Тыбырам адреналин бышко

Удмурт Дунне
By Удмурт Дунне Май 4, 2012 15:57

«Пётр Чайковскийлэн вордӥськем палъёсаз» 55-тӥез крезьгуро фестиваль чотын шаерамы куинь нуналлы вуылӥз Россиысь калык артист, «Стиляги», «Каменская», «12», «Доктор Живаго» но мукет кинофильмъёсын но  Москваысь «Современник» театрын шудӥсь актёр Сергей Гармаш.
Театрын 20-лэсь трос, нош кинофильмъёсын 100-лэсь уно рольёсты шудэм воргорон Воткинскысь но Ижысь учкисьёслы Удмуртиысь Симфонической оркестр чузъяськем улсын лыдӟиз Шарль Перролэсь «Спящая красавица» выжыкылзэ. Нырысь ик сое дунъязы Воткинскын улӥсьёс. Ижысь Операя но балетъя  театрын концерт возьматэмезлэсь азьло Сергей Гармаш журналистъёсын вераськиз. Артистэн кенешон, ӝыны часлы ӝегаса, кутскиз ке но,  вакчи но со дыре ик яркыт пумиськонэз ми, иворчиос, кык час но витьыны дась вал.
Воткинскын ортчем концерт пумысен юанлы артист мыло-кыдо валэктӥз:
— Ужрад синмаськымон ортчиз. Монэ тужгес но паймытӥз залын пукись калык. Шонергес вераса, шумпоттӥз солэн арлыдыз — 8-ысен 85 аресозь учкисьёс вал. Заллэн кужымез туж зол шӧдӥськиз. Нокызьы но вератэк кельтэме уг луы Воткинскысь Пётр Ильич Чайковскийлэсь музейзэ но отын ужась адямиосты. Туж аспӧртэм, паймымон, синмаськымон.

— Сергей Леонидович, малы одно ик та выжыкылэз фестивале вайиды?
— Малы ке шуоно со мыным кельше, озьы ик, кызьы кельше П. Чайковскийлэн крезьгурез.  Мон азьвылгес быдэстӥ Б. Шергинлэсь «Волшебное кольцозэ». Ш. Перролэсь «Спящая красавицазэ» лыдӟи 2007-тӥ арын Москваысь сцена вылын. Собере со нокытын ӧз чузъяськылы ни, Воткинскын но Ижын сяна. Соин ик  «Оркестрен выжыкыл» — эксклюзив. Таӵе уж мыным туж яра.

— Кӧня репетициосты вал Удмуртиысь симфонической оркестрен, соку ик-а ог-огдэс шӧдӥды?
— Нотаос оркестрлы лэземын вал апрель кутсконын, но валче репетиция ортчытӥмы Воткинскын концерт азьын гинэ. Огкыл шедьтӥм капчиен. Удмуртиысь симфонической оркестр туж усто — зэмос команда. Тани мон лыдӟисько выжыкыл, нош мышкам шудэ  симфонической оркестр, быдэстэ Чайковскийлэсь паймымон гуръёссэ, со крезьгурлэсь тыбырам адреналин бышко кадь.

— Кыӵе крезьгурез яратӥськоды?
— Пӧртэм. Малпасько, дунне уз быгаты улыны поэзитэк, искусствотэк но крезьгуртэк. Крезьгур чузъяське, машинаын мыныкум, дорын, йырам. Лычсузьыса кылзӥсько Ю. Шевчукез, «Битлз» группаез, Л. Бетховенлэсь 5-тӥ симфонизэ, яратӥсько В. Моцартэз. Мон ноку но уг вала, дыр, кызьы адями гожтыны быгатэ «Реквиемез». В. Моцартлэсь берпуметӥ произведенизэ мон котьку паймыса кылзӥсько.

— Театрын шудӥсь артистъёс тросэз кырӟало, тӥляд сыӵе мылкыдды ӧз кылды-а «Стиляги» киноын кырӟамды бере?
— Мон — драмая театрысь артист,  кырӟась ӧвӧл. «Стилягиын» кырӟай соин гинэ, малы ке шуоно режиссёр Валерий Тодоровский но крезьгурчи Константин Меладзе  туж куризы. Хобби выллем ик луэ мультфильмъёслы куара сётон. Кылсярысь, «Рататуй», «Иван Царевич и Серый Волк» кадьёссэ. Нялтас вераса, аслым но отын ужаны тунсыко вал,  5 но ӝыны аресъем пиелы мультфильм туж кельшиз.

— «Современник» театр гастрольёсы пота-а? Оло, Иже но вуысалды?
— Нош малы Ижевск милемды уг ӧтьы? «Современник» Москваын гинэ уг ужа. Матысь дыре дасяськиськом Екатеринбурге, июнь толэзе мыномы Самарае. Пичи городъёсысь театръёслэн «Современникез» адӟемзы потэ, дыр, но ужпум коньдон борды пыкиське. Удмуртия уксё шедьтысал ке, ми дорады спектакльмес вайысалмы,  но милемлы сыӵе вазиськонъёс  татчыозь ӧй вал на.

— Воткинскын синмаськиды учкисьёслы но П. Чайковскийлэн музеезлы, нош Ижын малы ке паймиды-а?
— Урод сюресъёстылы. Ужас, мар со сыӵе! Мон дорады лыктӥ Пермьысь. Валасько, Россиысь сюресъёс — странамылэн висёнэз, но таӵе-таӵе тӥяськемъёссэ, нюко-гопооссэ мынам адӟылэме ӧй вал на.

— Нош брангурт песяйёсмы уг кельшо шат?
— О-о, мон соослы синмаськемын. Туж шумпотӥсько, песяйёсыныды тодматскыны кылдӥз шуыса. Уката зол лӧптӥсько, ӵапак соос Бакуэ мынозы шуыса. Соос зэмосэсь, мусоесь. Ижысь вань маскарчиосты огинэ люкад ке но, адямиос сыӵе уз пальпотэ, нош таоссэ огпол адӟизы ке, уз вунэтэ ни.
* * *
С. Гармашлэн  Брангуртысь песяйёсын данъяськемез вӧзы Операя но балетъя театрын концерт бере  итӥськиз на Ижысь учкисьёслы  синмаськемез но. Артист тау кариз, выжыкыл лыдӟыкуз, залын туж шыпыт вал шуыса. Выжыкылэз зал шокатэк кадь кылзӥз, сокем аспӧртэм но тунсыко со кылӥськиз. Артистлэн пальпотэмез возьматӥз: Ижысь зал но сое ӧз пӧя — шоркарамы улӥсьёс Гармашлы сылыса чабизы.

Галина Семёнова

Удмурт Дунне
By Удмурт Дунне Май 4, 2012 15:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<