Басьтэлэ пинал, тӥляд ваньмыз пӧрмоз…

Удмурт Дунне
By Удмурт Дунне 29 июня, 2012 13:56

Басьтэлэ пинал, тӥляд ваньмыз пӧрмоз…

Туэ 1-тӥ январьлы шараямын: вордэм анай-атай шуныттэк будӥсь покчиос шаерамы 6 сюрс 773. Таос пӧлысь аслыз выль семья шедьтӥз 5 сюрслэсь ятырез. Мукетъёсыз уло-выло нылпи юртъёсын. Таӵе лыдпусъёсты шарая Удмуртиысь Дышетонъя но наукая министерствоысь валтӥсь специалист Татьяна Санникова.

Мон но укмыс ар талэсь азьвыл нылпи юртысь сизьым аресъем дыды басьтӥ. Ныл будэтон сярысь льӧль малпанэ аслам ӧз быдэсмы уго. Пиме вайи но, отӥяз тазалыке лябӟиз. Соин ик, лэся, ньыльдон аресам вуыса, выльысь ныл сярысь уйбыртыны кутски. Чебер гинэ дӥсяло, киужлы дышето, пӧраськыны валэкто, умой кенлы дасяло — ваньзы синмаськозы. Ялан озьы малпай. Картэ но мурт нылпиез семьяямы вайыны пумит ӧз кариськы. Экее но ӧз ӵыжаськы.

Сашенькаез нырысь адӟем-мы бере ик ваньмы яратӥмы. Тӧдьы йырсиё, бадӟым чагыр синмо муспотон нылаш. Мыня ке, бамъёсаз пичиесь гопъёс кылдо. Алвылад гинэ возёд кадь. Соин, лэся, азьвыл улэм-вылэмез сярысь мадьыкуз, юзыр-кезьыр луылӥськиз.

Анай-атаез дугдылытэк курытсэ ӟамыръяло вылэм. Коркасьтызы мае вузаны, юонэн воштыны луэ, ваньмыз кемалась келямын. Нылаш ӟызы матрас вылын музын кӧлалляз. Сазьтӥськон вакытазы, сием потонзэс шӧды-лыку, мумиз-бубиз калгись пуныез вандо, кузэ ниё но соин шыд пӧрало вылэм. Соин ик Саша дорамы улыны кутскемез бере, шыд ӟузьыкуз, ӵемысь юалоз вал: Шарикез вандӥды-а? Пунымылэн нимыз озьы. Чылкыт валесэ выдыны но уг дӥсьты вал — учкыса сылоз, тӧдьы простынез киыныз маяллялоз но лулӟоз: мон тае жоб пыдъёсыным соку ик кырсь каро ук. Тон ачид туж чылкыт, уд сапта шуыса буйгатэм бере гинэ выдылӥз. Озьы ке но ӵукна султэмезлы быдэ валессэ котыр учкылӥз: сыӵе ик чылкыт на-а, пе.

Сюлэмыд уз вандӥськы шат, ваньзэ тае кылыса-адӟыса? Жалезлы чидатэк, нуналлы быдэ ческыт сиён, выль дӥсь, выль шудон басьялляй солы. Нырысь ӧз оскылы, со ваньмыз солы огназлы гинэ шуыса. Бӧрысь кышканы кутскиз. Тӥ, пе, монэ ӝоген берен нылпи юртэ уллялоды ни, мон трос уксёдэс быдтӥсько. Мырдэм но кызьы дышиз выль улонлы. Кыӵе ке концерт учкыкумы но, гань-гань пукылӥз. Солэсь азьвыл трос калыко интыослэсь куалекъяз: монэ татын уз тышкалэ-а, пе. Дораз тордосъёс люкаськылыку, чабкы но сиылӥз уго.

