Вожвылъяськон вуттӥз медалёзь

Удмурт Дунне
By Удмурт Дунне Июнь 26, 2012 09:06

Вожвылъяськон вуттӥз медалёзь

Алнаш ёросысь Писэйгуртысь А. Евсеев, И. Лебедев но В. Михайлов.

Толон Ижысь Эшъяськон юртэ люкаськылӥзы зарни медален школаез йылпумъясьёс. Соослэн лыдзы туэ котькулэсь трос — 287 мурт! Эшшо сомындагес ик выпускникъёс азвесь медаль басьтӥзы на.

Медалистъёсты ӟечкы­лазы Президент Александр Волков, Кун Кенешлэн Тӧроез Александр Соловьёв, наукая но дышетонъя министр Андрей Кузнецов но мукетъёсыз. Данъян ужрадэ озьы ик пыриськизы ёрос администрациосысь дышетонъя управлениосын ужасьёс, дышетӥсьёс, пиналъёслэн анай-атайёссы, ӵыжы-выжыоссы.

Та пиналъёс понна тужгес секытэз ортчемын шуо ке но, школаез йылпумъясьёслэн ваньмыз азьпалан на. Тросэз выпускникъёс табере вузъёсы пырыны малпало, тырмыт тодон-валан люкаса, бадӟым улонэ вамыштыны дасясько. Ӵапак та пиналъёс, ог дасо аръёс ортчыса, шаеренымы кивалтозы, Удмуртиез, Россиез азьлане валтозы.

11-тӥ классэз туэ 8 сюрс 143 пинал йылпумъяз, кылем арен ӵошатыса, выпускникъёслэн лыдзы 1 сюрс 500-лы уногес. Медаль басьтӥсьёслэн лыдзы арысь аре трос возиське Алнаш, Балезино, Дэри ёросъёсын. Зарни нылъёслэн но пиослэн лыдзы йылӥз Грак, Кияса ёросъёсын.

Алнаш ёросысь Писэйгуртысь шор ёзо школаез туэ 16 пинал йылпумъяз. Пӧлысьтызы витез — медалистъёс: Иван Лебедев, Владислав Михайлов но Алексей Евсеев зарнияськизы, нош Станислав Евсеев но Светлана Кадрова азвесьлы шумпотӥзы.

— Классамы кужмо пиналъёс шедизы, — шуэ Владислав Михайлов. — Нылъёсмы тросгес вал ке но, соос сьӧры ӧм ватске, котькыӵе ужрадэ мыло-кыдо пыриськимы: спорт ӵошатсконъёсы но, пӧртэм олимпиадаосы но. Ог-огенымы вожвылъяськыса тыршеммы ик медаль дорозь сузьтӥськыны юрттӥз кадь. Огъя кун экзаменъёсын но быдэн 90 балл люкаллям.

Ува ёросысь 9 пинал школаез зарни медален йылпумъяз. Со пӧлысь одӥгез — Поршурысь Андрей Богачёв. 11-тӥ классын дышетскыкуз, книгаос сьӧрысь ик султылымтэ, ӝыт шудонъёсы но ӧжытгес потам. Куд-ог школаосын куинь-ньыль пиналъёс школаез медален йылпумъямын ке, Дэбес ёросын чылкак одӥг мурт гинэ — Тыловай школаысь Мария Корепанова.

Шумпотоно, берло дыре гуртысь пиналъёс но городъёслэсь бере уг кылё. Александр Волков но соосын данъяськемзэ вераз. Озьы бере, шаерысьтымы кивалтӥсьёс шонер лэсьто, гуртъёсы выль школаос, нылпи садъёс, стадионъёс пуктыса. Лэсьтӥськон ужъёс азьланяз но азинтэмын луозы. Егитъёслы ӟеч улыны луонлык кылдытыса гинэ, шаермы азинскоз, выль вормонъёс басьтоз.

Валентина Емельянова.

Удмурт Дунне
By Удмурт Дунне Июнь 26, 2012 09:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<