Алякъяськон дуно усе

Удмурт Дунне
By Удмурт Дунне 15 июня, 2012 11:00

Ӟырдыт вакытсы футболэз яратӥсьёслэн. Украинаын но Польшаын «Евро-2012» ӵошатскон мынэ. Россилэн сборноез шудӥз ни Чехиен но Польшаен. Фанатъёс таӵе нуналъёсты чидатэк витё, нош Ижысь бадӟым сюресъёс вӧзын улӥсьёс аляк поттӥсьёслэсь кытчы кариськыны уг тодо.

8-тӥ июне матч ортчем бере полицие 43 мурт жингыртӥз, ӵашетӥсьёс вылэ ӝожтӥськыса. Соку уго футбол понна висисьёс, мылкыдзэс ӧръяса, ульчаосы потӥзы.

— Котьку сямен фанатъёс пото Удмурт, Пушкин, Киров, Ленин, Советской урамъёсы, — шуэ полицилэн кивалтӥсезлэн воштӥсез Сергей Козлов.

12-тӥ июне Россилэн сборноез вожвылъяськиз Польшаысь командаен. Югдурез чакласьёс но ӧз изе. Футболэз гажасьёсты соос ульчаын возьмазы. Та нуналэ 120 инспекторъёс городысь сюресъёс вылэ потӥзы. 80 фанатъёс кыл кутон улэ шедизы.

Полицейскойёс азьвыл ик дасяськизы бере, калыклэн ӝожтӥськонъёсыз но ичигес — 12 пол — тупазы. Инспекторъёс штраф сётӥзы 40-лэсь уно водительёслы. Пӧлысьтызы 31 мурт ульчаосын, сигнал сётыса, ворттылӥз. Озьы ик тыриськон улэ шедизы 15 пассажиръёс но. Таосыз ярато, автомобиль укноысь флагъёсты мычыса, ворттылыны. Флагъёсты одӥг метрлэсь палэнэ поттон сюрес вылын кышкытлык кылдытэ. Таӵе фанатъёслы 1 сюрс манет штраф лякемын.

Елена Скворцова.

Удмурт Дунне
By Удмурт Дунне 15 июня, 2012 11:00