 

Саша пумен ачиз но чылкытлык борды кыс-тӥськыны кутскиз. Суредаськонъя кружоке гожтӥськиз, эктыны дышетскиз. Школаысь но «куиньёсын» шер бертоз вал. Малпай: отӥяз воксё но азьмынӥсь ёзъёсыз сьӧры уйиськоз ай. Но та малпанэ ӝоген сӥяны кутскиз. Эшъяськыны ӧдъяз со аслэсьтыз кык-куинь ареслы бадӟымгес нылъёсын но пиосын. Ярам, таосыд малы ке умойлы дышетысалзы ке! 8-тӥ классэ вуэмез бере шӧдылыны кутски: нылы бордысь тамак зын лыктэ. Осто Инмаре, мар возьыт та! Ёросамы монэ тодӥсьтэмез ӧвӧл. Картэ но лякыт вераськыса утчаз соин, ачим но. Валаз, кожамы. Но отӥяз нош ик кисыысьтыз шараямы тамак пачка. Шӧмаськыса но бертаны кутскиз. Дышетсконзэ воксё аналтӥз.

Мар та? Юись анай-атаезлэн генъёсыз вормо? Милям семьяямы, праздникъёсы сяна, вина уг юо. Соку но чаркаосмес погратозямы ум бекыръяське. Куспамы керетыса ум улӥське — картэным ог-огмес юн гажаськом-яратӥськом. Матькетон кылъёс сярысь веранэз ик ӧвӧл. Соин ик йыре нокызьы уг тэры: кинлэсь адӟыса, кырыж сюрес вылэ султӥз Саша?!

Малы тон умой нылъёсын-пиосын уд эшъяськиськы? Та юанэз солы огпол гинэ ӧй сёты, пуш дуннезэ валаны тыршыса. Дыдымы валэктылӥз: умойёсыз монэ отӥгес каро, детдомовской шуо, пе.

Толалтэ вазь пеймыт луэмен, кури: 9 часын ӝыт дорын мед луоз ни. Нырысь кылзӥськылӥз. Бератаз 11 час бере но корка дорысь уд адӟылы вал сое. Сюлэм интыысьтыз потыны турттэ: нокин номыр ӧз кар меда? Сантэман учыръёс сярысь трос кылоно ук. Собере ураметӥ но олокыӵеосыз но лошъясько. Мыжгыса кельтозы, сумкадэ лушкалозы. Но вань та сюлмаськемме нылмы воксё мукет сямен валаны кутскиз: тынад, пе, монэ, тюрьмае кадь пытсамед потэ. Тон, пе, вожъяськиськод мыным: мон егит но чебер, нош тон пересь но шуш.

Огпол быдэс уй доре ӧз берты. Телефонзэ уг куты. Эшъёсыз дортӥ котырски — ваньзы кемалась изё ни. Клуб, кафе пытсаськемын. Пась подъездъёсы пырай — нылы ӧвӧл. Полициын ужасьёслы вазиськи. Опекае басьтэм пинал уйин ӧз берты ке, соку ик ивортоно уго. Озьы косэмын. Но таос но Сашенькамес ӧз шедьтэ. 7 часын ачиз вуиз. Пыд йылаз мырдэм сылэ — сыӵе зол юэмын.

Мар кароно таӵе югдурын? Калыклы улон-вылонын юрттэт сётонъя министерствоысь валтӥсь специалист Мария Сандалова верамъя, республикаямы ужа быдэ вуымтэослы чаклам 11 реабилитационной центр. Отын сьӧраз ортчем пиналъёсты куинь толэзь ӵоже визьмало, ӟеч сюрес вылэ берыктыны выро. Оло, татчы нылашмес сётыса утчано? Анай-атай куриськон гожтӥз ке, кутозы сое. Но Сашенька соку ик шиетӥз:

— Мынэсьтым сокем жадиды ни шат? Мозмытскемды потэ? Уг мыны центрады! Нуиды ке но, пегӟо. Луӵӵе аслам муми-буби доры мыно. Соослэн монэ ноку уллямзы ӧвӧл. Нош тӥ весь мозмытскыны выриськоды.

Таӵе кылъёслэсь гуньдӥ но мар вазьыны ӧй тоды ни. Азьвыл кызьы улэмзэ дыдымы воксё вунэтэм, шӧдске. Оло, юри вӧсьгес карон вылысь озьы куртчиз.

