«Батырын» тырше батыр калык

Удмурт Дунне
By Удмурт Дунне 29 июня, 2012 14:06

«Батырын» тырше батыр калык

В. Григорьев.

Сьӧлта ёросысь вань гурт хозяйствоос пӧлысь тужгес бадӟымез но умой ужасез луэ «Батыр» огазеяськон. Со кылдӥз 2007-тӥ арын ляб ужась хозяйствоослэсь. Азьтэмскыны кутскем калык ӝабыр-ӝабыр басьтӥськиз уж борды. Татын зэмен но батыр калык тырше, коллективез туж валаса но быгатыса, кужымзэ но дырзэ жалятэк, нуэ Валерьян Григорьев.

— Валерьян Иванович, хозяйстводы сярысь вакчияк тодэммы потэ.

— Эштосмы али ёросын тужгес бадӟымез. Музъеммы 8 сюрс гектарлэсь ятыр, нош со пӧлысь гыроно-кизёноез 6 сюрс гектар пала. Пудо уно вордӥськом бере, трос но одӥг аръем турынъёслы 2 сюрс 500 гектар котыр му висъяськом, кылемаз тысё но пуртэсо юос будэтӥськом. Ӟегмы гинэ 600 гектар. Валэс юос пӧлысь тросгес кизиськом чабей, сезьы но йыды. Козлятник турынмы 84 гектар. Но лябгес пушъе на, кидыссэ, пе, волятоно-лущить кароно. Валтӥсь агрономмы Владимир Иванов туэ озьы дауртӥз ни. Егит ай со, куинетӥ арзэ гинэ ужа, солэсь пӧрмоз усто специалист, тыршись адями. «Батыр» хозяйствоын урод ужаны возьыт.

Юосмес туэ дыраз, агротехникалэн куронъёсызъя ӟеч дасямы, быг-быг небыт музъеме кизимы. Миым но котькуд гектарысь 16,4 центнер ю тысь кутсамы вал, туэ но солэсь ичи уз луы шуыса чакласькомы.

Берло дыре бадӟым саклык висъяськом таза, ӟеч кидыс уськытонлы. «Гундер» сезьымы нырысетӥ репродукциысь. Сое басьтӥм асьме ёросысь «Звезда» эштослэсь, нош элита йыды вуттӥм Пичи Пурга ёросысь «Уромский» СПК-ысь. Туэ «Апсайский усатый» ӟеч сорт кӧжы басьтыны малпаськом. Выль но туала сортъёстэк удалтэм ю-нянь ноку уд будэты. Но соин ӵош ик лудъёсмес кыедан сярысь но ум вунэтӥське, музъем ужанэ выль амалъёсты кутӥськом. Со понна арысь аре выльдӥськом гырон-кизён но аран техникамес. Берло куинь-ньыль ар ӵоже басьтӥм дас кык МТЗ-80 трактор, ю тысь кутсаны ньыль КЗС-812 комбайн, пудо сиён дасяны кык КСК-600 кужмо комбайн но мукетсэ. Милемлы та машинаос тырмо юосты но турынъёсты дыраз но ыштонъёстэк утялтыны.

Эшшо одӥг шумпотонме вераме потэ на. Миым 1000 тонна ю тысь возьыны туж ӟеч склад пуктӥм. Сое арочной шуо, корт кема чиданы кулэ.

— Нош пудо вордонды кызьы азинске, та ласянь вань-а пусйымонэз?

— Али гурт удысын югдур котькытын одӥг кадь. Музъем ужасьёс тросгес сӥль-йӧл поттон вылысь тыршо. Ми но озьы ик ужаськом, та удысэз азинтонлы нимысьтыз саклык висъяськом. Макем тросгес йӧл но сӥль поттӥськод, сокем ӝоггес азинске хозяйство, юнма экономика но умоя гурт калыклэн улон-вылонэз. Пудо вордон вылын возиське эштос! Тӥни соин ик пудо уллёмес ялан будэтӥськом. Али сюро таза пудомес 1 сюрс 670 йырозь вуттӥм ни. Со пӧлысь скалъёсмы 632 йыр. Вань пудомы 5 фермаосы интыямын. Быдэн 200 скал возиськом Юмга-Омгаын но Сюромошурын. Та фермаос котьку сямен азьпал радын ветло, кивалтӥсьёссы Галина Столбова но Людмила Молчанова. Тол но, гужем но ужъёссэс валаса нуо. Соослэсь адӟем каро мукетъёсыз но.

Пудо вордонэз быгатыса радъя валтӥсь зоотехник Галина Макарова. Со трос сюлмаське выжыез умоятон-тазамытон сярысь. Туэ быдтом лейкозэн курадӟись скалъёсмес, соос трос ӧвӧл, 46 йыр гинэ кылемын на. Али котькуд скаллэсь нуналаз шорлыдын 13-14 килограмм йӧл кыскиськом. Йӧлэз сӥятыны 3 танк пуктэмын, одӥгаз 5 тонна тэре, кыказ — быдэн 3 тонна. Вузаськом «Увамолоко» огазеяськонэ но Дэри ёросысь Ожмосысь «Любава» йӧл цехе. Али со «Молпром» огазеяськон луиз ни. Йӧлмес асьсэос нуо, ваньмыз сямен вылӥ но нырысетӥ сортэн кошке. Напез 3,5 процент возиське, белокез — 3,1. Толалтэ одӥг литрмес 14 манетэн басьтӥзы, нош али 12 манет но уг луы ни. Переработчикъёс ми чотын зол гинэ узырмо. Но ми номыр карыны ум быгатӥське. Малыез тодмо: Россиысь но Удмуртиысь вылӥ кивалтӥсьёс таӵе югдурез тодыса вылысь нокыӵе ужрадъёс уг куто, дунъёсын шудон кемалась мынэ.

Таӵе умойтэм политика шоры учкытэк, ми азьлане вамыштӥськом, фермаосмес выльдӥськом но ӟеч оборудование басьтӥськом. Валля арын Лудӟи-Ӝикъя гуртын 200 скал тэрымон выль гид ӝутӥм. Али сомында йырлы ик гид пуктыны малпаськом Югдон гуртын. Сое вуоно арын вуттыны чакласьком. Малпанмы одӥг — туэ котькуд скаллэсь шорлыдын 4 сюрс 500 килограмм йӧл кысконо. Со быдэстымон ужпум.

— Валерьян Иванович, гурт калыклэн берло дыре улонэз умоя, нош хозяйство кызьы юрттэ егит специалистъёслы?

— Одӥг эштос но ас ужасьёсызлы юрттытэк уг улы. Ми но озьы ик. Пудо вордыны, бакча возьыны но лэсьтӥськыны юрттэм сяна, егит специалистъёслы корка пуктыса сётӥськом. Озьы хозяйстволэн юртаз уло ни валтӥсь агроном Владимир Иванов, валтӥсь экономист Инна Павлова (али пиналэн пуке), ӝоген корка пырон лэсьтоз егит ветврач Наталья Пьянова. Нош кин ачиз юрт ӝутыны кутске, соослы юрттӥськом транспортэн, кирпичен, пиломатериалэн но мукетыныз.

Геннадий Романов.

Удмурт Дунне
By Удмурт Дунне 29 июня, 2012 14:06