Таза кидыс — ӟеч емыш

Удмурт Дунне
By Удмурт Дунне Май 4, 2012 15:38

Выльдӥськон вакытэ куашказ-быриз Эгра ёросысь одӥгез зол хозяйство — «Зуринский» совхоз. Со интые кылдылӥзы эштосъёс. Но одӥгез но пыд йылазы йыг-йыг ӧз султэ. Югдур воштӥськиз «Зуринский агрокомплекс» огазеяськонэн Елена Чиркова кивалтыны кутскем бере.
«Зуринский агрокомплекс» Эгра ёросысь одӥгез таза кидыс будэтӥсь хозяйство луиз. КЗС-ын уж пӧзе, огез бӧрсьы мукетыз автомашинаос ю тысьлы вуо. Та ужез 33 ар валаса нуэ ни удмурт кышномурт Татьяна Соловьёва. Кидыс дасянъя со ёросын котьку нырысетӥ инты басьтэ. Чырткем, задор мылкыдо кышномуртлэн яратоно ужезлэсь люкиськемез уг поты, пенсие потэмез бере кык ар ужа ни.
— Куинетӥ арзэ ни семхозяйство луиськом, — шуэ Татьяна Алексеевна. — Азьло арлы быдэ 700 тонна кидыс дасяськом ке вал, табере — 1 сюрс 200 — 1 сюрс 300 тонна. Кидысмес яратыса басьто Вавож, Ува, Алнаш но Эгра ёросъёсысь эштосъёс. Туэ уногес вузамы вика но кӧжы кидысъёс.
КЗС сьӧрысь лудын кыкетӥ нуналзэ викаен суро сезьы кизе ни Егор Широбоков. «Быстрица» С-6ПМ1 сеялкаез пневматикаен ужа. Егор Валерьевич МТЗ-82 тракторен шумприч ветлэ, ог мынэмаз 6 метр пасьта ю тысь соге, минерал сылал пазьге но муэз небӟытыса кельтэ. Бӧрсяз ӵанаос уллёен лобало, музъем вылэ пуксьыса гинэ вуо, Егор Широбоков нош ик соосты кышкатэ. Озьы со одӥг но ӝыны нуналскын 58 гектар лудэз кизьыса быдтӥз.
Бусые лыктӥзы огазеяськонлэн валтӥсь директорез Елена Чиркова, ёросысь гурт удысъя управленилэн кивалтӥсез Ольга Соловьёва но валтӥсь агроном Клавдия Хозяйкина. Соослы но яраз Егор Широбоковлэн кизем бервылыз: му вольыт, чебер кыле, сюй комокъёсты уд адӟы.
— Туэ лудъёсмы огдыре уг шупало, — валэктэ Елена Михайловна. — Со урод ӧвӧл, огез бӧрсьы мукетыз бусы вуэ. Кизиськом, агротехникалэсь вань куронъёссэ чакласа: быг-быг небыт дасям музъеме кидысэн ӵош минерал сылал ватсаськом. Жаг турынзэ гербицидъёсын быдтом. Ваньмыз со луонлык сётоз ӟеч урожай басьтыны. Нош валэс ю кизёнмес 7-8 нуналскын йылпумъяны малпаськом. Тани механизатор Николай Шкляев кык нуналскын 85 гектар  люцернаен суро сезьы кизиз. Механизаторъёсмы вожмаськыса ужало. Бусые дыраз вутто кидыс но удобрение, нокыӵе ӝеганъёс ӧвӧл. Нуназе лудын пӧсь сиёнэн сюдӥськом. Нош кизёно муосмы ичи ӧвӧл, валэс юосмы 1 сюрс 185 гектар, одӥг но трос аръем турынъёсмы 2 сюрс 25 гектар люкасько.
Нуназе бере ми вуим Мушкошурсьӧр лудэ. Татын но шулдыр ужгур чузъяське. Т-150 тракторен муэз культиваторен небӟытэ Евгений Поздеев, нош кӧжыен суро сезьы кизе Николай Чирков. МТЗ-82 тракторез КМН-8-3 сеялкаез туж быгатыса нуллэ, одӥг мынэмаз 8 метр пасьта ю соге. Солы кидыс ворттэ Александр Корепанов, нош аммиак селитра — Сергей Агафонов. Тани Николай Чирков тракторзэ сюрес дуре дугдытӥз, сеялкаез син азьын тырмиз кидысэн но удобрениен — юрттӥз Валерий Пантелеев.
Зэмен но, огазеяськонын тулыс кысык бусы ужъёс кулэезъя радъямын. Механизаторъёс кизёнлы ӟеч-ӟеч дасяськиллям. Техникаез учконъя ёросысь комиссия но 16-тӥ апреле сое умоен пусйиз, адӟытэк ӧз кельты мастерскойысь механиклэсь Денис Корепановлэсь но валтӥсь инженерлэсь Антон Галичанинлэсь сюлмаськемзэс.
Берло нуналъёсы куазь кӧня ке зорыса ке но улэ, зураослы со уг люкеты. Шунды потэ ке, моторъёс нош ик гурето ни. Одӥгезлэн но механизаторлэн бере кылемез уг поты. Озьы юн оскон кылдэ: огазеяськон туэ но удалтэм ю-нянь будэтоз, пудоослы тырмыт но ӟеч сиён дасялоз.

Геннадий Романов    
Владимир Беломорских

Удмурт Дунне
By Удмурт Дунне Май 4, 2012 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<