Иже вуттӥз удмурт кыл

Удмурт Дунне
By Удмурт Дунне 1 июня, 2012 09:51
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Иже вуттӥз удмурт кыл

Яр ёросысь Стас Симонов но Катя Поздеева.

Ижысь Эшъяськон юртэ толон люкаськизы ас ёросъёсазы «Удмурт батыр» но «Пичи чеберай» ним басьтэм тэшкылиос.

Удмурт нылкышно кенеш но Ижысь нылпи садъёсысь воспитательёслэн «Зарни бугор» огазеяськонзы кенешемъя вить ар талэсь азьло К. Герд нимо нылпи садын нырысьсэ ортчытэмын вал «Пичи чеберайёс но батыръёс» ӵошатскон-фестиваль. Туэ ужрад нырысьсэ огазеяз быдэс шаерысь удмурт кылэз гажась нылпиосты. 13 ёрос но 3 город, ваньмыз-ӧвӧлэз 300 пала нылпиос пыриськизы отчы.

Люкаськемъёс юн кичабонъёсын пумитазы Алнаш ёросысь усточиосты. Алнашысь Ирина Поляковалэн куараез уӵылэн выллем. Пичи ке но, дано луыса вуттэм ни. Ашальчи Оки сярысь киноын Л. Векшиналэсь пинал дырзэ ӵапак Ирина шудэм. Нош Кузёбайысь пичи мугоро Влад Никонов кузь кылбурез могатэк, артист кадь лыдӟиз.

— Арлы быдэ ноябрь толэзе удмурт культуралы сӥзем нуналъёс ортчытӥськомы, — шуэ Алнаш ёрос администрациысь дышетонъя управлениысь нылпи садъёсын ужанъя валтӥсь специалист Юлия Токарева. — Ӵапак соку ик покчиос пӧлын пӧртэм конкурсъёс радъяськомы. Одӥг аре нылъёс, мукетъяз пиос пӧлын вожвылъяськон луэ.

Кытын но отын арлы быдэ та выллем ужрад ортчыто ке, Яр ёросысь Озёрки гуртысь пиналъёслэн нылпи сад сярысь кылэм-адӟемзы ик ӧвӧл. Дасо мында пиналъёс лумбытэн ульчаын шудо.

— Ужаны мыныкум, ульчаысь нылпиосты, китӥзы кутыса, клубе нуисько, — шуэ клубын ужась Лариса Корепанова. — Уд но оске, доразы пукыса, куд-огез нимтулзэс но вераны ӧз быгатылэ, вераськыны но керпотылӥзы. Ӝыны ар ӵоже клубе потаммы токма ӧз луы, кырӟаны-вераны но йӧндыриськомы ни. Нош удмурт кылэз тодэммы Ижозь вуттӥз.

Яр ёросысь удмурт тэшкылиос пӧлын туэ нырысьсэ ортчытӥзы «Пичи чеберайёс но батыръёс» конкурс. Ужрадэ 6 пинал пыриськиз, со пӧлысь куинез — Озёркиысь. Ижысь конкурсэ та гуртысь 4 аресъем Катя Поздееваез но 5 аресъем Стас Симоновез вайизы. Бадӟым сцена вылэ нырысьсэ потӥзы ке но, яръёс ӧз ыштӥське, кырӟан-веранзэс рос-прос быдэстӥзы.

— Туж бадӟым но кыдёкын вылэм тӥляд городды, — пальпотыса шуэ пичи Катя. — Татчы лыктон понна 5 часын султӥмы.

Конкурсэ пыриськемъёс пӧлын висъяськизы Гракысь Алёша Петров но Виктория Лукьянова, Балезиноысь Захар Корепанов но Виктория Трефилова, Вавожысь Мария но Денис Зайцевъёс, Эграысь Полина Шкляева но Альбина Стрелкова но мукетъёсыз. Нырысетӥез бадӟым фестиваль умой ортчиз. Азьланяз шаерысьтымы вань ёросъёс та ужрадэ пыриськозы.

Валентина Емельянова.

Удмурт Дунне
By Удмурт Дунне 1 июня, 2012 09:51