Паймыса ёросысьтымы психолог доры мынӥ. Соиз валэктӥз: нылашлы, пе, шунытты уг тырмы, соин ик сэмберъяське. Ма, весь соин кадь. Кытчы ке мыныкумы но, сьӧрысьтымы ум кельтӥське. Ужысь бертэме бере нырысь ик, вӧзаз пуксьыса, вераськиськом, вешасько. Куараме шораз уг будэтӥськы. Озьы вал ассэ нуныяны лэзьытозяз, уйёсы ышылыны кутскытозяз.

 

Тодмоосмылэсь кылы-ны кутскимы: нылды трасса вылэ уг поталля меда? Ма, син шоры туж йӧтыны ӧдъяз тани мар: таш-таш буяське, вакчи юбкаос вылаз золтэ, йырсизэ горд-горд буя. Чик чебер уд адӟиськиськы шуыса вераммес кылэм ик ӧз карылы. Меӵкытъяз: тон кадь бездыт буяськом, пыдес улозь кузь дэрем дӥсялом шат? Ма карыны паймыса ик, картэлэн чидан воксё быриз. Ӵапак соку нылпи юртэ келянэн курдатӥз Сашаез. Нош дыдымы кытысь-мар тодэм ни: мон, пе, туэ 9-тӥ классэз йылпумъясько, монэ нылпи юртэ уз басьтэ ни. Соиз зэм, 9-тӥ класс бере сирота нылпиосты училищеосы интыяло.

Али ик кышкасько: мар луоз, училищее пыриз ке. Толэзьлы быдэ вуись 6 сюрс 10 манет тыр компенсацизэ татчыозь киям басьтӥсько вал. Аслыз быдэссэ сётӥд ке, тус-тас кароз. Соин ик кулэ дыръяз висъялляй: я дӥсьлы, я тетрадь-книгалы, я сиёнлы, я кытчы ке шутэтскыны ветлыны. Аслым одӥг копейказэ но ӧй куты! Солэсь ортчыт — уксёез тырмымтэ дыръя аслэсьтымзэ будэтъяй. Огъя семьяын улыку, сотэк луэ шат? Вордыны басьтӥ ук сое, со понна кыл кутыны оскытӥ. Зэм, азям ик верасьёс шедьылӥзы: уксё понна басьтӥд сое нылпи юртысь. Саша гинэ но озьы шуылӥз куддыр.

Эх, уксё понна басьтод шат нылпиез? Кыл кутон гинэ ӧвӧл ук со — кайгу но. Тамында синву кисьтэмме тодысал ке, нокинэ но нылпи юртысь ӧй басьтысал! Ас вордэм нылпидэ чабкод но, кылдэ но вералод. Нош муртлэнэз вылэ кидэ ӝутыны дӥсьтод шат? Огпол йӧттӥд ке но, ачид ик, простить карыны курыса, вуод дӥняз, уйёстэ уд кӧла ни. Тодэ вал, макем секыт мурт пиналэз вордон! Туж бадӟым уж со. Вань сюлэмдэ понӥськод, кидысэ ву кисьтаськод, котырысьтыз жуг-жагзэ уриськод. Уд но тодӥськы, кыӵе потоз отысь будосэз. Весь малпаськод: вуоз-а ӵуказе? Вань опекунъёс озьы курдало. Мынамез тани шиё будӥз.

Училищее сое котькудаз кутозы. Закон та ласянь сиротаосты уте. Саша ачиз но отчы кошкон сярысь гинэ малпаське. Но со отын уката эрказъяськоз. Табере уксёез кияз вуоз ни. Уката кырсь сюрес вылэ уз кожы-а?

Та сярысь туннэ малпам ик уг поты. Сюлэм вылам из: умой кен будэтыны Сашалэсь ӧй быгаты.

Пие семья кылдытӥз. Пинал лэсьтыны уг пӧрмыто. Нылпи юртэ вазиськемзы потэ. Мар дэмланы кулэ мон соослы? Басьтэлэ нуны, тӥляд ваньмыз умой луоз?

Мария Васильева.

Удмурт Дунне
By Удмурт Дунне 29 июня, 2012 13:56