Армие — вить нуналлы

Удмурт Дунне
By Удмурт Дунне 6 июня, 2012 10:38

Армие — вить нуналлы

Пероггуртысь аэроклубын - Ижысь пиос.

Шаерысьтымы 10-тӥ классэз йылпумъям пиос вить нунал ӵоже солдатлэсь улонзэ ас вылазы эскеро. Та нуналъёсы военно-патриотической сборъёс котькуд ёросысь но городъёсысь пиналъёс понна ортчо. Арня ӵоже пиос уло лагерьёсын.

Та дырозь Ижысь пиос гинэ мукетъёслэсь висъяськылӥзы. Соос понна лагерьёс радъязы паркъёсын яке школа азбаръёсын, спортплощадкаосын. Ӝытлы быдэ соос доразы бертазы. Туэ быдэс арня ӵоже город нылпиос Пероггуртысь ДОСААФ-лэн аэроклубезлэн базаяз уло.

Егитъёсын ужанъя, Дышетонъя но наукая министерствоос вазенгес малпазы ни вал Иж котырысь аэроклублэн базаяз кылдытыны пиосты армие дасянъя нимысьтыз центр. Эскерон вылысь та центре туэ нырысьсэ люказы Ижысь пиналъёсты. Та вакытэ ӧсъёссэ усьтӥз куинетӥ смена. Котькуд сменаын — 150 пиос. Кылем арняе солдатлэсь улонзэ ас вылазы эскеризы Ижысь школаосысь, К. Герд нимо гимназиысь но Дэри ёросысь Италмас школа-интернатысь 10-тӥ классэз йылпумъям егитъёс. Соослэсь улэм-вылэмзэс эскерыны вуылӥзы Удмуртилэн Президентэз Александр Волков, министръёс Владимир Соловьёв но Андрей Кузнецов, мукет кивалтӥсьёс.

Та лагерьын улэмзэс пиналъёс кематэк уз вунэтэ. 7 часысен ик пыд вылазы, нуналзы зарядка бордысен кутске, нош кӧлыны выдо ӝытазе 10 час но ӝыныын. Пиос мугорзэс кыдато, строен вамышъяло, кырӟало, противогазэз уже кутыны дышетско, военной уставен тодматско, автоматэз сэртто-пертчо. Шуныт корказэс палаткаос, небыт валессэс раскладушкаос воштӥзы ке но, пиослэн нырзы ошиськемын ӧвӧл. Телевизор-компьютер сьӧрын пукем интые, футболэн но волейболэн шудо.

— Режимъя улэмзы соку ик пиослэн сием потонзы вылын шӧдӥськиз, — шуиз та центрлэн кивалтӥсез Сергей Зубко. — Трос дырзэс омырын ортчыто бере, сиён ческытгес кошке, лэся. Кӧлыны выдон азязы эшшо чай юэмзы потэ на. Пиос сэзьгес луо, Атыкай музъемен данъяськон мылкыдзы эшшо но юнма. Нылпиослы урок ортчыто офицеръёс, школаосысь ОБЖ но физкультура предметъёсты нуись дышетӥсьёс, психологъёс, быдэ вуымтэосын ужанъя управлениысь специалистъёс.

Шаерысьтымы кивалтӥ­сьёс оскытӥзы: азьланяз та центр пыр ортчозы Удмуртиысь 10-тӥ классын дышетскись пиос.

— Та центрын гужем ӵоже тупатъян-выльдон ужъёс ортчытоно, кӧлан корпусэз 1-тӥ сентябрьлы вуттоно, — шуиз Александр Волков. — Соку городысь гинэ ӧвӧл, быдэс шаерысьтымы пиос татын мугорзэс кыдатозы. Матысь кык-куинь ар куспын та центрмы Россиысь мукет улосъёслы но адӟем карымон луыны кулэ.

Та вакытэ Россиысь 6 улосын гинэ таӵе центръёс кылдытэмын. Аэроклублэн базаяз тол яке гужем каникулъёссы дыръя «Граница», «Подросток» клубъёсы ветлӥсьёс мугорзэс кыдато на. Таосыз егитъёс арнялэсь тросгес уло, тазалыксэс кыдатонлы но бадӟымгес саклык висъяло, вертолётысь парашютэн тэтчало.

Ижысь К. Герд нимо гимназиысь Андрей Никонов та выллем лагерьын нырысьсэ. Озьы ке но солы туж кельше строен вамышъяны, автомат сэрттыны-бичаны. Ижысь 76­ номеро школаын дышетскись Сергей Поскрёбышевлэн киыз бинтэн бинялтэмын, ӵабтӥськиз, пе. Но татын солы ваньмыз капчиен сётске, угось пияш одӥгез кужмоез спортсмен луэ.

— Улонтэм ӧвӧл, ваньмыз умой радъямын, — шуэ Андрей Никонов. — Куазь но милемлы удалтӥз, чиданы луонтэм пӧсь ӧй вал, зоръёс ӧз акыльтэ, вир юисьёс — чибиньёс — гинэ акыльтӥзы.

Валамон, та лагерьын зол дисциплина. Ас вылазы сое тужгес юн шӧдӥзы телефон пыр вераськыны, шудыны яратӥсьёс.

— Телефон — со шудон ӧвӧл, — шуиз лагерьлэн кивалтӥсез Сергей Зубко. — Тодмоосынызы вераськыны нимысьтыз дыр тупатэмын — ӝытлы быдэ ӝыны час.

Атыкай музъеммес яратон мылкыд пичиысен ик пыӵатоно. Та центр пыр потэм пиос сое ас вылазы шӧдӥзы ни.

Валентина Емельянова.

Удмурт Дунне
By Удмурт Дунне 6 июня, 2012 10:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<