Гурт шорын — кут

Удмурт Дунне
By Удмурт Дунне 20 июня, 2012 10:35

Гурт шорын — кут

Кутлы сӥзем синпелет.

Якшур-Бӧдья ёросысь Мукши гуртын улӥсьёс ялан маин ке паймытъяло калыкез. Кемалась ик ӧвӧл соос доры нош ик трос калык люкаськылӥз.

Таяз учыре отын кутлы сӥзем синпелет усьтӥзы.

Куноослы шулдыр мылкыд кузьмазы гуртысь клубын ужасьёс, Якшур-Бӧдья черкогуртысь «Тӧдьы юсь» коллектив.

Гуртоос паймизы беризьлэсь лэсьтэм синпелетлы. Кутэз сяна, пулэсь ик лусйиллям удмуртъёслэсь кизилизэс, италмасэз. Синпелетэз пӧрмытӥз кибашлы Евгений Вахрушев.

Кутлы сӥзем синпелетэз усьтон сярысь татын вазен ик малпасько ни вылэм. Угось гуртазы улэ дано кутаськись Анатолий Абросимов. Пыдкук лэсьтонэн 70 ар пала выре ни. Воргорон шумотыса маде киужъёсыз сярысь. Нош Анастасия Дегтярёва солэсь верамъёссэ плёнка вылэ гожтэм но кино дасям.

Анатолий Абросимов кутаськыны дышиз 14 аресаз. Вукое мынэм пияш киужен вырись воргоронэз синйылтэм, вӧзаз пукемез токма луымтэ. Дораз бертыса, со но та уж борды кутскем. Табере Абросимовлэн киужъёсыз Москвае, Перме, Краснодаре, Болгарие но вуизы ни. Та вакытэ гуртысь мылкыд карисьёсты кутаськыны дышетэ на Николай Широбоков но.

Вера Вахрушева.

Удмурт Дунне
By Удмурт Дунне 20 июня, 2012 10:35