Бадӟымез лэсьтӥське пичиен

Удмурт Дунне
By Удмурт Дунне Июнь 5, 2012 11:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт кенеш» огазеяськонлэн таяз исполкомаз эскерем ужъёс герӟаськемын вал матысь дыре ортчоно ужрадъёсын. Но палэнэ ӧз кыле лэчыт юанъёс но. Шуом, удмурт движениын ог-огдэ валан, пӧртэм ужрадъёслы коньдон шедьтон но секыт учыръёсысь, огкылысь кариськыса, потон.

Люкаськемъёс нырысь ик вераськизы «Удмурт кенеш» но Дышетонъя но наукая министерство куспын кутэм огкыл пумысен. Валентин Тубылов дэмлаз: вань ӵектонъёслэсь быдэсъяськемзэс одно ик чаклано, ужъёс бумага вылэ гинэ медаз кыле. Нош дышетонъя но наукая министрлэн нырысетӥ воштӥсез Зоя Суворова пусйиз: ваньмылы ӵош кариськыса, огкылысь ужано, ог-огдэ пыкылонъёсын сэрен киосмы медаз лэзиське.

Собере «Удмурт кенешлэн» кивалтӥсез Николай Мусалимов ивортӥз фин-угор калыкъёслэн Консультативной комитетсылэн Ижын ортчемез пумысен. Отын вераськон мынӥз фин-угор калыкъёслэн 6-тӥ конгрессы сярысь. Со ортчоз туэ сентябрь толэзьлэн кутсконаз Венгриысь Шиофок городын. Отын вить секция ужалоз. Этнополитика но право секциын одӥгез председателез луоз Николай Мусалимов. Нош тазалыкез утёнъя, демографияя но экологияя секциын валтӥсь доклад лэсьтоз «Удмурт кенешлэн» исполкомезлэн ёзчиез, медакадемилэн ректорез Николай Стрелков.

Исполкомын ик тодэ вайытэмын: Удмуртиысь 20 делегат сяна, конгрессэ мыноз 11 наблюдатель. Николай Мусалимов пусйиз, наблюдателе ӵемысь юнматыны куро госструктураосын ужасьёсты, соосты, кинлы азьланяз вазиськозы, чаклам ужпумъёсты быдэсъяны курыса. Оглом учконо ке, наблюдательёс чотын фин-угор конгрессэ мынозы: Кун Кенешлэн Тӧроез Александр Соловьёв, солэн воштӥсез Владимир Невоструев, нациосын ужан политикая министр Владимир Завалин, солэн воштӥсез, Россиысь фин-угор егитъёслэн огазеяськонзылэн кивалтӥсез, «Удмурт кенешлэн» вице-президентэз Татьяна Ишматова, дышетонъя но наукая министрлэн нырысетӥ воштӥсез Зоя Суворова, «Удмурт дунне» газетлэн редакторезлэн воштӥсез Елена Миннигараева, Москваысь удмуртъёслэн «Герд» огазеяськонэнызы кивалтӥсь Маргарита Сельченкова, Грак ёросысь егитъёслэн «Меркурий» центрысьтызы егитъёсын ужанъя специалист Алексей Медведев, «Перепечкин» удмурт кафеез одӥгез кылдытӥсь, егит ужбергатӥсь Семён Семёнов, «Мынам Удмуртие» ТРК-ысь журналист Елена Слесарева но оператор Юрий Егоров.

 

* * *

«Дэмен» огазеяськонлэн кивалтӥсез Андрей Ураськин пыр-поч мадиз организацилэн ортчоно конференциез сярысь, удмурт культурая огазеяськон азьын сылӥсь куд-ог ужпумъёсты ӝутӥз. Ватсаз: али уж нуиське Удмурт театрлы И. Гавриловлэсь нимзэ сётонъя. Зэм, та ужез быдэстон понна трос бызьылоно, коньдон быдтоно луэ.

Нош Башкортостанысь удмуртъёслэн азьветлӥсьсы Ренат Галямшин ивортӥз удмурт гимназиез усьтон бордын ужамзы сярысь. Визь-кенешен юрттэмзы понна тау кариз «Удмурт кенешлэн» вице-президентэзлы Татьяна Ишматовалы но Ижысь К. Герд нимо гимназилэн директорезлы Анжелика Михеевалы.

