Вольыт ворттылэм потэ!

Удмурт Дунне
By Удмурт Дунне 29 июня, 2012 13:47

Шаерысьтымы котькуд куинетӥез пазьгиськон-шуккиськон учыр луэ урод сюресъёс сэрен. Та лыдпусэз шараяз югдурез утёнъя министрлэн воштӥсез Александр Щур.

Зэмен но, республикаысьтымы транспортъя но сюрес хозяйствоя министрлэн Олег Гаринлэн ушъяськымонэз трос ик ӧвӧл. Удмуртилэн «вирсэръёсыз» 6 сюрс 17 иськем пала кыстӥсько. Со пӧлысь 94 процентэз тыро-пыдо тупатъямын ӧвӧл.

— Вань сыӵе куронъёс: сюресэз котькуд 12 арлы умой-умой выльдоно, котькуд 4 арлы вылтӥз волятоно, — шуиз Олег Владимирович.

Вань та куронъёсты чаклано ке, асьме республикалы ог 25 ар кулэ луоз на, сюресъёсынымы ушъяськыны мед быгатом шуыса.

Но сокем лулӟылоно ӧвӧл, пе. Угось мар но со лэсьтӥське ик. Шуом, кылем арын 62 иськеме асфальт кисьтэмын вал, туэлы 98 иськемез шобыртыны чакламын. Со сяна, 980 иськем вылтӥ ворттыло школа автобусъёс. Нош таӵе сюресъёслы нимысьтыз куронъёс пуктэмын — соосты возён понна республикаямы Россилэн кисыысьтыз арлы быдэ 55 миллион манет вуэ.

Югдур ӟеч пала воштӥськоз шуыса, оскон пыӵатэ Сюресъёсъя фонд. Отысь коньдон сюрес тупатъянлы трос ик уг кошкы ке но, тырмыт висъяське соосты толалтэзэ сузянлы, сылал пазянлы, пусъёс пуктылонлы.

Элина Васильева.

Удмурт Дунне
By Удмурт Дунне 29 июня, 2012 13:47