Юртъёс «кисьмало»

Удмурт Дунне
By Удмурт Дунне 15 мая, 2012 09:21

Удмурт Республикаысь Правительство бордын кылдытэм комиссия син шораз возе пӧям дольщикъёслы юрттонэз. Соос улон интылы басьтэм кредитъёссэс уно аръёс ӵоже тыро ини, нош али ке но асьсэ сэрегъёсазы улыны ӧз потэ на.

Та понна янгыш лэсь-тӥськонъя огазеяськонъёс: одӥгъёсыз, калыклэсь уксёзэ бичаса, чиптэм-чаптэм ышизы, мукетъёссэ зол шуккиз кризис — лэсьтӥськон ужъёссэс уретоно луизы.

Шумпотымон: пӧям дольщикъёслы юрттон борды Правительство басьтӥськем бере югдур тупатскиз. Та ужпумез та вакытэ сэртто шаерысьтымы уно министерствоос но ведомствоос — кылдытэмын нимысьтыз комиссия.

— Лэсьтӥськонъя куд-ог огазеяськонъёс банкротэ вуттэмын, мукетъёсыз вылэ уголовной ужъёс ӝутэмын, — ве-ра Правительстволэн Тќроез Юрий Питкевич. — Югдурез утёнъя министерство та ласянь ужзэ азинтоз — калыкез пӧямъёсты одно ик кыл кутонэ кысконо. Но та дольщикъёс вылын медаз шӧдӥськы. Сотэк но соослы трос курад-ӟоно, бӧрдоно луиз ни. Пӧяськисьёсты кырмоно, нош улон интызэс аръёсын возьмасьёслы дэмен юрттоно.

Калыклэсь уксёзэ бичаса пуктыны кутскем но пумозяз-йылозяз вуттымтэ улон юртъёс Удмурт шаерын 14 пала лыдъясько. Та ласянь «воректӥзы» лэсьтӥськонъя 11 огазеяськонъёс. Соос пӧязы 1 сюрс 300 муртэ. Нялтас вераса, та лыдпус унояны кутскиз берло аръёсы. Угось 2006-тӥ арын пусъемын вал 3 учыр, 2007-тӥ арын — 4, 2008-тӥ арын — 9 учыр, 2009-тӥ арын — 14.

Лэсьтӥськонъя, архитектурая но улон инты политикая министерствоысь специалистъёс пусъё: калыкез пӧ-ям огазеяськонъёсты кыклы висъяны луоз. Нырысетӥосыз пуктӥськон борды кутско, Лэсьтӥськонъя, Музъем кусыпъёсъя кодексъёсты тӥяса, озьы ик долевой амалъя пуктӥськонлэсь куронъёссэ чаклатэк. Таӵеос пӧлы пыртыны луоз Ижысь Л. Толстой урамысь 24 но 28 номеро юртъёсты, Ворошилов, Баранов, Коротков, Либкнехт, Сабуров ульчаосысь трос этажъем коркаосты. Та объектъёсын квартираоссэ вите 955 (!) семья.

Кыкетӥосыз огазеяськонъёс секыт югдуре шедизы кризисэн валче. Лэсьтӥськонзэс мытӥзы но ӝоген банкротэ вуизы. Таослэсь кибервылзэс синйылтыны луоз Ижысь Дзержинский, Петров, Аристов Ключ урамъёсын. Отын йылозяз-пумозяз вуттымтэ юртъёсын сэрегзэ вите 400 пала адями.

Со сяна, берло аръёсы шараяськиз на мукетыз ужпум: нимаз юрт пуктонлы висъям музъем вылын зор бере губиос кадь ӝутско трос квартираен коркаос. Соос пуктӥсько нимысьтыз проекттэк, эскерон ужрадъёстэк. Таӵе дыръя лэсьтӥськонъя огазеяськонъёс пыкъясько «дачной амнистия сярысь» закон вылэ: коркаез ас вылазы гожто но отысь висъетъёссэ вузало. Таӵе юртъёс пуктӥсько, нимысьтыз куронъёсты чаклатэк. Соин ик отчы каръяськем семьяослы кышкытлык кылдыто. Та ужпумез сак чакласа возё ни пӧртэм ведомствоос. Соин ик азьланяз таӵе учыръёс уз луэ ни.

Правительствоын радъяськем кенешонын тодмо луиз: ньыль юртъёсысь пӧям дольщикъёс матысь толэзьёсы пусъёзы корка туйзэс. Кылсярысь, Л. Толстой урамысь 24 номеро юртлэн кыкетӥ люкетэз йылозяз-пумозяз вуттэмын ни.

Матысь толэзьёсы ик йылпумъяськоз «Кантек» огазеяськонэн Дзержинский урамын мытэм пуктӥськон но. Майлэн пумаз отчы улыны выжыны луоз ни. Ижысь Ворошилов ульчаысь 127 номеро юрт быдэсмоз. Туэ мае яке июне корка пыронзэс озьы ик пусъёзы Коротков урамысь юртлэсь «кисьмамзэ» витисьёс. Лэсьтӥськон ужъёсты йылпумъяны республикалэн но Ижлэн бюджетъёсысьтызы 8 миллион манет висъямын.

Елена Никитина.

Удмурт Дунне
By Удмурт Дунне 15 мая, 2012 09:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<