Шляпаен Борис

Борис Семёнов.

Та адямиен мон но кемалась тодматски вал ини Ижысь одӥгаз патиын. Соку сое мукет адямиос пӧлысь висъя вал пужыё дэремез но шляпаез. Борис Семёнов со.

Солэн персонаез удмурт газетэ гожтон понна тунсыко потӥз али гинэ, малы ке шуоно «Квартира» барын ортчем удмурт ужрадын со кизили кадь воректӥз-пиштӥз, ваньзэсты паймытӥз аспӧр­тэмлыко луэменыз.

— Кызьы тон удмурт патие вуид? Кин ке кыскыса вайиз яке сюлмысь тунсыкъяськиськод?

— Эшъяськисько Вова Жуйковен. Со Silent Woo Goore группаын гитараен шудэ бере, монэ но соин тодматӥз. Синмаськи та группалы! Йырме поромытӥз удмурт кыл, кырӟанъёс, соослэн творчествозы! Зэмзэ вераса, удмурт кыл мыным аспӧртэмлыко кылӥськеменыз азьло но кельше вал, но берло дыре синмаськонэ эшшо кужмояз. Бен, удмурт кылэз мон уг валаськы, но шаермылэн историез, культураез мыным туж дуно но тунсыко.

— Мар сярысь Silent Woo Goore кырӟа, валась­код-а?

— Мон лыдӟисько кыр­ӟанъ­­ёслэсь ӟуче берыктэм кылбуръёссэс, туж тунсыко потэ. Со сяна, эшъёсы но валаны юртто. Эшшо кельшиз Эльвира Панченколэн Питерысь группаен алигес кырӟамез. Шумпотӥсько, асьме удмуртъёсмы Россиысь кыӵе ке мукет коллективъёсын ӵош проектъёс лэсьтыны быгато шуыса.

— Нош удмурт сям-йылолъёсты адӟылэмед вань-а?

— Традиционной удмурт улонэн мон тодматски гуртысь сюанэ нырысьсэ сюреме бере. Зыретэн табань кельшиз, эшшо тодам кылиз на егит кузпалъёслэн карнанъёсын ву нуллонъя ӵошатсконзы.

— Астэ удмурт егитъёс пӧлын кызьы шӧдӥсь­код? Удмурт ӝытъёс ӟучезлэсь пӧртэм яке соос ог-огзылэсь чик но уг висъясько?

— Мыным туж кельше удмурт егитъёс пӧлын. Соослы луыса удмурт культура азинскыны ӧдъяз. Тани басьтом «PARTY FOR EVERYBODY» фестивалез — отчы люкаськизы выль удмурт коллективъёс, кырӟасьёс, дизайнеръёс. Та ваньмыз туж данъяськымон! ӝыт куспын тодматски выль адямиосын, дырме туж пайдаё ортчытӥ. Нош ӟуч патиос туж ик уг висъясько удмурт тусовкаослэсь — угось котькудаз ӟуч патиын одно ик пумисько яркыт удмурт егитъёс…

Мария Галеева.