Выль йырлы быдэс йырлы вылынгес луоно

Удмурт Дунне
By Удмурт Дунне 15 июня, 2012 14:51

Выль йырлы быдэс йырлы вылынгес луоно

А. Вершинин.

Можга районын быръемын выль йыр. Ёросэн кивалтоз Аркадий Вершинин — «Россия» огазеяськонлэн директорез. Выль йырлы 53 арес.

Кылем арня вискын ёрос Кенеше быръем депутатъёс люкаськылӥзы витетӥ сессие. Районысь парламентлэн ужаз пыриськиз Президент Александр Волков. Сессие вуэм 18 депутат азьын сылӥз одӥг валтӥсь ужпум — йыр быръёно.

Район куинь толэзь ӵоже вылӥ кивалтӥсьтэк улӥз-вылӥз. Азьвылэз йыр — Владимир Максютин — кузьым басьтэменыз валче следствие улэ пачкамын. Озьы вылӥ пукон бушаз. Та интые депутатъёс ӵектӥзы тужгес кужмо кивалтӥсез — «Россия» огазеяськонлэсь тӧрозэ Аркадий Вершининэз. Солэн ужын кыдамез, люкам тодон-валанэз юрттозы ёросэз ӝутыны, оско интыысь парламентарийёс.

Нялтас вераса, «Россия» огазеяськон ог 700 муртлы уж инты сётэ. Хозяйствоын валаса радъямын вань удысъёс. Азьло «Россия» висъяськиз ӟеч ю нянь, кидыс поттэменыз, берло аръёсы таин оградын мыно йӧл кыскон но, пудо вордон но. Фермаысь йӧл но сӥль палэнэ уг кошко — «Россиын» асьсэлэн производствозы радъямын. Озьы Бадӟым Учаын поттэм йӧл сиёнъёсты но пӧртэм пумо колбасаосты быдэс республикаын улӥсьёс тодо-басьто. 24 ар «Россиен» кивалтӥз Аркадий Вершинин.

— Можга район берло вить арзэ интыяз лёгаське, — пусйиз Президент Александр Волков, — нош шаерысьтымы 8-эз ёросъёс быгато ни скаллы быдэ 5 сюрс килолэсь трос йӧл кыскыны. Выль ёрос йырлы но депутатъёслы одӥг бадӟым сӥзёнэ: совето аръёсы сямен мукет районъёслэсь быдэс йырлы вылӥгес луоно.

Озьы ик Александр Волков куриз депутатъёсты выль синмын учкыны районэз азинтонъя планэз, уката, пе, сак чаклано социальной объектъёсты, мар тужгес но кулэ районысь калыклы.

Сессия бере Александр Волков но Аркадий Вершинин вуылӥзы районысь гуртъёсы, пыразы йӧнала быдэстымтэ объектъёсы. Тани Можга черкогуртын возьмало выль нылпи сад. Али ёрмонзы туж бадӟым — соин валче 22 нылпи ветлэ Кватчиысь садэ. Александр Волков оскытӥз, школа вӧзы выль юрт ӝутскоз шуыса. Татын 3 группа усьтозы — 75 тэшкылилы инты кылдоз.

Выль лэсьтӥськонлы чаклам интыетӥ котырскыса, Президентлэн синмыз усиз куштӥськем юрт шоры. Школа вӧзын сылэ 22 квартираем корка. Со йылаз-пумаз вуттымтэ — борддоръёсыз гинэ вань. Александр Волков куриз интыысь кивалтӥсьёсты та объект пумысен малпаськыны. Президент чакламъя та коркась патеръёсты сётыны луысал сиротаослы, гуртэ берытскись специалистъёслы но егит семьяослы. Нош лэсьтӥськонъя, архитектурая но улон инты политикая министрлы Сергей Шикаловлы матысь дыре эскерон радъяно — соку ини тодмо луоз, быдэстоно-а та юртэз, куашкатоно-а.

Кожаз Президент Бадӟым Сибые. Татын буш сылӥсь нылпи садэ пересьёслы чаклам юрт усьтыны малпало. Но кутскем ужъёс ӝыныё дугдытэмын: юрт липемын, висъетъёс ӝутэмын, шуныт сётӥсь гумыос кыскемын. Ужъёсты йылпумъян понна эшшо уксё кулэ на. Александр Волков гуртоосты оскытӥз, вуоно арын та уж азинскоз шуыса. Соку районысь оген кылем 35 муртлы шуныт юртын патер кылдоз.

Елена Скворцова.

Удмурт Дунне
By Удмурт Дунне 15 июня, 2012 14:51