия­тӥськод?

— Баянме кутӥсько. Но мон ачим кылъёс уг гожъяськы. Инмар сыӵе быгатонлык сётымтэ. Соин ик утчаськоно луэ. Алнаш черкогуртысь ик Олег Батуев врачлэсь кылбуръёссэ берло дыре улӟытъясько. Мынам аресэлы тупась чуръёс гожтыны шедьтэ со. Лидия Нянькиналэсь, Александр Белоноговлэсь, Пётр Кубашевлэсь кылбуръёссэс но крезьгур дэремен дӥсялляме вань.

Али мон киын утиське Николай Постниковлэн рукописьёсыныз но нокытын потамтэ кылбуръёсыныз, нотаосыныз чемоданэз. Малы ке сыӵе ваньбур аслаз семьяезлы воксё кулэ ӧз луы. Куштыны корказяз поттӥлям. Мон жаляй но аслым синпельлы басьтӥ. Николай Елисеевичез ватэм бере огшап ортчыса, бумагаосаз бугырскыны ӟигар шедьтэме бере чемоданэз усьтӥ но пайми: мар но ӧй кылдытысал на та дано адями, улэп луысалыз ке! Пӧлысьтызы ик шедьтӥ пӧртэм кылбуръёсты. Таос вылэ ноку крезьгур золъямын ӧвӧл на.

Куддыръя уйин сайкасько, пель сьӧрам гур чузъяськемысь. Ӝоггес киям баян кутӥсько, медам вунэты шуыса. Тазьы но луэ: Николай Елисеевич вӧтатэ кадь, кыӵе ке гурез возьматыса. Со монэ озьы али но дышетэ. Кылчинэ кадь. Оло, соин но школаын маке пӧрмемысь дугдэ ке, буйган понна Николай Постниковез тодам вайисько: мар ай та мыным верасалыз?

— Туала егитъёс школае дышетыны уг мыно ни…

— Пичи уждунэзлэсь но секыт нылпиослэсь кышкало, вылды. Можга педколледжез йылпумъяса, 7 ар ӵоже дышетӥсько ни нылпиосты крезьгурлы. Со сяна, психологлэсь дипломзэ басьтӥ. Валасько: арысь аре пиналъёс воштӥсько алама пала. Азьло нылпиосты гитараен шудонъя кружоке но капчигес кыскыны вал. Туннэ та удысэз, мон сяна но, валтӥсьёс сюро ни. Но нылпиос отчы, одӥг-кык ӝыт сяна, уг ветло — тунсыкъяськонзы ӝог кысэ.

Туала дыдыос-экеос Интернет дуннее выемын. Урокын но маке валэктыку, куд-огез телефонэнызы шудыса пуко ни. Талантсы но вань, кырӟаны но быгато, азьтэмзы но бадӟым ӧвӧл. Но Интернет дуннеысь, шудон дуннеысь поттыны соосты шуг. Оло, соин но мон уг яратӥськы Интернетэз. Мынам «ВКонтакте» сайтын баме но ӧвӧл, эшъёсы усьтыны ке но косо. Отын, пе, луонлыкъёсыд паськыталозы гуръёстэ вӧлмытыны. Но со кезьыт дунне монэ бордаз уг кыскы. Пӧяськон дунне со. Адямиос ог-огенызы кусып тупато, ог-огзылы гожтэтъёс лэзьяло. Но котькудӥз асэныз ачиз ваче син гинэ кылемын. Эшезлэсь со куаразэ но, синъёссэ но уг адӟы. Озьыен, лултэм арбериен кенеше. Сыӵе вераськон шудо карыны быгатоз шат?

Алдар дуннелы уноез оско ик. Туала нылпиослэн сотэк улэмзы уг луы. Таӵе суред шоры учкыса, одӥг-ог сюлэмы вӧсь луылэ ик: малы мон школае лыктӥ? Татын ик пересьмо ни! Ма, котькуд удысын бергасьёслэн озьы чигиськон вакытъёссы луыло, вылды. Уже пӧрме ке, нош ик бурдъяськисько. Али тани крезьгурез дышетонъя нимысьтыз программа кылдытыны вырисько. Нылпилэсь быгатонлыкъёссэ котыр ласянь мед азинтоз со. Туала программа кылзыныгес гинэ дышетэ.

— Городын ужамдэ но, творчестводэ но ӝоггес адӟысалзы, дыр.

— Городын, оло, воксё но ӧй адӟысалзы. Трос калык пӧлын выйыны-ышыны кап­чигес. Собере, мынам отын арня но улэме уг луы — пазяськыны кутскисько. Творческой адямилы гуртын ик улоно, дыр. Татын ачиз инкуазь кужым сётэ.

Елена Сараматова.

Удмурт Дунне
By Удмурт Дунне 27 июня, 2012 11:01