Вормизы шудыса!

Удмурт Дунне
By Удмурт Дунне 15 июня, 2012 14:56

Вормизы шудыса!

Программалэн авторез О. Ардашева Моко но Чульымчи мунёосын.

«Мынам Удмуртие» телеканалысь «Шудон корка» программа нырысетӥ инты утӥз «Спасти и сохранить» калыккуспо фестивальын. Та ужрадын ӵошатско экологилы сӥзем телепередачаос. Фестиваль туэ 16-тӥзэ радъяськиз.

«Шудон корка» устоез луиз нылпиослы сӥзем передачаос пӧлын. Программалэн авторез Ольга Ардашева Ханты-Мансийске вуылыны ӧз быгаты. Соин кузьымез — диплом но гагара тылобурдолэн хрустальлэсь статуэткаез — сюрес вылын ай. Та дырозь «Шудон корка» трос дипломъёсын пусйылэмын ни, нош такем бадӟым вормонзы ӧй вал на.

Нылпиослы сӥзем передача телеканалын мынэ дасэтӥ арзэ. Нырысь-валысь удмурт покчиосын шудӥзы-вераськизы Моко мунё (шудэ Антонина Пушина) но Малыок нылаш (шудэ Ольга Ардашева). Ӵапак кылем арын Моко но Малыок нылпиослы пыр-поч мадизы инкуазез утён сярысь. Солы сӥземын вал кӧня ке передача. «Спасти и сохранить» фестивальысь жюрилы тужгес кельшиз Мудор кыз сярысь мадёс. Отын пересь писпу вера, кызьы вашкала дауръёсы удмуртъёс писпуосты дунъязы. Нюлэскы мыныса, писпуэз коран азьын адями солы вазиськылӥз, вожзэ медаз потты шуыса. Таӵе передача пумын котькуд нылпилэн валанэз кылдэ: инкуазез утёно но жаляно, уго котькуд писпу — улэп.

Программаез дасясьёс котьку но выль малпанъёсын уло. Тани кыкетӥ арзэ покчи учкисьёс яратоно передачазэс котькуд ӝыт 20 час 50 минутэ адӟыны быгато. «Шудон корка» вис уг кары шутэтскон нуналъёсы но. Малы ке шуоно таӵе ӟеч программалы дур басьтӥз республикаысьтымы Нациосын ужан политикая министерство. Тунсыко мунёос пыр покчи удмурт тэшкылиослы пыӵа анай кылзэс гажан мылкыд. Экранысь удмурт кылын вераськись-кырӟась огъёзъёссэс адӟыса, мукет пиналъёслэн но удмурт кылэз дышетон мылкыдзы пуроме.

Табере выльдӥськизы мунёос но. Моколэн эшез кылдӥз — Чульымчи нылаш. Ольга Ардашева Моко мунёлы ним сётӥз, Лия Малых гожъясьлэн выжыкылъёсысьтыз Моко коркакузёлы синмаськыса. Чульымчилы ним шӧдтэк шорысь шедиз — тазэ малпаз удмурт кылъя дышетӥсь Ангелина Решетникова.

Передачаез дасясьёс арнялы огпол пумисько съёмкаос дыръя. Одӥг-кык час ӵоже соос быдэс арнялы чаклам передачаосты но быдэсто, матысь ӵыжы-выжыос кадь лулысь-сюлмысь кенешо но. Актрисаос Антонина Пушина но Татьяна Масьярова Мокоез но Чульымчиез асьсэлэсь нылпиоссэс кадь ярато, соослы дӥсь но вуро. Оператор Сергей Фёдоров но режиссёр Мария Фёдорова «Шудон корка» борды бурмемын ни. Маша ачиз ик монтажёр но луэ.

Туэ сӥзьыл «Шудон корка» нылпиос понна бадӟым шулдыръяськон радъялоз — ӵапак соку эфире потоз сюрсэтӥез передача. Программаез дасясьёслэн азьланяз но малпанъёссы медаз синэ. Вормонъёс дурыныз мед кисьтӥськозы.

Алёна Ионина.

Удмурт Дунне
By Удмурт Дунне 15 июня, 2012 14:56