Улонлэн урдсаз медаз кыле

Удмурт Дунне
By Удмурт Дунне Май 25, 2012 09:19

Улонлэн урдсаз медаз кыле

Кун Кенешысь депутатъёс Якшур-Бӧдьяысь 5 номеро нылпи садын.

Кун Кенешлэн Президиумезлэн берлоез кенешонэз сӥземын вал инвалидъёслэсь улон-вылонзэс умоятонлы но нылпи садъёсын тодон-валан сётонэз радъянлы. Парламентлэн Тӧроеныз Александр Соловьёвен ӵош ялан ужась комиссиослэн кивалтӥсьёссы вуылӥзы Ижысь но Якшур-Бӧдья районысь куд-ог учреждениосы.

 

Сӧсырлэн йырвисёнэз

Калыклы улон-вылонын юрттэт сётонъя министерство ивортэмъя, шаерамы 128 сюрс адями инвалидностья пенсия басьтэ. Пӧлысьтызы 13 сюрсэз — ӧлексы нылпи будэтӥсьёс. Лыдпусъёс малпаськытӥсесь: республикаямы улӥсьёс пӧлысь 8 процентэз — инвалидъёс, Россиын та лыдпус бадӟымгес — 10 процент.

Сӧсыръёслы юрттэт пенсия гинэ луыны кулэ ӧвӧл. Тани Ижысь протезъёс лэсьтонъя предприятие ӧлексыослы 70 ар ӵоже юрттэ ни. Озьы ке но вань кулэяськисьёслы протез соку ик уг вуы. Мугез одӥг — коньдон уг тырмы.

Предприятилэн кивал-тӥсез Сергей Суворов верамъя, 490 мурт возьма пӧртэм пумо протез, нош туэ быдэстэмын ай 189-эз гинэ.

Кун Кенешысь Социальной политикая ялан ужась комиссилэн тӧроез Ольга Черкасова пусъе: инвалидъёс медаз шӧдэ, соос улонлэн урдсаз кылемын шуыса. Туннэ тужгес сюлмаськытӥсь ужпум — уже интыян. 21 сюрс инвалидъёслэн арлыдзы ужаны тупа, нош пенсия вӧзы уксё поттыны быгатэ пӧлысьтыз 50 процентэз гинэ. Тани миым уже интыямын 770 мурт гинэ. Предприятиослэн кивалтӥсьёссы уг дырто уже кутыны висисьёсты, уго соку ужан инты радъяно, условиос кылдытоно. Таӵе дыръя федерал законэ воштонъёс пыртоно, шуэ Ольга Черкасова. Инвалидэз уже басьтӥсьтэм огазеяськон уксё мед тыроз. Таӵе ӵектонлы проект дасяны ӧдъяло асьме Кун Кенешысь депутатъёс, соин вазиськозы Кун Думае.

 

500 пиналлэн бӧрдонэз

Якшур-Бӧдья ёрослэн тужгес висись «пӧськыез» — нылпи садъёсын интыослэн окмымтэзы. Районысь ог 500 пинал путёвка вите, пӧлысьтызы 360-эз — райцентрысь тэшкылиос. Югдурез ӧжытак ке но тупатон вылысь, интыысь кивалтӥсьёс ӵектӥзы черкогуртысь пиналъёсты нуллыны матысь гуртъёсы.

— Ог 50 нылпиез мумы-бубыоссы нуо 7-10 иськемысь гуртъёсы. Якшур, Пушкар, Порву, Кенервай садъёсын ватсаса интыос усьтэмын вал. Кӧня ке ар талэсь азьло райцентрысь гимназилэн огпал сэрегаз но нылпи сад усьтӥзы — татын 4 группалы инты окмиз, — вера ёрос администрацилэн йырыз Андрей Леконцев.

Озьы но югдур лэчыт на. Уката сюлэмшугъяськытэ Якшур-Бӧдьяысь 5 номеро нылпи сад. 1938-тӥ арын пуктэм пу юртын 3 группа усьтэмын. Но интыез сокем ӟоскыт — вань нылпиослы мисьтӥськон, педло потан интыез но одӥг. Огезлэн группалэн ӧвӧл изён висъетэз но. Нылпиосты кӧлыны выдто раскладушкаосы, нуназе иземзы бере покчиос татын ик шудо.

Удмуртиез азинтон программая райцентрын пуктыны чаклало 190 интылы нылпи сад. Солэн проектэз вань ни, нош ӝутскозы-а борддоръёс — таиз туэлы чакламын ӧвӧл.

Гимназиын сямен ик группаос усьтыны луысал ляб адӟись но сукыр нылпиослэн школа-интернатазы. Татын интызы вӧл-вӧл. Интернатын уло но дышетско быдэс шаерысьтымы нылпиос. Но юрт возьма тупатъянэз. Матысь аръёсы лэсьтӥськон ӧз кутскы ке, липет но куашканы быгатоз. Интернатысь нылпиослэн ӧвӧл асьсэлэн транспортсы. Соин Кун Кенешлэн Президиумез вазиськон дасяз Президентлы школалы автобус висъян пумысен. Со сяна, та юртлэн огпал сэрегаз усьтыны быгатысалзы нылпи сад. Кылсярысь, черкогуртын уг тырмо алама вераськись нылпиослы нимаз группаос. Интернатын быгатысалзы 60 пиналлы инты шедьтыны.

Кун Кенешлэн Тӧроез Александр Соловьёв пусйиз: нылпи садъёс пумысен сюлмаськонлэсь ум пегӟиське. Тани бускель Киров но Пермь улосъёсын мукет амал ӵекто: анай-атайёслы, пиналзылы садын инты ӧвӧл ке, пособие тыро. Но секыт югдурез таин уд тупаты. Соин Кун Кенеш вазиськоз Правительствое черкогуртысь пу юртысь вуж сад пумысен но, школа-интернатэз тупатъян ласянь но.

Со сяна, Президиум ӵектонэн потоз Правительствое школалэсь азьло тодон-валан сётон удысъя нимаз программа кылдытон пумысен. Озьы ик одно быдэсъяно федерал куронъёсты. Соосъя садъёсы но вуыны кулэ компьютеръёс, выльдӥськыны кулэ сиён дасян оборудование. Та ужъёсты быдэстонлы коньдон висъяны луысал бюджетэ ватсаса вуэм уксё чотын. Нош таяз арын сыӵе коньдон одно ик лыктоз на.

Елена Скворцова.

Удмурт Дунне
By Удмурт Дунне Май 25, 2012 09:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<