Бурмытэ лякыт кылыныз

Удмурт Дунне
By Удмурт Дунне 15 июня, 2012 10:53

Бурмытэ лякыт кылыныз

Кизнер ёросысь Тыжмыйыл гуртысь фельдшер Л. Охотникова.

Кизнер ёросысь Тыжмыйыл гуртын нылпи сад, школа, клуб ужало. Фельдшер-акушер пунктсэс ёрос центрысь эмъяськон юртэн ӵошатыны уггес луы ке но, пу юртын котьку шуныт, чылкыт.

— Таӵе пу юртъёс ёросамы гинэ ӧвӧл, шаерамы но чиньыен лыдъямон гинэ кылемын, дыр, — шуэ ФАП-ен кивалтӥсь Людмила Охотникова. — Ми љожтӥськыны дышемын ӧвӧл, ужмес сюлмысь быдэсъяны тыршиськомы. Котьма карыны юрттэ санитаркае Зоя Алексеевна Киселёва. Толалтэ, 5 часын султыса, гур эстэ, лыктыкумлы коркамес шунтыса дася.

Людмила Владимировна эмъян удысын куамын арлэсь ятыр тырше ни. Гурт калык но со борды дышемын. Лякыт вераськемзэ кылыса, дораз лыктэмъёслэн висёнъёссы бордысьтызы пегӟо кадь. Со ик чакласа возе гуртысь вож нуныосты. Татын соос арлы быдэ вордско. Гуртазы вань куиньмо пиналъёс но.

Гуртысь эмъясь доры ӵемгес вазисько арлыдоос: я вирзӥбетсы шудэ, я укол пуктыны куро. Соос поннагес ик физиокабинет но ужа. Пуэдэн курадӟисьёс ас гуртазы ик эмъяськыны быгато ке, зол висисьёсты ёрос больницае келяло.

— Та юртмес медаз гинэ пытсалэ вал, — веранзэ азьланьтэ Людмила Владимировна. — Гурт калык дышемын чиданы, соос висьыса но ужалозы. Ёрос больницае но, туж секыт висьыкузы гинэ, вазисько. Кизнерозь мыныны ваньмызлэн луонлыкез но уг шедьы.

Тыжмыйылъёс пӧлысь тросэз куинь яке солэсь трос нылпи будэто. Людмила Владимировна но Михаил Васильевич Охотников кузпалъёс но вить пиналъёссэс пыд вылазы султытӥзы. Людмила Охотникова 2010-тӥ арын «Анайлэн данэз» гадьпусэн пусъемын.

Людмила Владимировна ачиз но трос нылпиё семьяын будэмын. Соин но, дыр, сузэр-агайёсызлэн но семьяоссы бадӟымесь. Тужмыйылын ик улӥсь Надежда сузэрзэ туэ «Анайлэн данэз» гадьпусэн пусйизы. Озьы тӥни гуртоос котьма карыны вуо: нылпи но будэто, ужазы но азинсконъёс басьто.

Валентина Емельянова.

Удмурт Дунне
By Удмурт Дунне 15 июня, 2012 10:53