Уродзэ палэнтоно, ӟечсэ кысконо

Удмурт Дунне
By Удмурт Дунне Май 29, 2012 09:46

Уродзэ палэнтоно, ӟечсэ кысконо

Съездын.

Москваын ортчиз «Огъя Россия» партилэн 13-тӥ ӧтчамез. Отын ӝутэм валтӥсь ужпум — партиез выльдон, юнматон. Съездын «Огъя Россилы» тӧрое быръемын вал премьер Дмитрий Медведев.

Делегатъёс азьын нырысь вераськиз Президент В. Путин: аслэсьтыз азьветлӥсь луэмзэ «Огъя Россия» возьматыны кулэ зэмос ужъёсын. Озьы гинэ со котыраз трос калыкез огазеялоз. Партиен кивалтонлэсь со куштћськиз, малы ке шуоно лыдъя, Президент вань партиослэсь тунсыкъёссэс лыдэ басьтыса ужаны кулэ. Интыяз со чектћз Д. Медведевез.

В. Путин бере мылкыдзэ кисьтӥз Д. Медведев: кунамы ӝоген выль но выль партиос кылдылозы, нош туэ сӥзьыл куд-ог субъектъёсын губернаторъёсты меӵак быръёнъёс ортчозы. Ваньмыз та демократиез юнматон луэ. Со дыре ик премьер пусйиз: политикаын азьвыл вормонъёс уг верало на, азьланяз но ваньмыз вормон тулкымъёс вылын мыноз шуыса. Партия азьын выль ужпумъёс, лэсьтоно ужъёс сыло.

Медведев оскемзэ вераз, «Огъя Россия» огазея кунмы понна сюлмынызы висись адямиосты. Берло аръёсы партилы луыса Россиын трос ужъёсты быдэстыны луиз. Нырысь ик, экономикаын кризис дыръя огсыр азинскыны быгатӥм. Кун Думаысь «Огъя Россия» фракция сюлмаськемен, кутэмын вал обществомылы кулэ луись законъёс. Думае но Президентэ быръёнъёс возьматӥзы: «Огъя Россилы» оско. Но со дыре ик азьветлӥсь пусйиз: партилы одно ик выльдӥськоно.

— Партиын одӥг должность но пыраклы уг сётӥськы, — шуиз Дмитрий Анатольевич. — Соин ик дась луоно: интыос понна зол вожвылъяськон пуромоз. Озьы ик луыны кулэ, угось сыӵе вожвылъяськон быдэс дуннеын вань. Со адямиослы, партилы азинскыны луонлык сётэ.

«Огъя Россилэсь» ёзчиоссэ Медведев куриз:

— Партия ласянь пӧясь-конъёс шоры кидэс шонтоно ӧвӧл, азьлань мыноно, номыр шоры учкытэк, визьмын. Валамон, «Огъя Россия» властез ас кияз кема дыр ӵоже возе ни, куд-огез солэсь жадьыны но кутскиз, вылды. Соин азязы укыр бадӟымесь куронъёс пуктыны кутско. Тужгес ӝожез: интыосысь чиновникъёслэсь, властьлэсь, кивалтӥсьёслэсь куд-ог янгышъёссэс быдэс партия вылэ выжто, солэн ёзъёсыз оглом ӟеч ужало ке но. Озьыен, асьмелы ужъёсмы сярысь вераны быгатоно. Со — зэмос искусство. Асьмелэн бере кылён правомы ӧвӧл.

Премьер меӵак вераз: «Огъя Россия» аслаз радъёсысьтыз палэнтыны кулэ данзэ сьӧдмась муртъёсты.

— Партие пырисьёс пӧлысь тросэз зэмлыко, ӟеч адямиос. Но бордазы ялан лякиськыны выро кыӵе ке «проходимецъёс», — шуиз Дмитрий Анатольевич. — Сыӵе няняськисьёс вань мукет партиос котырын но. Милемлы соос кулэ ӧвӧл. Малпасько, партилэсь радъёссэ сузянъя бадӟым кампаниос кулэ. Со дыре ик бордамы тросгес кысконо визьмо, мыло-кыдо адямиосты, егитъёсты.

Медведевлэн верамезъя, «Огъя Россиын» валтӥсь интыын луоз егитъёсын ужан. Со сяна, улонэ пыӵаны кутскоз «Электронная партия» проект.

Партилэн выльдӥськыны кутскемез съездысен ик адӟиськиз ни. Угось Генеральной секретарез быръён ортчиз, куараез лушкем сётыса, куинь дэмлам мурт пӧлысь. Бырйизы Сергей Неверовез. Нош «Огъя Россия» партилэн улосъёсысь кивалтӥсьёсыз малпаськонэ усизы, угось табере соослы но интыосын быръёнъёс пыр потоно луоз. Озьыен, гань-гань пукыны маза уз луы. Съездын ик быръемын вал партилэн Вылӥ кенешезлэн тӧроез но. Тазэ интыез нош ик оскизы Борис Грызловлы.

Ӧтчамын партилэн уставаз воштонъёс пыртэмын вал. Вылӥ но Генеральной кенешъёслэн, контрольно-ревизионной комиссилэн выль ёзчиоссы юнматэмын. Нош Медведев азьланезлы ужпум пуктӥз: вить ар ортчыса, «Огъя Россия» Кун Думае быръёнъёсы пыриськыку, асьмелы нош ик нырысетӥ инты басьтоно, Парламентын ӝыныезлэсь тросэз инты единороссъёслэн мед луоз. Нош партилэн Генсоветэз арлы быдэ ӧжытсэ 10 процентлы вошъяськыны кулэ, вить ар ӵоже ӝыны составез выльдӥськемын мед луоз. Сыӵе дэмланъёссэ вераз Дмитрий Медведев.

Съезд ортчем бере куд-ог эскерисьёс оскемзэс веразы: партия зэмзэ но выльдӥськоз, паськыталоз, «бадӟым медведевской призыв» ортчоз.

Елена Миннигараева.

Удмурт Дунне
By Удмурт Дунне Май 29, 2012 09:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<