«Сактон» сактэ выльзэ

Удмурт Дунне
By Удмурт Дунне 18 июня, 2012 09:09

«Сактон» сактэ выльзэ

З. Степнова.

Шаерысьтымы «Сактон» огазеяськон Россиысь азьмынӥсь предприятиос пӧлын ветлэ. Берло 5-6 ар ӵоже огазеяськон вуз поттонзэ 2 поллы будэтӥз. Коллектив, нокыӵе шуг-секытъёс шоры учкытэк, калыклы чебер дӥсь керттэ-вуре, пыд йылаз йыг-йыг сылэ. Предприятиен 20 арлэсь кема быгатыса кивалтэ ни Зоя Степнова. Татын со 40 арлэсь кема ужа ни.

Элькунысьтымы Капчи промышленностья огазеяськонэн кивалтӥсен З. Степноваен ми пумиськылӥм капчи промышленностьысь ужасьёслэн нуналзы азьын.

— Зоя Ивановна, праздниктэс туэ кызьы пумитады?

— Июньлэн кыкетӥ арнянуналаз пусйиськись праздникмес арлы быдэ выль азинсконъёсын, умой мылкыдын пумитаськом. Со милям сяме пыӵамын ни. Котькудӥз ужась туж чупрес берга, лулысь-сюлмысь тырше. Соин ик предприятие толэзьысь толэзе, арысь аре планзэ мултэсэн быдэсъя, производствое выль амалъёсты пыӵатэ. Басьяськисьёслэсь ялан будӥсь кулэяськонъёссэс лыдэ басьтыса, пӧртэм пумо выль дӥсь поттон сярысь ялан сюлмаськиськом. Ваньмыз со пайдаен берытске. Чебересь кофтаосмы, дэремъёсмы, нылпи дӥськутмы магазинъёсын лошъяськыса уг кылльы.

«Сактонын» поттэм дӥськут - тузӥ.

— Кызьы сыӵе ӟеч дӥськут поттыны быга­тӥськоды?

— Ми ноку но, огинтыямы лёгаськыса, ум улӥське. Ялан выльдӥськом машинаосмес но выль ужан амалъёс утчаськом. Та борды рос-прос кутским 1992-тӥ арысен. Со дырозь полуавтоматъёсын дӥсь керттӥм, ас дыраз соос умоесь вал, но ӝог вужмизы, туала куронъёслы ӧз тупалэ ни. Соосты воштӥм «Соболь» автоматъёсын. Сыӵе оборудование поттэ вал Италиысь «Протти» фирмалэн лицензиезъя Свердловскысь завод. Со вакытэ Россиын талэсь ӟеч машинаос ӧй вал. Асьме коньдонэн но, кредитэ пырыса но, 43 машина басьтӥм. Россиын ми огез узырез предприятие луим.

«Соболен» керттӥськыса, ужазинлыкмы дас поллы йылӥз, одӥг смена ӵоже 4 интые 40 дӥсь вурыны ӧдъям, дӥсьмы туж ӟеч вал. Но дыр ортчемъя рыноке вуизы Турция, Китай, Корея, Белоруссия но Азиысь музон кунъёс. Озьы Россиын поттэм вузъёсмы ваньмыз-ӧвӧлэз 20 процент кылизы. Но ми ялан возиським, ӧм куашкалэ, техникаез выльдонъя нош ик выль план кутӥм. Со чакламын 2014-тӥ арозь. Та ужмес мытӥм дуннеысь усто фирмаослэн машинаосынызы ужаны дышетскон бордысен. 2005-тӥ арын валтӥсь инженермы Ирина Монахова ветлӥз Италие калыккуспо адӟытонэ. Со сӥземын вал туала керттӥськон оборудованиез возьматонлы. Собере басьтӥм уката ӟеч «Протти» автоматъёс. Со юрттӥз ужазинлыкмес эшшо ӝутыны, ӟеч дӥсь поттыны. Табере заводын киын ужасез уд адӟе. Оглом вераса, предприятие 2006-тӥ-2010-тӥ аръёсы выль оборудование басьтыны 50 миллион манет висъяз, озьы ваньбур поттонмес 2 поллы будэтӥм.

Коллективын юнмаз азьланезлы бадӟым оскон. Чебер но вылӥ ӟечлыкен дӥсь поттон сярысь трос сюлмасько производстволэн но выль дӥсь вуронъя цехлэн кивалтӥсьёссы Ирина Пешкина но Нина Малова. Нош оборудованиез ӟеч ужатон ласянь трос лэсьто валтӥсь механик но энергетик Александр Шуклин но Сергей Краснопёров.

— Зоя Ивановна, поттэм вузъёсты кытчы кошко?

— Огазеяськон али выже выль ужан амалэ, воштӥське маркетингъя политика. Со нырысь ик герӟаськемын дебиторской тыронъёсты быдтонэн, быдэс Россиын кусыпъёсмес паськытатонэн но уногес пайда басьтонэн. «Сактон» туала рынокын зэмос бренд луиз ни. Вузъёсмес тодо ни быдэс Россиын, Москваысен кутскыса Дальний Востокозь. Али дӥсьмес вузаськом Россиысь 55 городъёсын но 43 улосъёсын. Со пӧлысь 37-аз тупатэмын бадӟымесь оптовой басьяськисьёсын кусыпъёс. Котькудаз толэзьлы быдэ ӝыны миллион манетлы вузъёсмы кошко. Берло дыре вузъёсмылы сюрес шедьтӥм Архангельск, Воронеж, Ленинград, Ярославль улосъёсы, Забайкальее но Приморьее. Нош Удмуртиын дӥсь вузанмы 7 но ӝыны поллы йылӥз. Ижын гинэ 5 фирменной магазинмы ужа. Озьы ик усьтэмын Вотка, Сарапул, Можга, Глазов, Чайковский городъёсын но Эгра посёлокын. Нош представительствоосмы ужало Москваын, Новосибирскын но Казаньын. Оглом вераса, вуз каронмы ялан паськыта но будэ. Соин ӵош ик производствомы кужмоя. Кияса ёросын вуриськон цех усьтӥм. Но тужгес шумпоттэ спортъя дӥсь вурыны-керттыны кутскеммы. Со калыклы кельше, отын синтетикаез ӧвӧл.

— Россилэн ВТО-е пыремез уг кышкаты-а?

— Со дӥсь, пыдкутчан вурисьёслы но капчи промышленностьысь мукет удысъёслы трос шуг-секытъёс ваёз. Малы ке шуоно кунгож сьӧрысь 1,5-2 пол тросгес вузъёс вуозы. Али Россия 20 процентсэ гинэ дӥськутэз ачиз поттэ, нош азьланьын со 10-15 процент гинэ кылёз. Конкуренция уката лекомоз. Но ми оскиськом, «Сактон» рыноке кылёз, ас интымес нокинлы ум сётэ. Вылӥ ӟечлыкен продукция поттыны милям ваньмыз вань. Данакез ужасьёсмы, 35-40 ар ужаса гинэ, пенсие пото. Арысь аре дорамы тросгес егитъёс лыкто. Али толэзьлы быдэ 3-4 миллион манет тыр вуз кариськом. Миым тани огазеяськон 664 сюрс пумо дӥсь поттӥз. Фабрикаын усьтэмын нимаз куронъёсъя дӥсь вурон ателье. Отчы уно калык ветлэ. Озьы ми адямиосты чебер дӥсяны сюлмаськиськом.

Геннадий Романов.

Удмурт Дунне
By Удмурт Дунне 18 июня, 2012 09:09