Исполкомчиос кенешизы на Герберез, «Шундыкар» но «Усточикар» лагерьёсты радъян сярысь. Нош собере кыл сётэмын вал Юмшан-промо группаез кылдытӥсьлы, режиссёрлы Павел Поздеевлы. Со тодэ вайытӥз туэ апрель пумын ортчем дебат-шоу (куаретон) сярысь. Споръяськон радъямын вал Татьяна Ишматова но Павел Поздеев вискын. Та ужрадэз чакласьёс «ваче вуисьёслы» юанъёссэс сётъяны быгатӥзы. Зэм, куд-ог юанъёс валэктонъёстэк кылизы. Соосъя Поздеев исполкомчиослы вазиськиз. Дэмлаз: удмурт ужрадъёслы ялан уксё утчаса ветлонтэм вылысь кыӵе ке нимысьтыз фонд кылдытоно, «Удмурт кенешлэн» ёзчиосыз взнос мед тырозы. Шуом, араз 1 сюрс манетэн сётъясалзы ке, асьмелы шуак быдэстоно ужъёслы уксё утчано ӧй луысал.

Нялтас вераса, взносъёс бичан сярысь вераськонъёс ог 20 ар талэсь азьло но вал ни. Но ялан маке кутылӥз, улон но возьматӥз: удмурт калыклэн дано пиосызлы (К. Гердлы, Т. Борисовлы) синпелет пуктон вылысь гинэ но уксё бичан туж но туж шуген мынӥз.

— Мон — общественник, — мылкыдзэ шараяз Камсьӧр удмуртъёслэн огазеяськонэнызы кивалтӥсь Флюра Чибышева. — Уж бере лыктыса, ас мылкыдыя ужасько, пӧртэм мероприятиос ортчытъяськом, со понна пичи копейка но басьтытэк! Общественникъёс, асьсэ дырзэс жалятэк, огъя удмуртлык сярысь сюлмаськыса маке лэсьто, нош соослэсь эшшо уксё бичалозы на. Нош кытын уксё бичан — отын керетонъёс, ваче вуонъёс кутскозы.

Взносъёс пумысен мылкыдъёс висъяськизы ке но, тросэз малпанэ вуизы: та ужпумез воксё палэнтоно ӧвӧл, эскероно на.

Павел Поздеевлэн чакламезъя али «Удмурт кенешлэн» исполкомез чиновникъёслэн ёззы кадь адӟиське. Талы тыпак пумит луэмзэ вераз Николай Стрелков:

— Малы озьы вераськонэз? «Удмурт кенеше» кӧня ке гинэ чиновник пыре. Мон но — медициная академилэн ректорез — чиновник уг лыдъяськиськы!

Мукет ласянь учконо ке, трос-а лэсьтыны пӧрмысал, удмурт движенилэн дурбась-тӥсьёсыз властьын, чиновникъёс пӧлын ӧй ке луысалзы? Ӵапак со ёзъёслы луыса ик трос шугъяськытӥсь юанъёсты быдэстыны луэ ук!

Николай Сергеевичлэн малпамезъя, али тросгес сюлмаськоно матэктӥсь быръёнъёс сярысь, Кун Кенеше депутатъёс пӧлы уногес удмуртъёс мед шедёзы шуыса.

Мылкыдзэ шараятэк, ӧз чида Татьяна Ишматова:

— Асьмеос трос вераськиськом: ма кароно. Нош кин лэсьтоз? Мон аслым гожъяса кельтӥсько: та борды, со борды басьтӥськоно.

Но палэнысь нош ик пыкылон: тазэ тазьы быдэстоно вал, созэ ӧз лэсьтэ… Кин кулэ вал лэсьтыны?

Малпаськонэ уськытӥз Зоя Суворова но: 20 ар ӵоже ни, пе, национальной движение пыриськисько, но ялан пыкылонъёс вылын. «Удмурт кенешлэн» Пичи кенешез азе потыку, пыдъёс куалекъяны ӧдъяло… Киосад, пыдъёсад кокало ке, сюлмын туж вӧсь. Милемыз азьвыл но, али но жуго, но, номыр шоры учкытэк, Дышетонъя но наукая министерствоын национальной образованиея отдел ужа! — пусйиз Зоя Витальевна.

Павел Поздеев малпанзэ шараяз на: «Удмурт кенеш» — статусной организация. Но солэн бурд улаз мукет удмурт огазеяськонъёс но вань ук. Озьы аспӧртэм МЧС выллем луыны быгатысал удмурт культурая «Дэмен» огазеяськон. Кыӵе ке малпанъёсты улонэ ӝог пыӵатон ласянь со тросгес мед выроз вал.

Кин мае но кызьы лэсьтыны кулэ — та пумысен вераськонъёс кема ӧз кыстӥське. Ваньзы валало уго: кыл вылын уй ӵоже дворец пуктыны луоно, но бадӟым ужъёс лэсьтӥсько нуналмысь, пичиен-пичиен.

 

* * *

Та нуналэ ик «Удмурт кенешлэн» исполкомаз пырисьёс Брангуртысь песянайёсын ӵош сяська понӥзы К. Гердлэн синпелетэз доры.

Елена Миннигараева.

Удмурт Дунне
By Удмурт Дунне Июнь 5, 2012 11:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<