Ӵыжан, чиган но тюльпан

Удмурт Дунне
By Удмурт Дунне 30 мая, 2012 09:15

Ӵыжан, чиган но тюльпан

Настя Петрова.

Вуоно арын дуннеысь егитъёс Казане люкаськозы. 27-тӥ гужем Универсиадаын кужымзэс мерталозы спортэз яратӥсьёс.

Бадӟым ужрадэз ас доразы ортчытон вылысь бигеръёслы вожвылъяськоно луиз Лымшор Кореяысь но Испаниысь городъёсын — бускельёсмы вормизы. Та вакытэ отын лэсьтӥськон ужъёс мыно ни. Универсиадалэсь данзэ утёзы тужгес но усто но шаплы егитъёс — ӵапак та пумысен кенешыны Казане люкаськылӥзы Россиысь студентъёс. Пӧлазы шедиз Удмурт кун университетын дышетскись Настя Италмас Петрова но. Ӵошатсконэ-дышетсконэ ветлэмез сярысь со мыным мадиз:

— Туж кельшиз, кызьы пумитазы: мусо бигер пияш машинаен монэ соку ик нуиз «Академия Тенниса» бадӟым но чебер юртэ. Отын люкаськемын вал ини трос чебер нылъёс-пиос, милемыз сюдӥзы. Егитъёс вуиллям Пензаысь, Ульяновскысь, Саратовысь, Москваысь, Ярославльысь, Пермьысь но мукет интыосысь. Группаосын вуылэмын: кудӥз ке одно вормисьёс пӧлы сюроз шуыса, дыр. Улӥм студент кампусын: нимысьтыз гурт, сое юромо Универсиада понна пуктӥзы, вуоно арын татын 13 сюрс 500 пала спортсменъёсты витё. Татын ик вань аптека, вуз карон юрт, администрация. Тамак кыскыны уг лэзё — законъёс кампусын чурытэсь. Миндэр пуйыос вылын но Универсиадалэн пусэз пужъятэмын — тюльпан.

Мон бигеръёс доры лемлет малпанэн мынӥ вал — Казанетӥ калтырто, но «не тут то было». Султылӥм 6 часын, 7 бере автобусэн академие мынӥськом ни вал. Быдэс нунал мынэ кастинг. Сюлэсь трос адями возьматӥз быгатонъёссэ — зэмос «Минута славы». Паймылӥ, кызьы сомында чебер нылъёс пӧлысь быръёзы тупасьсэ. Жюриос куд-огезлы соку ик англи кылын юан сётъяллязы: ужрадъёсты кунгож сьӧрысь специалист пуктоз уго. Жюриын вал Казань Универсиадалэн дирекциез, «Мисс Татарстан» ӵошатсконэз радъясьёс, туспуктылӥсьёс, дизайнеръёс.

Огкылын, мон соку ик шуи: творческой номерме сӥзисько Брангурт песянайёслэн «Евровидение» потэмзылы. Соос туж шумпотӥзы, шуизы: ну, учком-учком… Собере мон гала-концертэз усьтӥ. Отчы бырйизы 15 номерез гинэ.

Тодматски «Мисс Марий Эл» нылашен: со пор кылэз уг тод вылэм — соку ик мыным тунсыко потэмысь дугдӥз. Ваньзы паймылӥзы удмурт дэремелы. Чиган-а со шуыса юалляськизы. Ми вормисьёс луим но Универсиадалэн историяз пырим.

Куинь нунал куспын милемлы трос пол вераллязы: та ужрадэ пыриськон — бадӟым дан. Ар ӵоже милемыз пӧртэм ужрадъёсы ӧтчаны быгатозы дуннелэн пӧртэм сэрегаз, возьматозы турлы телеканалъёс пыр. Ми волятом кылмес, дышетском калыкен капчиен кусып тупатыны. Малпасько, улонам та ужрад — тужгес но бадӟымез но куаш-куашез.

Тау кареме потэ деканмылэн воштӥсезлы — Евгения Сундуковалы. Со монэ трос пол «ӵыжаз» но мылкыдме лӧпкытъяз.

Дарали Лели.

Удмурт Дунне
By Удмурт Дунне 30 мая, 2012 09:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<